Sálumu109
Lafurieidun aban gürigia éibaahouti
1Bungiu, merederabá maniñu lun nafurieidun,2adimurehati iyumaü yeeti wuriba nuagu, ani iyeeni le lariñagubei.3Geyeguliña hererun lánina iyereehabúni nau; ábürühatiña nuagun mébunouga!4Leweñegua nínsiñehabu, ábürühatiña nuagun; gama lumoun aba nafurieidun.5Fáyeihaña wuribati nun luagu buiti, iyereehabúni híchugubei nun leweñegua nínsiñehabu.6Ruba aban wuribati lun laguseragüdüni nágani, ani lubuyein guánarügüla asiadirei;7rualá kei gadurunti lidan aguseruni; siadiléi le lúmagiñe guánarügübei.8Murusunrügülá dan labagaridun, rédeila amu lau lumegen!9Redei hamá lirahüñü magübürigunga, rédeime lúmari mámariga!10Redei hamá lirahüñü éibugañahadügü amuriaha ídemuei! Bugá hamaña lídangiñe tárigirugu haban!11Barülei le afuredeihabei lun sun le lánibei. Bayú haméi gürigia terencha le libihubei lídangiñe luadigimari luéi.12Ualá gudemehabuti lun, ni houn lirahüñü ha méteñuhaña.13Gumú hamá ladügawagun, gumugualá lúgubu liri lun súnwandan.14Haritagualá Aburemei luagu luriban lúguchi, maguludaléi tifigoun lúguchu lun súnwandan;15haritagualá Aburemei luagun súnwandan, gidalei laritawagún luagun fulasurugugiñe.16Maritagunti ni aban wéiyaasu lun gudemehabu lan, éibaaha lumutiña ha gudemebaña, ha ǘnabugubaña, hama ha nidiheribaña darí láfaraguniña hilagubei.17Kei himei lubalin íñarawaguni, íñarawaguala! Kei maha lubéi lun abiniruni, mabinirualá!18Darugualá íñarawaguni lau kei aban daüguaü; belula lurageirugun luma lidoun labu kamá hamuga duna odi garaba;19darugualá lau kei aban daüguaü, muruléime kei aban béliti!20Ítarala lafayeiruniña Nabureme náganiñu hama ha adimurehabaña wuriba nuagu!21Ánheinti buguya Aburemei, ruba inebesei lun biri, óuserabana buidu; sefubána luagu lareini bínsiñehabu!22Wéiriti nugudemen luma nidiheri, anihein biti tuagu nanigi;23agumuchagueinaniña kei lamuñounga; aduruuha lumutina garabali kei aban chigangaru!24Adadagarati nigachürügü ladüga meigin nan nadureiduña ladüga méigini;25au héheraagülebei gürigia! Dan harihinina aba hánhinhani hachügü adaagua bula nau!26Íderaguabana, Nabureme, Nubungiute; sefubána luagu bínsiñehabu!27Subudi hamaamugei luagu badüga lan katei le lau búhabu.28Meberesegúntina ánhana híñaragua, binirügü báadina ligía. Ragǘ hamá busiganu aume agundaara;29buin hamá náganiñu lau busiganu! Darugualá busiganu hau kei aban idaüdinaü!30Níchuguba eteingiruni magumuchaditi lun Nabureme lau niyuma, neremuhaba lun hadan saragu gürigia!31Ladüga ligía ageindagubei háugiñe gudemetiña, sefuláña hawéi ha asiadirubaliña lun óunweni.Bible Society of Honduras