Sálumu10
Dios ta defendé hende flihí kontra hende malbado
Furíeigi amuriahei lídehan Bungiu
1Aburemei, ka uagu bidisebei? Ka uagu baramudagua lidan lidere dan?2Éibaaha hamutiña ha salufuribaña, ha ǘnabugubaña lau anaaguni unguaü luma lau anarimeni gama lumoun hábürühaba tidoun guánarügü hasadaran.3Pántatiña ha salufuribaña lau guánarügü lagübüri hayumahan; ha igaaduabaña, rútiña mebereseni lun Aburemei.4Iñura hamuti hagibu, hariñaga: «Úati Bungiu, úati lunti laguseragüdüniwa». Ligía sun le haritagubei.5Súnwandan buidu lan lidin houn lidan sun le hadügübei. Díseti baguseragüdün houn, wéiriti lidise luéi harihin. Ábati héherahan hau háganiñu,6haritaguatiña luagu úabei lan ábürügüdütiña, luagu miábinbei lan turobuli houn.7Buin liña hayuma lau íñarawaguni, lau iyeeni luma anabahani; luágurügüñein áfarahani luma wuribani hayanuha,8aba burí haramudagun lidan lirahüñü fulasu lun háfaruni le madurunbei hilagubei. Magida hamuti harihin luéigiñe le mérebei.9Ítara haña kamá hamuga aban liñún tidan luban, aríaaha hamuti le gudemebei tídangiñe haramudaguagüle, aguraba kaba lan oura hábürüha luagun; danti le hárügüdüni, aba haduruguduni tau hasadaran.10Lemuguatiña, diñugua hagía, ábati hábürühan ha mérebaña háhaburugun.11Haritaguatiña ha salufuribaña luagu bulíeigua lan Bungiu, luagu darugua lan lau ligibu, luagu marihin lan ni kata.12Iñuraguabá Nabureme! Iñurabéi barüna! Mabulieidabaña ha nidiheribaña!13Ka san uagu Nubungiute, héherahaba lubéi ha salufuribaña nau; haritagueina hagía luagu maguseragüdün bubaña lan?14Buguya guánarügü ariha baali lanarime hariban; ariha baali ani bíchugubei le hadünabei houn! Buagun habalacha ha mérebaña; buguya hídehabei ha méteñuhañabaña.15Halaguabei harüna wuribatiña! Fáyeigüdabaña luagu hariban, darime lun ua lan ni kata erederuti mafayeirunga!16Aburemei Urúeibei lun súnwandan; habugawaguba gürigia ha mabungiutebaña hageiragiñe!17Aburemei, aganba bumuti hafurieidun ha ǘnabugubaña rútibu gurasu houn, teni buguya houn.18Rubei haricha méteñuhaña houn, hama ha gudemebaña; lun manufudehandigia hamá gürigia ha adügǘbaña lau múa!Bible Society of Honduras