Ariñawagúni7
Tisumadin würi to gagabarahatu
1Aganbabéi nererun, niráü, areidabei nugumadin tidan banigi.2Aganbabéi nugumadin luma narufudahan; góunigibei kei lila bagu, ábame gabagari ban.3Gürabei luagu bifinga, bürübei tidan banigi.4Barübei lichú aau kei bíbugaña, barübei lualin ichügü kei bumada.5Lesefurubadibu tuéi würi gagabarahatu, tuéi würi to busenboun tadarihanibu lau burí libimen dimurei.6Luagu aban weyu, naríaguña luéigiñe funedera núbiñe,7aba narihin fiu nibureingiña lougua tisubudin, aba netenirun aríaguei létima ibidiouguabei aau hádangiñe.8Dan lachülürünbei luagu legeyedun üma, aba lánhiñuragun túbiñoun würi gagabarahatu tuguya.9Adarüdeina liña oura ligía, lagumeseruña aburigada.10Sódini, aba táfuridun würi tuguya lubaroun lau sun taranserun luma luriban taritagun keisi aban horu,11aban würi furesetu, to gademantu, to siñati terederun túbiñe,12to éibugañahadügütu ǘmada áluaha tárügüdüni furumiñeti wügüri ásügürüti.13Aba tóuburuni würi tuguya nibureingili ligía, aba tachuuruni liyuma, aba tariñagun lun, meberesegúnga ni ka au:14«Füramasetina meha adagaragüdüni le lánina arandaruni, gúnfulihadina buga lau nani füramasei uguñe.15Ligía náfuridunbei bubaroun; wéiriti buga nabusenrun narihinibu, ani darí náadibu!16Aranse naaru nigabanan, tau aban gúlucha Ehiptuna tautu linu,17tugua naaru lau ibiñein, le lauti mira, áloe luma kanela.18Higabu, keimoun wíchiga ugundani wóuniwagua sun áriebu, wásügürüba dan buiti wámagua darí larugadun,19ladüga úati númari ya, aningira luagu aban wéiyaasu lüti;20barüti saragu seinsu, ani magiribudúnbei darí fulenu hati».21Héretu luagu, aba tabimeduni nibureingili ligía darí lun tanügüni túmagua.22Aba lidin tárigi furese, kei aban bulu bágasu le anügǘti lun lafarún, kei aban usari le ábürühati tidoun sádara,23aba tabouchagunu aban gimara lanigi; kei aban dunuru le ñǘdünbei lungua tidoun sádara, ibidiñounga lun luagu lounwe lan.24Ítara liña lubeiti, niráü, aganbabána; tenibá lun nererun.25Mígiraba lun tínsiñeduba lan aban würi tibe tura bun; beferidiruba anhoun bafalara,26ladüga gíbeeña táfaragun, saraguhaña tanügün lidoun óunweni!27Bálugun bafalarunu, kéigubeirügü bárügüdüni lémeri óunweni.Bible Society of Honduras