Ariñawagúni5
Eweridihani libügürü agabarahani
1Niráü, tenibá lun lichú nau, rubei barigei lun lualin nichügü.2Ítara luba buidu lan bigaburi, arufudaléime biyanun subudibani ka lan uagu bayanuha.3Ladüga semeeti tiyanun würi gagabarahatu, ani fínuti tumalali sügǘ lau garaba,4gama lumoun lagumuhóun oura, gífiti sügǘ lau asiwaru hamana ligía sügǘ tau aban eféin to biangua tamana.5Leibugúniwa tuma, kéisigubeirügü leibugún lidoun óunweni; tanügübadibu reiti lidoun umúahaü.6Meberesentu lau lémeri ibagari, segeti tǘmate, ani ibidiñeti tun.7Ítara liña lubeiti niráü, aganbabána, madireirabá luéi narufudahan.8Disebá tuéi würi gagabarahatu, mayarafadabá lun tubenari tuban,9mederegerun báamugei bere houn amu, ni birumudiri houn gürigia salufuritiña;10manügün láamugei ni aban terencha birisin lebegi báfaagun luma buadigimari,11luéi basakürihan danme le lagumuchagun búgubu murusun murusun.12Bariñagame: «Ka san meha uagu numaganbadinbei? Kame san namahara lun eweridihani?13Máhatina meha naganbuniña numaisturungu, metenitina houn ha meha arufudahabaña nun,14ítagaraü yebe nadariragun nungua kei ni kata hagibugiñe sun gürigia!»15Deregüdaguabá tuma búmari, túnrügüla bíchigei bínsiñehabu.16Ánhabu garahüñü tau amu würi, manügünbei lira buiti bun.17Lunti haweinamudun birahüñü lun híderagunibu, mama lun híderagun amu.18Gundaabá lubeiti tuma búmari, gundaabá tuma to úmaboun bamarieida danbei nibureingidibu;19magadiñetu ani wende tugía kei aban usari. Hóuburatabu lau tínsiñehabu. Gundaaguagüdatabu lau tuenden.20Ka san uagu bádaragua bungua tumoun würi gagabarahatu, niráü? Ka uagu báguragua bungua tarünarugun?21Aríagu liña Bungiu lun hagaburi sun gürigia, aríagu liña lun sun hagudárigi.22Ábürühatiña ha salufuribaña lidoun hariban guánarügü; güragua lumutiña hafigoun guánarügü kamá hamuga aban gúrudu.23Hóunweguba, ladüga márügüdagun hamá houngua, barǘ lumutiña libidiounigan hau lidoun féridi.Bible Society of Honduras