Ariñawagúni26
1Lichugún inebesei houn ibidiougua tau, ítara liña kei niewe lidan lubachouga, kei huya lidan lidaani alubahani.2Íñaraguni le mébunabei, madagabei, ítara liña kei dunuru yuriguaali o le lan mádibuti.3Gasu labeichún ibidiougua tau, kéisigubeirügü gasu lan lamasurun gabayu, rúa ligía furenu luagu burigü.4Anhein móunabun ban ibidiougua tau, mabidiouniganti bau.5Ánhaña bóunaba ibidiougua tau, ítara biña giñe kei hagía.6Lounahóun uganu hama ibidiougua tau, ítara liña kei lachugúniwa ugudi, áluahoua ligía turobuli.7Madiseti léibugun aban danimati lau lugudi, madiseti giñe léibugun ariñawagúni le hariñagun ibidiougua tau.8Lichugúniwa inebesei houn ibidiougua tau, ítara liña kei lagüürǘniwa dübü tuagu ule.9Ítara kei masandi hamani bacharuatiña límiruniña hiiyu, ítara liña ua lan gunfuranda hamá ibidiougua tau ariñawagúni.10Ítara haña ha íchugubaña wadagimanu houn ibidiougua tau hábiñe kei achüühatiña gimara ha esetirutu hagimaran luagun furumiñeguarügü ásügürüti.11Houya hamuti ounli hewerahan kei háguyuguagüdüni ibidiougua tau libidiounigan hau.12Agurabúati katei hámagiñe ibidiougua tau sügǘ lau hámagiñe ha haritaguabaña luagu chu lan hau.13Luéi hawadigimaridun ha magúalibaña, ariñagatiña luagu anihein lan aban liñún agurabahaña ǘmada.14Kei ladaarun luma ladourun bena, ítara liña hagarabahan magúalitiña hagabananrugu.15Da hamuti magúalitiña háhabu lidoun asiedu gama lumoun siñá hamuti íchiga hayumulugun.16Ha magúalibaña haritaguatiña hawougua luagu chu lan hau sügǘ hau sedü gürigia ha góunabaditiña.17Bádaragun bungua lidoun hawuribun amu, kéisigubeirügü bárügüdün aban ounli luéigiñe larigei.18Kei lülü tau ha achüühatiña gimara lautu watu gemeti,19ítara haña ha eyeedagutiña hamadagu, lárigiñe aba hariñagun luagu háhurerarügüña lan hama.20Anhein mabúa watu, léñeguchuba, anhein ua marasualugu, lagumuchaguba wuribu.21Garubun lun ladügǘn eñeguraü, ílemei lun ladügǘn watu gemeti, le ganigibei wuribu, lun ladügǘn wuribu.22Ítara liña marasualugu kei libimen-agei éigini, gama lumoun chülüti lidoun lilulin agei.23Ítara liña dimurei huáliti le ariñawagúbei lau luriban aritaguni, kei sóudieru lauti múa le ouburúati lau pülata.24Ha iyereehabúbaña, aramuda hamuti hayereehabu dan hadimurehan, gama lumoun adaaguatiña luriban aransehani hádangua.25Mafiñerabá houn ánhaña adimureha bun lau idilini, ladüga buin liña hasaminan lau wuribani;26íbini houchun haramuduni hayereehabu, harihubei sun gürigia hariban.27Ha achigitiña aban huyu, héiguaduba lidoun, ha abalabahatiña aban dübü, laburechagubaña dübü ligía.28Iyereeguti inarüni houn yéetiña; ha dilibaña adimurehan barütiña chagaguaü.
Bible Society of Honduras