1 Lúrudu8
Arufudahani burí lun lebedúniwa lanpu
1Aba líchuguni Wabureme uganu le lun Moisesi lun lariñaguni lun Aarón:2—Danme besetiruni lanpu, adügabá lun larugoungadágüdün ligibugiñoun lebu sanudelu.3Gúnfuli lumuti Aarón le lariñagubei Wabureme lun Moisesi lun lariñaguni lun, aba lesetiruni lanpu lun ligibugiñounba lan lebu sanudelu lidin larugounga.4Lebu sanudelu ligía, lauti golu, lau marüdiyu ladügǘwa lúmagiñe lugudina darí lumoun lígirugu. Ítara liña ladügüni Moisesi lebu sanudelu ligía kei le larufudubei Wabureme lun.Hederegerúniwa Lewitagu
5Aba lariñagun Wabureme lun Moisesi:6—Díreibaña Lewitagu hádangiñe híbiri Ísüraelina, ábame barumadagüdüniña.7Anihánba échuni le lánina arumaduni: Ábame babahichaguniña lau duna le lánina arumaduni, lárigiñe ábame hásaraguni sun hágubu, chibá hamounme hadaüragun; ítara luba harumadun.8Lárigiñe ábame hanügün aban bágasu wügüri le ñǘraügili tuma murusun tídangiñe tubuidun-agei fulúaru to añoundawagutu lau garaba, lun hadügüni idewesei fulúaruauti le yuubei lun hadügüni, lúmaya ábanya bágasu wügüri le ñǘraügili lun adagaragüdüni luagu figóu.9Bayarafadagüdañame Lewitagu turugabun kianpu lánina óundaruni, óundaragua hagíame sun Ísüraelina.10Lárigiñe ábame badügün lun hayabin Lewitagu nigibugiñoun, ábame íchaaheina hamani Ísüraelina háhabu hábulugu Lewitagu.11Ladügübei Aarón échuni le lánina harufudagun Lewitagu houngua luéigiñe hóubadina Ísüraelina, ítara luba herederun Lewitagu deregewañu lun heseriwidun nun.12Lárigiñe ábame híchuguni Lewitagu háhabu hábulugu bágasu wügüriña ha ñǘbürigiña, ábame hadagaragüdün aban keisi adagaragüdüni luagu figóu, le aban keisi adagaragüdüni gudawarügüti lun harumadun Lewitagu.13Lárigiñe ábame bíchuguniña ligibugiñe Aarón hama lirahüñü, ábame badügüni échuni le lánina arufudúni lun bíchuguniña lun heseriwidun nun;14ítara luba bafanreinruniña Lewitagu hádangiñe ha híbiri Ísüraelina lun nánibaña lan.15Lárigiñe ábame houdin eseriwida tidan kianpu lánina óundaruni. Gasu barumadagüdüniña, ábame barufuduniña keisi aban idewesei le lúnrügüti Wabureme,16lugundun hádangiñe sun Ísüraelina yúutiña Lewitagu nun. Aba nánharun houn heweñegua hágiramagu Ísüraelina,17lugundun yúutiña sun hágiramagu Ísüraelina nun, kéisigubeirügü furumiñetiña harahüñü habiñanigu. Dan le náfaragunbaliña sun hágiramagu Ehiptuna, ígira numutiña hágiramagu Ísüraelina nubarua lun nánime.18Gama lumoun aba nánharun houn Lewitagu heweñegua.19Anúadira numutiña Lewitagu haganaguagiñe Ísüraelina, aba nederegeruniña lun Aarón luma houn lirahüñü, lun heseriwidun tidan kianpu lánina óundaruni lau hiri sun Ísüraelina lun hibihini ferudun lúmagiñe Wabureme luagu hafigoun Ísüraelina. Ítara luba mayarafadun hamá Ísüraelina tun sanduariu lun másügürün lan ni kata wuribati houn.20Gúnfuli lumuti Moisesi, Aarón hama sun lílana fulasu le lariñagubei Wabureme lun Moisesi habügürü Lewitagu.21Aba harumadun Lewitagu chibá hamóun hadaüragun, aba larufuduni Aarón keisi idewesei le anuadahóuarügüti lun Wabureme, aba ladügüni échuni le lánina arumaduni hawagu.22Lárigiñe sun katei le, aba houdin Lewitagu adügei hawadigimari tidan kianpu lánina óundaruni, lábugiñe laríaahan Aarón hama lirahüñü. Ítara kei lariñaguni Wabureme lun Moisesi, ítara liña ladügün hau Lewitagu.Lidaani heseriwidun Lewitagu
23Aba líchuguni Wabureme uganu le lun Moisesi lun lariñaguni houn Lewitagu:24—Lunti hagumeserun Lewitagu eseriwida tidan kianpu lánina óundaruni lídanme hagunfulirun wein-seingü irumu,25lásurame heseriwidun lidan hagunfulirun dimí-san irumu.26Lárigiñe dimí-san irumu ligía, gayaraabei híderaguniña hupanaagu lidan hafisiute tidan kianpu lánina óundaruni, gama lumoun mama lun heseriwidun kei bugaha hadügüni lubaramegiua. Ítara luba baranseruni heseriwidun Lewitagu.Bible Society of Honduras