1 Lúrudu3
Le lunbei hadügüni Lewitagu
1Añahán meha ladügawagunbaña Aarón luma Moisesi lidan meha dan le ladimurehanbei Moisesi luma Wabureme luagu wübü Sinaí:2Lirahüñü Aarón: Nadabü le íbugañaü, Abiu, Eleasárü luma Itamárü.3Gádürügubei hagía deregeguatiña houngua lun hafadirihan,4gama lumoun hilati Nadabü luma Abiú ligibugiñe Wabureme ladüga hágudahan katei le terenchati lun lidan fulasu mageirawati Sinaí. Hagía marahüñütiña buga. Ábati hafadirihan Eleasárü luma Itamárü lábugiñe laríaahan Aarón le háguchi.5Aba ladimurehan Wabureme lun Moisesi, lariñaga lun:6—Waba houn lílana lani Lewí türibu, lun híchaagun houngua labun lugumadin fádiri Aarón lun heseriwidun lun.7Heseriwiduba lun Aarón luma houn lílana fulasu tigibugiñe kianpu lánina óundaruni, hagíaba ariha lau eseriwiduni tidan sanduariu.8Hóunigirubei giñe tumegegun kianpu lánina óundaruni, seriwi hagíame houn Ísüraelina lidan sun le adügǘbei tidan sanduariu.9Díreibaña Lewitagu hádangiñe híbiri Ísüraelina, lun híchaagun houngua lúnrügü heseriwidun lun Aarón luma houn ladügawagun,10ígirabei hafisiute fádirigu lúhaburugu Aarón hama ladügawagun. Le adügüti lifisiute fádiri mámouga ligía fádiri, lasiadirúba lun lounwen.Yúutiña Lewitagu lun Wabureme
11Aba ladimurehan Wabureme luma Moisesi, lariñaga lun:12—Anúadira naaña Lewitagu hádangiñe Ísüraelina leweñegua furumiñeti haráü kada iduheñu. Yúutiña nun,13ladüga yuuti sun furumiñeti isaani nun. Dan le náfaraguagüdünbaliña hágiramagu Ehiptuna, aba nareiduniña hasaanigu Ísüraelina ha íbugañanu hama furumiñetiña harahüñü animaalugu nungua. Yúutiña lubeiti nun. Au Aburemeibei. Abahüdabaña Lewitagu hawagu haduheñu hama hani türibu, ábame babürüdüniña wügüriña ha ábanti hati hau lun iñun.Habahüdǘn Lewitagu
14Aba ladimurehan Wabureme lun Moisesi lidan fulasu mageirawati Sinaí, lariñaga lun:15«Abahüdabaña Lewitagu según iduheñuguaü luma según hani külán, ábame babürüdüniña sun wügüriña Lewitagu ha ábanti hati hau lun iñun».16Aba ladügüni Moisesi, ítara kei lariñaguni Wabureme lun.17Ǘrüwañanu meha lirahüñü Lewí: Gerüsón, Keatü luma Merarí.18Hagía burí lagüchagubaña külán le anügübalin hiri. Biámañanu meha lirahüñü Gerüsón: Libüní luma Simí. Gádürüñanu meha lirahüñü Keatü: Amürámü, Isarü, Ebürón luma Usieli. Ánheinti Merarí biámañanu lirahüñü: Malí luma Musí. Hagía meha hagüchagubaña hani Lewitagu külán ha gíribaña ítara.21Ha lani Libüní luma Simí külán, hagía lánibaña Gerüsón.22Hadan sun ha abahüdǘbaña ha ábanti hati hau lun iñun, bürüwatiña sedü-milu-seingü-san.23Sun ha, tanagangiñeñoun sanduariu hani kianpu-agei luéigiñe oubaü le ñéingiñe lubéi lálüda weyu.24Eliasáfü le liráü Laeli, ligía hábutibei ladügawagun Gerüsón.25Tidan kianpu lánina óundaruni, hagía arihubaña tau sanduariu, kianpu, idáü le lauti uraü, korutína to tubenariboun kianpu,26korutína burí to lídanboun bürürü, korutína to luáguboun lubenari bürürü to geyeguboun tau sanduariu luma latarü luma burí tagürüga.27Lani Keatü külán, hagiamémeha lani Amürámü, Isarü, Ebürón luma Usieli,28wügüriña ha abürüdǘbaña hádangiñe, ha ábanti hati hau lun iñun, wídüñanu-milu-ǘrüwa-san. Hagía óunigirubarun sanduariu,29ani luéigiñeñanu suru tibiti sanduariu külán burí le.30Elisafán le liráü Usieli hábutibei külán ha.31Lábugiñeñoun haríaahan külán ha, lubagüsina daradu, dábula, lebu sanudelu, latarü, ílagu burí sagüráuti le ayusurúbei lidan kultu, belu luma sun tumegegu.32Eleasárü le liráü fádiri Aarón, ligía furumiñetibei hábuti Lewitagu, ligía aríaahabaliña ha óunigirubarun sanduariu.33Ha lani Malí luma Musí külán, hagiaméme lánibaña Merarí.34Hadan sun ha abürüdǘbaña hádangiñe ha ábanti hati hau lun iñun, sisi-milu-bián-sánñanu.35Surieli le liráü Abiaili hábutibei ani luéigiñeñanu nórute tibiti sanduariu.36Ladügawagun Merarí anügübaña kárugu lau tufulansun sanduariu, tíndanute, tuágaburi, tebu luma sun le ayusurubei tidan,37luma giñe lau burí wagabu le geyegubei lau bürürü, tebu, tuewen luma tuguruduna.38Luéigiñe oubaü le ñéingiñe lubéi laboucha weyu, tigibugiñe sanduariu tuma kianpu lánina óundaruni ñeinñein Moisesi, Aarón hama lirahüñü Aarón, ha óunigirubarun sanduariu lidan hiri ha híbiri Ísüraelina. Leha adügüti lifisiute fádiri mámouga ligía fádiri, ábaha lasiadirúniwa lun lounwen.39Dan le labahüdünbaliña Moisesi luma Aarón Lewitagu keisi lariñagun Wabureme lun, wügüriña ha ábanti hati hau lun iñun, wein-bián-míluñanu hadan súngubei.Hesefurun ígiramaügu
40Aba lariñagun Wabureme lun Moisesi:—Abahüdabaña hágiramagu Ísüraelina wügüriña ha ábanti hati hau lun iñun, ábame babürüdüni hiri.41Bígirañame Lewitagu nun heweñegua hágiramagu Ísüraelina. Au Aburemeibei. Ígirabañame giñe habiñanigu Lewitagu nun heweñegua furumiñetiña harahüñü habiñanigu Ísüraelina.42Aba labahüdüniña Moisesi hasaanigu Ísüraelina ha íbugañanu ítara kei lariñaguni Wabureme lun,43wein-biámañanu-milu-bián-san-ǘrüwa-wein-tareisi wügüriña ha ábanti hati hau lun iñun abürüdǘtiña.44Aba ladimurehan Wabureme lun Moisesi, lariñaga lun:45—Barübaña Lewitagu heweñegua hágiramagu Ísüraelina hama habiñanigu Lewitagu heweñegua habiñanigu Ísüraelina ladüga yúutiña Lewitagu nun. Au Aburemeibei.46Gama lumoun gíbetimatiña hágirama Ísüraelina wügüriña sügǘ hau Lewitagu; lun lubeiti hesefurun bián-san-ǘrüwa-wein tareisi íbugañanu Ísüraelina ha hóugiñebaña,47bamuriaha aban ídemuei le seingü murusun pülata luma kada gürigia, según lihürü tiseinsuna Sanduariu, le ábanbei murusun pülata le únsuti güramu,48bíchigeime lun Aarón luma houn lirahüñü keisi lebegi hesefurun.49Aba lóundaruni Moisesi seinsu le lebegi hesefurun hágiramagu Ísüraelina ha ígiragubaña,50aba lóundarun milu-ǘrüwa-san-ǘrüwa-wein murusun pülata, según lihürü tiseinsuna sanduariu.51Lárigiñe aba lederegeruni seinsu ligía lun Aarón hama lirahüñü, ítara kei lariñaguni Wabureme lun.
Bible Society of Honduras