Mikeasi3
Uganu kóntüra gumadimatiña wuribatiña
1Lárigiñe aba nariñagun: «Aganba humá guentó huguya gumadimatiña hama ábutigu Ísüraeli, ma funagia yuuti hun lun hasubudiruni katei lan irichaübei?2Gama lumoun iyereeguti buiti hun, línsiñeda wuribati hun; éleha humuti hara numutuniña aba hígiruni habu furangu.3Hou humutiña numutuniña wínwanñu; éleha humuti hara halagua huméi habu óusera humutiña kamá hamuga úi lun lábouagun.4Hagúarubei Wabureme, gama lumoun móunabun lubadün. Laramudaguba huéi ladüga burí wuribani le hadügübei».Uganu hawagu profetagu yéetiña
5Lagübüri üma hafalarubei numutuniña hadüga profetagu ha eyeedubaliña, ha adimurehabaña luagu darangilaü houn ha íchugubaña éigini houn, gama lumoun awuribuhatiña hama ha míchubaña houn. Lariñahare Bungiu houn profetagu hagía:6«Mayanuhandigiaadina hun lidan uénedü áriebu, mariñagun humeime lidan luburiga le lunbei lasuseredun. Lálüdüba weyu houn profetagu hagía búriga ligíame wéyuagu.7Hanügüba profetagu hama garíaahatiña ha busiganu. Herederuba sun hagía maniñu danme móunabun lániña Bungiu».8Ánheinti au, buíngüda lumutina lani Bungiu sífiri lau erei, irichaü luma anigi, lun nariñaguni lumabuchahan luma lifigoun Ísüraeli lun ligibuagun.Lagünrinchawagun Ísüraeli
9Aganba huméi katei le guentó, huguya gumadimatiña hama ábutigu Ísüraeli, huguya le iyereehabúbei lun irichaü, ani segegüda huméi sun le surubei,10huguya le ábunagubalin Herusalén ligibuagu áfarahani luma marichaü.11Aluguraguatiña aguseragüdütiña houngua luagu fáyeiti arufudahatiña fádirigu luagu seinsu, aluguraha hamuti giñe profetagu hererun, asigeneheina luagu hámagiñeñein lan Wabureme hariñaga: «Anihein Wabureme wama; masuseredunbei ni kata wuribati woun».12Ladüga lubeiti hidurun, lerederuba Herusalén kei aban dübü-agei lawouchúba Sión kei ichari, labuinchuba híduru tau ténpulu.Bible Society of Honduras