Mikeasi2
Habafu íchugutiña lidere dan
1Fugiabugu ha íbinibei lidan hawenedü haritaguatiña hadügün wuribani, dan larugadun aba hadügüni haritagun ladüga anihein lan ubafu háhaburugu!2Awamadiratiña burí fulasu, aba hanügüni; awamadiratiña burí muna, aba híweruhanu. Rútiña lidere dan houn wügüriña hau sun tílana haban luma hemegen.3Ligía lariñahare lubéi Wabureme: «Aransehaadina giñe hubá. Nóunahaba aban lamiselu huagun, le ídangiñebei siñabei lan hesefuruni higiina, siñaalime héibugun lau pantaü ladüga lidaanihalime günringuaü.4Lídanme weyu ligía, leremuhóuba uremu le lánina ayahuni hun. Lariñagame lidan uremu ligía: “Günrinwaguaadiwa sunsuinagubei; wageira, le lumegen Wabureme sánsiha labureme úouga kaba lan erederei; fánreinwagua wachari hadan ha agañeirubaliwa” ».5Ligía mafanranbadün lubéi hadan lumutuniña Wabureme.Profetagu wuribatiña
6«Miabin humá woun lau dimurei lúmagiñeti Bungiu! —liña hariñagun—. Machülübei lamiselu wawagun!»7Íñarawaguaaña funagia lumutuniña Hakobu? Féridila funagia Bungiu luguraasun? Ítara liña funagia luadigimaridun Bungiu? Mama funagia buiti ladügübei lererun Bungiu lun le éibugubei lidan lúaragun?8Huguya iñuraguaadün hungua hawagun numutuniña. Bayú humutu daüguaü gebegitu hawéi ha agiribudubaña wuriburugugiñe asaminaréina séfuhaña lan.9Bugá humutiña würiña hábiñegiñe, gidá huméi uéiriguni le níchugubei houn harahüñü hawéi sunsuinagubei.10Sará humá! Héibugameme! Mama fulasu emeraaguagülei le; ladüga iwiyei le lídanbei, lagünrinchawaguba le gumuti.11Anhein eyeeha aban gürigia, lun lariñagun: «Anuheinboun diwéin», ligíaba profeta auti hagundaara.Füramase lan Wabungiute lesefuruniña lánigu
12Nóundarubaña sun lumutuniña Hakobu; nabudubaña ha erederubaña hádangiñe Ísüraelina. Nóundarubaña kei mudún lidan fárüga kei mudún-agei lidan sagadi, ábame hareinchun keisi aban guririguaü.13Adaareina luba Bungiu üma habá, ábame hafalaruni, ábame háfuridun luéigiñe lubenari uburugu. Lídiba harúeite le Aburemei habá habá.Bible Society of Honduras