Fádirigu8
Leresibihan Aarón hama lirahüñü
1Aba lariñagun Wabureme lun Moisesi:2—Barübei Aarón hama bián lirahüñü barübóunme hadaüragun fádirigu, garaba lun anúadiruni, bágasu ñǘraügili le adagarawagüdübei luagu figóu, biángubei gábara luma faniñe le tagei fein maganatu lébini,3ábame bóundaruniña sun lílana fulasu tubenari kianpu lánina óundaruni.4Aba ladügüni Moisesi le uágubei lariñaga Wabureme lun, aba hóundaragun lílana fulasu tubenari kianpu lánina óundaruni.5Ábati lariñagun Moisesi houn lílana fulasu:—Anihán le lariñagubei Wabureme lun ladügǘn.6Lárigiñe aba lanügüni Moisesi Aarón hama lirahüñü lurugabun, aba lachibuniña lau duna.7Lárigiñe aba ladaürünu gounu luagu Aarón, aba lámuruduni lubelitin, aba ladaürünu idáü luagu, lárigiñe aba líchugunu tidáü dúnigu luagun aba lagüürünu buidu lau guánarügü tagürüga.8Lárigiñe aba líchugunu lidáü aniguagu luagu, aba líchuguni Urimü luma Tumimü tuagu lidáü aniguagu.9Lárigiñe aba ladaürünu búnedu lábulugu, ruti aban bürüti golu tigibugiñe búnedu le anúadirubalin fádirime, ítara kei buga lariñaguni Bungiu lun.10Lárigiñe aba lanügüni Moisesi garaba le lánina anúadiruni, aba láwiyuruni tuagun sanduariu luma sun le turageirugubei, aba lanúadiruni.11Aba labahichaguni latarü sedü wéiyaasu laumeme garaba ligía, aba láwiyuruni luagun latarü luma luagun sun lumegegun, luma giñe luagun ágeidinaü luma lebu lun lanúadiruni.12Lárigiñe aba láwiyuruni Moisesi garaba le lánina anúadiruni lábulugun Aarón lun lanúadiruni keisi fádiri.13Aba giñe lanügüniña lirahüñü Aarón lurugabun, aba ladaürünu gounu hawagu, aba lagüürüni habelitin, aba ladaürüni habunedun hawagu ítara kei lariñaguni Wabureme lun.14Lárigiñe aba lóunahan Moisesi anügei bágasu ñǘraügili le adagarawagüdübei luagu figóu, aba líchuguni Aarón hama lirahüñü háhabu lábulugu bágasu ñǘraügili ligía.15Ábati ladürürüni Moisesi ligiina bágasu ligía, aba lanügün lídangiñe lita lau lifinga, aba láhurudaguni luagu liganchun latarü luma geyegua lau, lun larumadagüdüni, le líbiri hitaü aba láturuni lugudina latarü. Ítara liña lanuadirúniwa latarü lun libihíniwa ferudun luagu figóu.16Lárigiñe aba lanügüni Moisesi agülei le luágubei lisasa animaalu, le luágubei lubana luma riñón lau lagüle, aba láguduni luagu latarü;17gama lumoun le líbiri bágasu ligía, lememe lura, lǘgürügü luma lídiga, aba láguduni bóugudi tuéi kianpu-agei kei lariñaguni Wabureme lun.18Aba lanügagüdüni Moisesi gábara le edewehóubei kei adagaragüdüni gudawarügüti lurugabun, aba líchuguni Aarón hama lirahüñü háhabu lábulugu animaalu ligía.19Lárigiñe aba ladürürüni Moisesi ligiina, aba láwiyuruni lita ligibuagu latarü luma geyegua lau,20aba lañügürihani gábara ligía, aba láguduni lábulugu, le añügürihóuaalibei luma lagüle.21Lárigiñe aba lachibuni lisasa gábara ligía luma liyada lau duna, aba láguduni súngubei luagu latarü keisi adagaragüdüni gudawarügüti, keisi idewesei le buiti líhemen lun Wabureme ítara kei lariñaguni lun.22Lárigiñe aba lanügǘn le aban gábara lun Moisesi, le lánina anúadiruni, aba líchuguni Aarón hama lirahüñü háhabu lábulugu gábara ligía.23Lárigiñe aba ladürürüni Moisesi ligiina gábara ligía, aba lanügün murusun lídangiñe lita aba láhuruduni ǘnabu libiti larigei Aarón le lóunwenren, luagu lúguchi lifinga lúhabu le lóunwenren luma luagu lúguchi lifinga lugudi le lóunwenren.24Lárigiñe aba hayabin lirahüñü Aarón aba giñe láhurudun hitaü ǘnabu libiti harigei le hóunwenren, luagu lúguchi lifinga háhabu le hóunwenren luma luagu lúguchi lifinga hagudi le hóunwenren; lárigiñe aba láwiyuruni líbiri hitaü ligibuagun latarü luma geyegua lau.25Lárigiñe aba lanügüni Moisesi lagüle animaalu ligía, lili, sun agülei le luágubei lumegegu, le gagülebei luagu lubana, biángubei lani riñón lau lagüle luma liyada le lóunwenren.26Aba lanügün Moisesi aban durudia maganatu lébini lídangiñe faniñe le tagei fein maganatu lébini tídangiñe to adagaruboun lun Wabureme, aban durudia to añoundawagutu lau agülei tuma aban furidasi, aba líchugunu lumoun agülei luma liyada animaalu ligía le lóunwenren;27lárigiñe aba líchuguni sun katei le lúhaburugun Aarón hama lirahüñü lun hadügüni igaburi le lánina arufudúni ligibugiñe Wabureme.28Lárigiñe aba lanügüni Moisesi sun katei le háhaburugugiñe, aba láguduni luagu latarü úara luma adagaragüdüni gudawarügüti keisi idewesei lánina anúadiruni le buiti líhemen: Aban idewesei gudawarügüti lidan liri Wabureme.29Lárigiñe aba lanügüni Moisesi laniguagu animaalu ligía, aba ladügüni ayudeihani le lánina arufudúni. Ligía murusun lídangiñe gábara le lánina anúadiruni erederubei lun Moisesi keisi buga lariñaguni Wabureme lun.30Lárigiñe aba lanügün Moisesi murusun agülei le lánina anúadiruni luma murusun lídangiñe hitaü le luágubei latarü, aba labahichaguni luagun Aarón luma hawagun lirahüñü luma tuagun hadaüragun sun hagía to lánina hafadirihan. Ítara liña lanúadiruniña Moisesi Aarón, lirahüñü tuma hadaüragun to lánina hafadirihan.31Lárigiñe aba lariñagun Moisesi lun Aarón hama lirahüñü:
—Ábougua huméi úi tubenari kianpu lánina óundaruni, ábame héigini ñein guánarügü tau fein to lídanboun lufaniñena anúadiruni, ítara kei lariñaguni Wabureme nun, dan le lariñagunbei: «Léigibei Aarón úi le hama lirahüñü».32Ábame háguduni úi tuma fein to ígiragutu,33ani madiseda humá luéi tubenari kianpu lánina óundaruni luagu sedü weyu le lunbei ladurarun lidaani hanuadirúniwa keisi fádirigu.34Ariñagaali Wabureme lun ítara luba lan ladügǘn échuni le lánina ferudunawa lan figóu le hadügübei kei ladügǘniwa uguñe.35Lunti lubeiti herederun wéyuagu luma áriebu tubenari kianpu lánina óundaruni luagu sedü weyu. Inebelá le lariñagubei Wabureme hun lun móunwegun humá lugundun Wabureme íchugubalin lúrudu le nun.36Aba ladügüni Aarón hama lirahüñü le lariñagubei Wabureme lun Moisesi lun lariñagun houn lun hadügüni.
Bible Society of Honduras