Fádirigu22
Lúrudu luáguti haruman fádirigu
1Aba lariñagun Wabureme lun Moisesi:2—Ariñagabá lun Aarón luma houn ladügawagun lun góunigi hamani burí katei harumati le hanúadirubei Ísüraelina nun luéi hawiyeduni niri le sándubei. Au Aburemeibei.3—Ariñagabá houn luagu furumiñeguarügü lan hádangiñe hálawagu guentó luma líteme, anhein wiye lubéi ligibugiñe Bungiu, aba ladügüni arufudúni lani burí katei anuadirúati le hanúadirubei Ísüraelina nun, lagidarúba lan niñúarürugugiñe. Au Aburemeibei.4—Úabei ni aban hádangiñe ladügawagun Aarón le gasanditi lépüra o ésedügüni éigiti lídangiñe burí katei anuadirúati darime harumaali.—Le aguuruti aban katei le wíyeti, aban hilaali o laguurun lan luagu aban gürigia le gasandihali ésedügüni,5o le lan awiyeduti ladüga laguurun aban animaalu le aduruuharügüti múarugu o ladüga lan laguurun luagu aban gürigia le adariraguti lungua wíyeñu aba lawiyeduni le aguurubalin,6lanügǘba keisi wíyeti darí lumoun laguñeedun, ani siñabei leigin lídangiñe katei anuadirúati anhein machibagun lungua lau duna furumiñe.7Lerederuba harumañu danme lálüdün weyu, lárigiñeme gayaraahalime leigin lídangiñe katei anuadirúati lugundun ligía léiginbei.8Moun lumuti leigin úi le lǘgürügü animaalu óunweti o le lan láfarun aban animaalu gáñiti luéi lawiyedagun lungua lau. Au Aburemeibei.9—Ariñagabá houn lun hagunfulirun luma nilurudun, lun manügün hamá ni aban figóu hawougua lau hadüraaguni nilurudun, anhein madügün hamá ítara, hóunweguba. Au Aburemeibei le anúadirubaliña.10—Siñabei leigin ni aban le mama fádiri lídangiñe katei le anúadirawaalibei.
—Ni le aganóuti lúbiñe fádiri, ni le nadagimeinti lun fádiri.11Anhein agañeiha fádiri aban idamuni lau liseinsun, gayaraabei leigin idamuni ligía lídangiñe éigini le anúadirawaalibei. Ha giñe águrahoubaña lúbiñe fádiri gayaraabei giñe heigin lídangiñe leigin.12—Anhein maríei tubéi liráü fádiri luma aban le mama fádiri, siñabei teigin lídangiñe idewesei le ichugúbei lun fádiri.13Gama lumoun anhein hilá lubéi túmari o ígiraguaaru lan, ani marahüñütu, aba tagiribudun lúbiñoun túguchi kei meha dan le mámarigiru, gayaraabei teigin lídangiñe leigin túguchi. Bóugudin luéi lira, siñabei leigin ni aban le mama fádiri lídangiñe leigin fádiri.14—Anhein eiga aban gürigia lídangiñe éigini anuadirúati ibidiñounga lun, gasu láguyugüdüni leweñegua le léigibei lun fádiri, lúmaya seingü dandu lanwoun;15gama lumoun moun lumuti hígirun fádirigu lun hawiyeduni Ísüraelina katei anuadirúati le ichugúbei lun Bungiu,16ni lun hanügün figóu hawouguoun lau heigin éigini anuadirúati. Au Aburemeibei le anúadirubaliña.
Animaalugu lun adagaragüdüni
17Aba lariñagun Bungiu lun Moisesi:18—Badimureha luma Aarón hama lirahüñü hama sun Ísüraelina bariñagame houn: Anhein adagaragüda aban Ísüraelina o aban lan terencha hádangiñe ha aganóubaña haganagua aban animaalu keisi adagaragüdüni gudawarügüti lun Bungiu, lun lagunfuliruni lererun o keisi lan idewesei le ledewehan,19gasu ladagaragüdün aban animaalu wügüri le úati mégeiti luagu. Gayaraati aban lan bágasu o aban lan mudún o aban lan gábara,20gama lumoun lun mama lan aban animaalu le aniheinti mégeiti luagu, ladüga meresibirúnwabei lun.21—Furumiñeguarügü le adagaragüdüti aban adagaragüdüni lánina arandaruni lun Bungiu, lun lagunfulirun lau lererun o keisi lan idewesei le ledewehan, gasu bágasu lan ha wügüriña o mudún hamá ha úati mégeiti hawagu ladagaragüda lun heresibirúniwa.22Manüga humá animaalugu marihintiña lun Bungiu, ni ha buleseihaña, ni ha magudihaña, ni ha gawagutiña guméi luagu hara míchugun humañame lun hagudún luagu latarü keisi idewesei lun Bungiu.23Keisi bidewese le bugundanrügü gayaraabei bíchugun aban bágasu wügüri o aban lan gábara le múaragunti lugudi, ánheinti lun bagunfulirun aban füramasei, meresibirúnwabei bun.24Manügünbadün giñe animaalu le sánditu lóustarun o le sáfunwaali lun Bungiu. Madüga huméi burí katei le hageira.25Meresibira humaña giñe animaalugu hagía lúmagiñe aban terencha keisi éigini lun Hubungiute, lugundun anihein mégeiti hawagu animaalu hagía, meresibirúnwabaña hun.Luáguti háfarahoun animaalu lánina adagarawagüdüni
26Aba lariñagun Wabureme lun Moisesi:27—Danme lameilihóun aban liraüraü bágasu, o mudún o gábara, gasu lerederun tuma lúguchu luagu sedü weyu, gama lumoun lúmagiñe widü weyu lau, gayaraahalime leresibirun lun lagudún keisi idewesei lun Bungiu.28—Máfaraba aban bágasu o aban lan mudún lau sun tiráü lidan ábanmeme weyu.29—Danme bíchugun aban idewesei le lánina eteingiruni lun Bungiu, adügabéi lidan igaburi lun gayaraabei lan leresibirún buidu.30Béigeime giñe lídanmeme weyu ligía, mígiraguagüdabei lubá le aban weyu. Au Aburemeibei.31—Adüga huméi le lubeibei nugumadin; gúnfuli huméi. Au Aburemeibei.32—Mawiyeda huméi niri le sándubei ítara luba hasubudiruni sandu nan hadan Ísüraelina, au Aburemeibei le anúadirubalün33ani saganáün Ehiptugiñe lun auba lan Hubungiute. Au Aburemeibei.Bible Society of Honduras