Fádirigu21
Le amuriahóubei hama fádirigu
1Aba lariñagun Wabureme lun Moisesi:—Badimureha hama fádirigu ha ladügawagun Aarón, bariñagame houn lun mawiyedaguagüdün hamá houngua luagu aban hádangiñe haduhe le hilaali,2luéidigia luma aban iduhei le yarafagili kei burí úguchuru, úguchili, isaani, íbiri,3itu to mámarigiru to aganóutu hábiñe ladüga mamarieidungiru lan; haweigiñeba hara gayara lan hawiyedaguagüda houngua.4Gama lumoun moun lumuti hawiyedaguagüdün ni hadaseiragun houngua tuéigiñe aban iduhei to maríeiharu.5—Moun lumuti hásaruni hádiburi helú helú, másaragun hameime hádiuma madügün hagíame biti hawougua,6le lunbei hadügüni, hanúadiragun houngua sunsuinagubei lun Bungiu luma lun mawiyedun hamani liri lugundun hagía adügübalin idewesei gudawarügüti tuma lufein Habungiute; lunti lubeiti anúadiraguañu hamá houngua lun Bungiu.7—Moun lumuti giñe hamarieidun tuma aban horu, ni tuma aban würi to féridi taali tiñǘn o to lan gámariharu aba tígiragun luma túmari, lugundun anuadirúaaña lun Habungiute.8Kipubáña díseñu luéi sun katei, lugundun hagía anügübarun lufein Bubungiute. Ani sándubaña bun, lugundun sándutina au le Bungiu, ani au adügübei lun sandu hamá.9—Anhoun ǘnabudaguagüda liráü aban fádiri tungua aba tahoruhan, ǘnabudagüda tumuti giñe túguchi ani gasu tagudúniwa wínwanñu.10—Ibihaali hábuti fádirigu ubafu lun ladaürün daüguaü anuadirúatu lau garaba le áhuruduabei lábulugu dan le lanuadirúnbei; moun lumuti lubeiti lígiruni lídiburi tulugu, ni laheiridagunu ladaüragun ladüga ligarigu;11moun lumuti giñe lebelurun le ñeinhin lumuti aban hilaali; ni íbini tuéigiñe lúguchu o luéigiñe lan lúguchi, moun lumuti lawiyedaguagüdün lungua.12Moun lumuti láfuridun lisanduariunrugugiñe Lubungiute, ni lun lanügünu sanduariu kei furumiñeguarügü katei, lugundun hurúaguaali lau garaba lánina anúadiruni le lani Lubungiute. Au Aburemeibei.13—Ábanba würi to máfuridungiru lúmari.14Moun lumuti lamarieidun tuma aban würi to hilaali túmari ni tuma aban to gámariharu aba tígiragun luma túmari, ni tuma aban to furiharu luma wügüri ni tuma aban horu, ábanba to máfuridungiru lúmari, to hádangiñetu lani türibu,15lun mǘnabudaguagüdün lániña ladügawagun hadan lánigu, lugundun au Aburemeibei, ani anúadira naali.
Le moun lumuti hadügüni fádirigu
16Aba ladimurehan Wabureme lun Moisesi, lariñaga lun:17—Ariñagabá lun Aarón luagu lúmagiñe lan uguñe, lun ua lan ni aban hádangiñe ladügawagun le aniheinti mégeiti luagu arufuduti idewesei to lufein Lubungiute.18Lidan linarün katei, moun lumuti ladügüni ni aban le gawaguti danimaü: Le marihinti, o le adamahati léibugun, o le múaragunti lígiri o larigei19le halaguaali liyada o larüna,20le sebuti lanagan, le hinanu, le aniheinti sandi lágurugu, le gawaguti guméi luagu lura o le sánditu luwügürin.21Úabei ni aban ladügawagun Aarón le danimati lun lágudahan idewesei lun Bungiu, ladüga lidaniman siñabei larufudunu lufein Bungiu.22Gayaraabei leigin tídangiñe fein luma lídangiñe burí katei sánduti luma le sándutimabei,23gama lumoun siñabei lebelurun tanagangiñoun belu, ni layarafadun lun latarü luéi lǘnabudagüdüni tuéirigun nisanduariun lau lidaniman. Au Aburemeibei le anúadirubaliña.24Aba lasubudiragüdüni Moisesi sun katei le lun Aarón, houn lirahüñü Aarón luma houn sun Ísüraelina.Bible Society of Honduras