Fádirigu17
Hata animaalugu ha adagarawagüdütiña
1Aba lariñagun Wabureme lun Moisesi:2—Ariñagabá lun Aarón, houn lirahüñü luma houn sun Ísüraelina luagu anihán lan lariñagubei Bungiu.3—Furumiñeguarügü Ísüraelina le áfaruti aban liraüraü mudún o aban bágasu wügüri o aban gábara, múnada o bóugudi tibiti kianpu-agei,4ani manügün lumuti tubenarin kianpu lánina óundaruni lun larufuduni keisi idewesei lun Bungiu tigibugiñe lani sanduariu, gadurunbei luagu láwiyuragüdün hitaü, ábameti lagidarúniwa hádangiñe lumutuniña Bungiu.5Lunti lubeiti hadagaragüdüniña Ísüraelina animaalugu ha háfarun bóugudi lun Bungiu barǘ hamañame lun fádiri tubenarin kianpu lánina óundaruni, lun ledewehaniña lidan hiri keisi adagaragüdüni lánina arandaruni.6Ábame labahichaguni fádiri hitaü ligibuagu lani Wabureme latarü, luagu tubenari kianpu lánina óundaruni, ábame láguduni hagüle animaalugu keisi íhemeni buiti lun Wabureme.7Madagaragüdündigiaañame houn máfianu ha únbaña háhuduragua ani ha uágubaña heferidiragua. Ábanbei lúrudu lunti súnwandan le hun, le lunbei hásügüragüdüni agübürigu houn isaanigu.8—Bariñagame giñe houn luagu furumiñeguarügü lan Ísüraelina o terencha le aganóuti haganagua, anhein íchiga adagaragüdüni gudawarügüti o furumiñeguarügü amu adagaragüdüni,9ani manügün lumuti tubenarin kianpu lánina óundaruni lun ledewehani lun Wabureme, lagidarúba hádangiñe lumutuniña Bungiu.Eweridiruni luéi leigín hitaü
10—Mámabadina lúmagiñe furumiñeguarügü Ísüraelina o terencha le aganóuti haganagua anhein eiga hitaü lidan furumiñeguarügü igaburi. Nagidarubei hádangiñe lumutuniña Bungiu.11Lugundun, sun le gabagaribei, lau hitaü le lídanbei labagarida, ani ru naali hitaü ligía hun luagu latarü lun gayaraabei lan hafayeihan luagu hibagari lau, ladüga hitaü lafayeihabei ibagari.12—Nariñahare lubeiti houn Ísüraelina: Ni aban hídangiñe, ni terencha ha aganóubaña haganagua, moun lumuti heigin hitaü.13Furumiñeguarügü Ísüraelina o terencha le aganóuti haganagua, le agaliruduti aban animaalu o aban lan dunuru geigúaditi, gasu láwiyuruni lita líliru ábame ladouragun lau, lau sagoun,14lugundun sun katei le gabagaribei, lita libagaribei. Ligía nariñagunbei hun lun meigin humá hitaü, ladüga ligía libagaribei sun le wínwanbei, ani furumiñeguarügü le éigiti hitaü, lafarúba.15—Furumiñeguarügü Ísüraelina o terencha le éigiti lǘgürügü animaalu hilaali o le lan láfarun animaalu gáñiti, gasu lachibunu ladaüragun, chibagua ligíame giñe lungua lau duna, ani lanügǘba keisi wíyeti darí lumoun laguñeedun. Lárigiñe ábame lerederun harumañu.16Gama lumoun anhoun machibun lan ladaüragun, machibagun ligíame lungua, lanügübei luriban luougua.Bible Society of Honduras