Fádirigu16
Luéyuri ferudun
1Aba ladimurehan Wabureme lun Moisesi lárigiñe hóunwegun bián lirahüñü Aarón ha óunwegubaña ladüga lueirin hayarafadun liñúarürugun Wabureme.2Lariñaga Wabureme lun Moisesi:—Ariñagabá lun bamulen Aarón lun mebelu lan tidoun sanduariu to tanagangiñeboun belu lidan furumiñeguarügü oura, ni ligibugiñoun idáü le tigibuagubei bágüsi, luéi lounwen, ladüga narufudaguba nungua lidan aban dúeri ligibuagu tidáü bágüsi tuguya.3Lunti lebelurun Aarón sanduariurugun lau aban bágasu ñǘraügili keisi adagaragüdüni luagu figóu luma aban mudún lun ledewehani kei adagaragüdüni gudawarügüti.4Lunti tau lan dúnigu anuadirúatu to tautu linu lebelura, tau ligalasunsiyu to linu, ladaüreime giñe lubelitin luma lubunedun le lauti linu. Tuguya daüguaü anuadirúaboun, gasu lubeiti lachibagun lungua lau duna lubaragiñe ladaürünu.5—Luéigiñe hóubadina Ísüraelina lanügüba Aarón bián gábara luma aban mudún keisi adagaragüdüni luagu figóu luma aban gábara lun ledewehani keisi adagaragüdüni gudawarügüti.6Líchigeime liraüraü bágasu keisi adagaragüdüni luagu figóu lun libihini ferudun luagu lifigoun guánarügü luma luagu hafigoun liduheñu.7Lárigiñe ábame lanügüniña bián gábara, ábame ladagaragüdüniña ligibugiñe Wabureme tubenari kianpu lánina óundaruni.8Lárigiñe ábame lachüürün Aarón ubunuruni hawagu bián gábara: Aban ubunuruni lun Wabureme, le aban lun Asaséli.9Gama lumoun gábara le uágunbei lábürüha ubunuruni le lunbei Wabureme, ábame ladagaragüdüni Aarón luagu figóu;10ánheinti le ábürühabei lun Asaséli, lanügübei wínwanñu ligibugiñoun Bungiu lun habihini Ísüraelina ferudun luagu burí hafigoun, lárigiñe ábame láguruni lidoun fulasu mageirawati le ñein lubéi Asaséli.11—Ladagaragüdübei Aarón bágasu ñǘraügili keisi adagaragüdüni luagu figóu lun libihini ferudun luagu lifigoun luma luagu hafigoun liduheñu.12Lárigiñe ábame lanügün aban lagei kupali lau leñegura watu lídangiñeti latarü le ligibugiñebei Bungiu luma bián lúhabu buin lau kupali hémeti le hürüwaali, ábame lanügüni tanagangiñoun belu;13ábame líchuguni kupali wáturugun ligibugiñe Wabureme, ábame ladouragun lugumulelin kupali lau tidáü lubagüsina daradu. Ítara luba mounwen lan Aarón.14Lanügüba giñe murusun lídangiñe lita bágasu ñǘraügili ábame labahichaguni luagun idáü lau lifinga, luéigiñe oubaü le ñéingiñe lubéi láfuacha weyu. Lárigiñe ábame labahichagun hitaü lau lifinga sedü wéiyaasu ligibugiñe idáü,15lárigiñe ábame láfaruni liraüraü gábara keisi adagaragüdüni luagu hafigoun lílana fulasu, ábame lanügüni lita lidoun fulasu le tanagangiñebei belu; ñein múnada, ábame labahichaguni ligibuagu luma ligibugiñe idáü ítara kei ladügüni lau lita bágasu ñǘraügili.16Ítara luba lagidaruni sun iwiyeni le sanduariurugubei, hamabuchahan Ísüraelina luma burí hafigoun. Ligiaméme giñe lunbei ladügüni tun kianpu lánina óundaruni to haganaguaboun luma laganagua hawiye.17—Sun aniha lan Aarón tidan sanduariu lun libihini ferudun luagu burí figóu, darí lumoun láfuridun, moun lumuti ñeinbei lan ni aban tidan kianpu lánina óundaruni. Lárigiñeme ibiha laali lan ferudun luagu lifigoun luma luagu hafigoun liduheñu luma luagu hafigoun Ísüraelina,18ábame láfuridun lun lidin arumadagüdei latarü le ligibugiñebei Wabureme. Lanügame murusun lídangiñe lita bágasu ñǘraügili luma lita liraüraü gábara ábame láhurudaguni luagu liganchun latarü luma geyegua lau,19ábame labahichaguni latarü lau hitaü sedü wéiyaasu lau lifinga. Ítara luba larumadagüdüni lídangiñe hawiye Ísüraelina ani ábame lanúadiruni.20—Danme súnhali larumadagüdünu Aarón sanduariu, kianpu lánina óundaruni luma latarü, ábame lanügagüdüni liraüraü gábara le wínwangilibei,21ábame líchuguni lúhabu lábulugu animaalu ligía, ábame lagufeseruni sun hariban, hamabuchahan luma hafigoun Ísüraelina. Ítara luba líchuguni sun hafigoun lábulugun liraüraü gábara ligía, ábame lanügüni aban gürigia animaalu ligía lun lidin ígiragüdei lidan fulasu mageirawati.22Ítara, lau leferidirun liraüraü gábara ligía, lidan fulasu mageirawati, lanügübei sun hariban lúmagua lidoun fulasu málati.23Lárigiñe ábame lebelurun Aarón tidoun kianpu lánina óundaruni, ábame laragachunu daüguaü linu to buga ladaürüboun, ábame lígirunu ñein.24Ábame lachibagun lungua lau duna ñein guánarügü tidan sanduariu, lárigiñeme lasansirunu ladaüragun, ábame láfuridun lun líchuguni ladagaragüdün, luma le lunbei ladagaragüdüni luagu hafigoun lílana fulasu, ítara luba libihini ferudun luagu lifigoun luma luagu hafigoun lílana fulasu.25Lágudubei lagüle adagaragüdüni luagu figóu ligibuagu latarü;26le bugati gürigia le anügübalin liraüraü gábara lun lígiragüdüni lun Asaséli, ábame lachibunu ladaüragun, chibagua ligíame lungua lau duna, lárigiñeme, gayaraahalime lebelurun tidoun kianpu-agei.27—Bágasu ñǘraügili luma liraüraü gábara ha afarúbaña lun hadagarawagüdün luagu figóu, ha anügǘbaña ita tidoun sanduariu lun libihíniwa ferudun luagu figóu, ábame hanügǘniwa bóugudin tuéi kianpu-agei, ábame lagudún hara, hágürügü luma hádiga.28Gürigia le anügübaliña águda, gasu lachibunu ladaüragun chibagua ligíame lungua, lárigiñe gayaraahalime lebelurun tidoun kianpu-agei.29—Ábanbei lúrudu le hun le lunti sun dan: Gasu hanügüni weyu diisi lidan lisedün hati keisi ayunaruni, gasu hararamuni sun huádigimari lidan weyu ligía dandu Ísüraelina kei terencha ha haganaguabaña.30Lugundun lídanba weyu ligía libihúa ferudun luagu hifigoun ligibugiñe Wabureme, ábame herederun harumañu lídangiñe sun hifigoun.31Aban lúrudu le lunti sun dan le: Weyu ligía, ábanbei weyu wéiriguti hun le lunti emeraaguni luma ayunaruni.32Fádiri le anuadirúaalibei, le unbei lichugúa ubafu lun lárügüdüni lubara lúguchi keisi fádiri, lunti ladügüni échuni lun libihini ferudun luagu figóu, ladaürüboun daüguaü tautu linu to anuadirúaboun33ábame larumadagüdüni fulasu le sándutimabei tuma kianpu lánina óundaruni, luma latarü, ábame libihini ferudun luagu hafigoun fádirigu hama sun lílana fulasu.34—Ábanbei lúrudu le hun le lunti sun dan: Ladügǘba échuni lun libihíniwa ferudun luagu hafigoun Ísüraelina aban wéiyaasu lidan irumu.
Aba ladügǘniwa ítara kei lariñaguni Bungiu lun Moisesi.
Bible Society of Honduras