Alidihatiña19
Aban Lewita tuma lubúali
1Lidan meha dan le úamemegili lubéi urúei Ísüraeli, ñeinñein aban lewita aganóuti luagu lidise-agei luwübüri Éfürain, aba lanügün aban würi Belenna lun lubúalime.2Gama lumoun aba tagañidun luma, aba tagiribudun lúbiñoun túguchi Beléun. Luagu gádürü hati tau ñein,3aba lidin lewita ligía áluahoun lun tagiribudun lun. Barüti aban musu lúmagua hama bián burigü, aba teresibiruni lúbiñe túguchi.4Lau giñe ugundani leresibirei túguchi, aba lamisurahani lun lerederun hama. Aba lerederun lau sun lumusun ǘrüwa weyu hama ñein eiga, ata arumuga,5luagu ligadürün weyu, aba hásaarun binaafingiua lun houdin. Gama lumoun dan aranseña lun houdin, aba lariñagun límedamuru lun:—Houba íbini murusun fein lubaragiñe bidin here báamuga.6Aba hañuurun biángubei hagía eiga, ata, aba lariñagun límedamuru lun lun lerederun ásügüra ábanya áriebu hama.7Aba yebe lásaarun lewita ligía lun lidin, gama lumoun héreti límedamuru luagu, ábagubei lerederun.8Luagu liseingün weyu, aba lásaarun lewita ligía binaafingiua lun lidin, gama lumoun ábaya layumuragun límedamuru lun lun leigin lubaragiñe lidin lun lárügüdagun lungua; aba lubeiti heigin úara darí latarüdün.9Dan lásaarun lewita ligía lun lidin tau sun lubúali luma lumusun, aba lariñagun límedamuru lun luagu tárühali lan, lun lan lerederun ábanya áriebu, ábame lan lidin larugan binaafin.10Gama lumoun máhaali lewita ligía lerederun ábanya áriebu, aba lidin tau lubúali luma lumusun hama biama lilügüniña burigü. Dan le ligibugiñehaaña Hebusu lememe Herusalén,11aba lariñagun lumusun lewita ligía lun:
—Ida liña barihin lun, lun hamuga wásügürüni áriebu ya haburuguterugu Hebusuna?12Lariñaga lewita ligía lun:
—Mídinbadiwa lidoun ni aban uburugu le mama haburugute Ísüraelina. Keimoun darí Gibeá,13ábame wouchun wásügürüni áriebu Gibeá o Ramá.14Aba lubeiti houdin habaruaguóun, dan le larabachunbei weyu, ligía hachülürün Gibeá, haburuguterugu lani Benhamín türibu.15Ábati hadireirun luéi üma, aba hebelurun uburugun Gibeá lun hásügürüni áriebu ñein, aba lidin lewita ligía, aba lañuurun párükerugu, lugundun úati ni aban íchuguti ubaraü houn.16Gúñeeli, ligía lásügürün aban weiriei mutu áraabugiñeeli. Luéigiñeti luwübüri Éfürain weiriei mutu ligía, laganóuña lidan fulasu ligía kei chülüdügüti, ladüga hádangiñetiña lani Benhamín türibu ha aganóubaña Gibeá.17Dan larihinbalin weiriei mutu le éibudügüti le ñun párükerugu aba lariñagun lun:
—Halíagiñe san biabin, haliñounbadibu?18Lariñaga lewita ligía lun:
—Sügüinawaña. Belengiñe le lani Hudá wayabin, wéibuga luagun lidise-agei fulasu luagu luwübüri Éfürain le ñein lubéi naganawa. Belengiñeedina, guentó nagiribuduña núbiñoun, gama lumoun madaritina ni aban íchuguti ubaraü nun ya.19Barütiwa heigin walügüniña, barǘ wagía fein tuma diwéin woungua au tuma númari luma numusun, memegeiruntiwa ni kata.20Lariñaga weiriei mutu ligía lun:
—Madiheribá, narihiba lau sun le bemegeirun. Mígirunbadina lun básügürüni áriebu párükerugu.21Aba lanügüniña lúbiñoun, aba líchugun éigini houn halügüniña burigü sun añaha lan achibei hagudi luma eiga.22Dan le lídanñanu habéi lueirin-agei hagundan, aba hayabin fiu wügüriña salufuritiña ha lílana fulasu aba hegeyedagunu muna, aba háfarahani bena, hariñaga lun tabureme muna:
—Sagabei wügüri le ñeinbei búbiñe woun! Busentiwa wagamariduni.23Aba layumuragun tabureme muna houn, lariñaga houn:
—Madüga huméi lanarime iwiyei le numadagu, lebeluharügüña wügüri le numoun!24Anuhán niráü, ibidiñegiru lun wügüri keisi würi, anuhán giñe lubúali wügüri le. Nasagaraaña hun lun hadügüni le habusenrun hau. Ánheinti lun wügüri le, madüga huméi katei le.25Gama lumoun madügüntiña gasu lau weiriei mutu ligía, aba lubeiti lanügünu lewita ligía lubúali, aba lasagarunu houn, aba hagamaridunu sun wügüriña hagía sun áriebu ligia; darí larugadun ligía hígirunu.26Larugaduña, ligía tagiribudun würi tuguya lúbiñoun weiriei mutu ligía le ñein lubéi túmari, aba tábürühan bénabu hilagubei tuguya.27Dan le lásaarunbei túmari, dan ladaarunbalin bena lun lidin luagu léibugun, aba larihinu lubúali, riwagu bénabu lau túhabu ǘnabugiñe libiti bena.28Ábati lariñagun tun:
—Saraba, keimoun.
Gama lumoun móunabuntu. Ábati líchugunu luagu aban burigü, aba lárügüdün üma lúbiñoun.29Dan lachülürün lúbiñe, aba lanügün aban gusiñu, aba líbaahanu lubúali to hilaaruboun, aba ladügün duusu murusun tau, aba lóunahani duusu murusun ligía lidoun sun hamúan Ísüraelina.30Sun ha arihubalin katei le, hariñaga:
—Lúmagiñe háfuridun Ísüraelina Ehiptugiñe, marihínñahagili libe katei le. Samina humá libügürü! Óundaragua humá ani hariñageime woun kaba lan wadüga!
Bible Society of Honduras