Hosué11
Lagañeiruni Hosué Habín hama sun lánigu
1Dan laganbunbei Habín le lurúeite Asoru luagu hagañeirun Ísüraelina, aba lóundarun lumoun Hobabü lurúeite Madón, luma hama lurúeite Simürón, luma lurúeite Aküsáfü ha lídangiñebaña fulasu le dabíara nóruterugugiñe, hama ha lídangiñetiña fulasu wayati libiti duna Hordán le erederubei luagun lóubadina suru luéigiñe duna Kineretü. Óundarati giñe hamoun urúeigu ha erederubaña lidan fulasu le úabei dabíara ñein; hama ha yarafabaña lun Doru le ñeinhin lubéi lálüda weyu; hama Kananna, ítara hama ha luéigiñebaña láfuachagüle weyu, keisi hama ha luéigiñebaña lálüdagüle, hama Amoruna, Étüna, Féresüna, Hebusuna, ha dabíararuguna luma hama Eweuna luéigiñe wübü Erümón fulasurugu Misüpá.4Aba háfuridun sun urúeigu ha hau hamutuniña, hau saragu gabayu tuma karü lánina wuribu. Gíbetiña hasudaranigu darí lun siñá lan habahüdǘn, kei lagu sagoun laru barana.5Sun hagía aba hóundaragun, aba herederagun lubadu lidunari Meromu lun hábürühan hawagun Ísüraelina.6Lariñaga Wabureme lun Hosué:—Manufudedabá hawéi, haruga kei ítaga oura, náfaraguagüdübaña bun. Báhalaheime hagudi halügüniña gabayu ha lánina wuribu, ábame bágudunu burí hakarün.7Ábati lábürühan Hosué hau lánigu ha wuriburuguna hawagun ibidiñoun houn lubadu lidunari Meromu;8aba lagañeiragüdüniña Wabureme Ísüraelina, ábati hasigiruniña chülǘ óunwenbu uburugu le Sidón luma Misürefótu, luéigiñe oubaü le ñéingiñe lubéi laboucha weyu darí Misüpá. Meredeti ni aban hádangiñe wínwanñu.9Gúnfuli lumuti Hosué le buga lariñagubei Wabureme lun, áhalaha lumuti hagudi halügüniña láganiñu gabayu, gudá lumutu giñe burí hakarün to lánina wuribu.10Lárigiñe, aba lagiribudun, aba lárügüdüni uburugu Asoru, uburugu le héretimabei hádangiñe ha óundaragubaña lun hageindagun luma Hosué, aba láfaruni lurúeite,11hau sun ha aganóubaña ñein. Günringua hamuti sun le ñeinbei sunsuinagubei, aba háguduni uburugu.12Ítarameme giñe ladüga lun líbiri uburugu le gadan lubéi óundaraguni ligía: Aba lárügüdüni, aba láfaraguniña lurúeitegu, aba lagünrinchaguni uburugu sunsuinagubei, kei buga lariñaguni Moisesi lun.13Gama lumoun máguduntiña Ísüraelina ni aban lídangiñe uburugu burí le lábulugubei wübü luéidigia Asoru.14Aba háfaraguniña sun ha aganóubaña lidan uburugu ligía, mígirunga ni aban wínwanñu, aba hanügüniña animaalugu luma burí katei le ñeinbei.
Lagunfuliruni Hosué le lubalinbei Moisesi
15Lun buga Moisesi líchigei Wabureme dimurei, aba líchuguni Moisesi lun Hosué, aba lagunfuliruni Hosué mígirunga ni aban lídangiñe.16Gañei lumuti Hosué sun fulasu ligía, múa le ñein lumuti áraabu, sun Négebü, sun lumúan Gosén, lumúan Hordán le mawübüriti luma fulasu wayati, luma sun áraabu luma fulasu mawübüriti le lani Ísüraeli.17Lúmagiñe wübü Alakü, le luágunbei Seirü, darí Baali-gadü, le lídanbei fulasu mawübüriti lani Líwanu, ǘnabu libiti wübü Erümón, áfaragua lumutiña Hosué sun urúeigu ha ñéinbaña,18lárigiñe lageindagun hama saragu dan.19Gabaón le hani Eweuna ligíarügüñein adüga daradu hama Ísüraelina. Sun le líbiri uburugu, ragǘ hamuti Ísüraelina lau erei,20lugundun adügati Wabureme lun tedererun hanigi háganiñu Ísüraelina, lun hagünrinchaguniña Ísüraelina sunsuinagubei magudemedunga houn kei buga lariñaguni Moisesi houn.21Lidan giñe dan ligía, günringua lumuti Hosué sun haburugute ladügawagun Anakü ha aganóubaña luagu wübü Ebürón, Debirü, Anabü, luma luagu sun luwübüri Hudá luma Ísüraeli,22meredeti lubeiti ni aban hádangiñe ladügawagun Anakü le hígandei lidan sun lumúan Ísüraeli. Uburugurügüñein Gasa, Gatü luma Asüdódu, heredera ladügawagun Anakü.23Gañei lumuti lubeiti Hosué sun múa ligía, kei meha lariñaguni Wabureme lun Moisesi. Lárigiñe, aba lafanreinhani hadan lani Ísüraeli türibu, lun halaganteme. Lárigiñe sun katei le, ñeinñein darangilaü fulasurugu.Bible Society of Honduras