Hoeli1
Hagadeiruni chagagaru alubahani
1Anihán uganu le líchugubei Wabureme lun Hoeli, le liráü Petueli:2Aganba huméi katei le buidu huguya ábutigu huma sun huguya lílana fulasu. Arihañahaadün katei ítaraburiti? Arihúati meha katei ítaraburiti hadaaniwagu hagübürigu?3Abahüdagua huméi houn hisaanigu, habahüdagueime hisaanigu houn hasaanigu, habahüdagueime hasaanigu houn ha águrahoutiña hárigiñe.4Hou hamá chagagaru súngubei. Le hígirubei furumiñetiña, aba hayabin amu aba héigini.5Huguya bacharuatiña, agagudúa humá! Hayahuaha, huguya gátaatiña diwéin, lugundun íbini diwéin tagidarúba huéi!6Lugundun beluhaña chagagaru nageiroun kei súdaragu gíbetiña, ha héretiña, ítara liña hari kei hari liñún.7Günringua hamá wanadürigu beibei tuma wanadürigu igu, hiyá hamá le gumuti darí lerederun tilimun haruñu.8Ítara kei adari to ayahuboun, amuisera tuguya lárigi tadari,9ítara liña hayahun fádirigu ladüga úaaru ilaü ni diwéin ténpulurugu lun idewesei lun Wabureme.10Úaali ni kata lidan burí ichari; lamuiseruña múa. Féridiha türigu, mábeiha beibei-agei saüha giñe oliwu.11Huguya le nadagimeinbei áraabu luma beibei-ágeirugu, hayahua lau íruni, ladüga féridiha bunaguaü luma lalubahóun türigu luma sebada.12Mábeiha beibei-agei, féridiha tídibu burí igu, Mábeiha burí giñe güranáda, tídibu yaraüwa, mansanu luma sun tídibu wewe le áraabubei. Féridiha hagundan sun gürigia!13Huguya fádirigu, daü humá daüguaü súsutu, hayahuaha lau igarigu, ladüga úaali ilaü litenpulunrugu Hubungiute ni diwéin lun idewesei.14Wáhuma hawagu lílana fulasu, ayunara huguyame; óundaragua humaña wéiyaaña mutu hama sun ha aganóubaña fulasurugu litenpulunrugu Wabureme, ábame hafurieidun lun Wabureme.15Yarafaali luéyuri Wabureme! Weyu hanarimeti le barüinabei günringuaü woun! Luéigiñe lóubadina Suntigabafu.16Gidawati weigin wawéi aríagu wagía lun, gumuha ugundani litenpulunrugu Wabungiute.17Ñalá ilaü, féridiha türigu, günringua muna to lagei ilaü.18Hamuuhaña bágasu! Háluahadügüña yebe sagadi; hóunweguña mudún.19Ayumuraguatina bun, Wabureme, ladüga gudala watu gemeti sagadi le fulasurugubei mageirawati luma burí tídibu wewe le áraabubei!20Íbini animaalugu áraabuna ayumuraguatiña bun, lugundun mábeiha burí lísensen duna ani láguduñein watu gemeti sagadi!Bible Society of Honduras