Hobu7
1Ítara liña habagari gürigia ya ubouagu, kei libagari aban súdara le agunfuliruti lau luadigimari,2kéigubeirügü aban idamuni le ayumahati lamuñounga, kei aban nadagimeinti le memenibei lanigi lafayeirún.3Ítara liña nawinwandun lidan magundani saragu dan, luma idiheri sagü áriebu.4Dan le narounrun, laganóun nun kamá hamuga magumuhali áriebu; agarabaagúdügüniña darí larugadun, nariñagati núnguarügü: «Ídaba san násaara?»5Añahein héweraü luagu sun núgubu gáraguati guméi le burí luágubei nura.6Layarafaduña nidaani lun nounwen, memenigiga, ítara kei lufuresen luadigimari máhina le tadaaguagüle gamisa.7Haritaguabá Bungiu, luagu ítara liña lan nibagari kei aban awaraguni, ani luagu magundaarundigiaadina lan.8Marihindigia láadiname ni aban; bíchugubei barihin nuagun, ábame nagumuchagun.9Ítara haña ha ararirubaña lidoun hamúaha kei dúeri le ásügürübei ani gumugua ligía, máfuridunhaña ñéingiñe, marihin hamaaña haduheñu.11Ligía siñá lubéi nerederun maniñu. Nariñagaali sun le mégeibei nun lidan nigarigu luma nasufurirun.12Aban funagia lanarime animaalu baranahana au bóunigirunbalina ítara?13Dan le naritagun luagu nadariruba lan emeraaguni gabanarugu, ani nawalidaguba lan lidan narumugun;14aba banufudedagüdünina narumugunrugu; aba balouchagüdünina lau luriban uénedü!15Buítimati hamuga lun bátigirunina; ladüga himei numuti óunweni sügǘ lau ibagari le.16Siñá nun, mabusenrunhadina nasigirun abagarida. Ígirabana nungua, lugundun ítara liña nibagari kei aban awaraguni.17Kátañanu san gürigia bíchugunbei saragu ibereseni hau? Ka san uagu badiherida hawagu?18Ka uagu baríaahaña sagü weyu, ani ru baña lidoun óuchawaguni danmeme?19Ka uagu magida bubalin barihin nuéi, aba hamuga bígirunina lunraü náhuluchuni narüre?20Kagia wuribati nadügübei bun lau nafigouhan, buguya le hóuniri gürigia? Ka uagu nuagun lubéi bariha lun bachüürünu bigimaran? Aban funagia ihürü au bun?21Siñati funagia feruduna bani nifigoun? Siñati funagia ferudunabani wuribati le nadügübei? Málühadina ánhana riwagua lidan múa; báluahabadina gama lumoun úaadiname.
Bible Society of Honduras