Hobu5
1Wáguaba, Hobu, ariha báamuga anhein ñeinbei lubéi óunabutibu. Kábagia ánheli umoun bidin?2Libidiounigan aau lerederúniwa lidan idiheri, barǘ lumutiña luriban ichügü gürigia lidoun óunweni.3Arihaadina hagumeserun gürigia ibidiougua tau awansera lidan habagari, gama lumoun málüti anhoun günrinwagua haban.4Úatiña kaba lan íderaguaña lirahüñü; wuribati houserúniwa ligibugiñe lúrudu, ani úati kaba lan ageindagua haweigiñe.5Hou hamuti lamatiña le halubahabei, sagá hamuti labadinaguagiñe hiiyu, agimugaha hamuti giñe ha mágürabubaña harisin.6Mama ságounrugugiñe láhücha wuribani mama giñe múarugugiñe laboucha mabunuruni:7Gürigia guánarügü adügübalin lumabunurun, ítara kei lídangiñe lan watu gemeti láfurida life life igemeri.8Au hamuga buéi, aba hamuga nagiribudun lun Bungiu, lun níchuguni nikesin lúhaburugun;9adügati saragu ani óunwenbu burí katei buiti, katei burí le úati ni aban gayara lumuti gunfuranda!10Óunaha lumuti huya luagun múa lun láturaguni áraabu;11Iñuragua lumutiña ha ǘnabugubaña, ru ligía achoururuni houn ha nidiheribaña;12Günringua lumuti haransehan ha bíbubaña ani aba leferidiragüdüniña.13Ábürügüda lumutiña ha bíbubaña lidoun habibun guánarügü, adüga ligía lun masali lan wuribati le habusenrubei hadügün:14Wéyuagudügü, bugubuguñaha haña, darugu luburiga hau, kamá hamuga áriebuhaali!15Sefu lumutiña Bungiu ha gudemebaña hama ha súfuribaña luéi habafu wuribatiña;16ligía hemeniginbei ha débilibaña, darú lumuti hayuma ha wuribabaña!17Fuleseiwatiña gürigia ha labeichubaña Bungiu; mamaharabá lubeiti lun ladeinhan Suntigabafu.18Anhein adüga Bungiu aban biti, lagüragubei giñe; anhein agayuaha lau lúhabu, lagaranihaba giñe.19Lesefurubadibu saragu wéiyaasu lídangiñe denchaü, mígirunbei lun lachülürün wuribani bumoun.20Lesefurubadibu luéi óunweni lidan lidaani ilamaü, lesefurubadibu tuéi eféin lidan lidaani wuribu.21Lóunigirubadibu tuéi iñeñein wuribatu, ani manufudebadibu danme lachülürün günringuaü.22Béherahaba lidan lidaani ilamaü luma gudemei, ani manufudebadibu hawéi animaalugu áraabuna.23Meberesehanbei dübü bicharirugu, ani bumadagubaña animaalu gáñitiña.24Ñeinbei awanseruni búbiñe, danme babahüdüniña bibiñanigu, memegeirúnbaña hádangiñe.25Gíbebaña badügawagun kei sagadi áraabu.26Baweiyaduba, gama lumoun meferidirun bubéi bere, kei aban güraguati ílewei le funaali.27Ítara liña larufudahani ibagari woun. Ligía inarünibei, hóuchaguabei lubeiti bungua.
Bible Society of Honduras