Hobu37
1Dan narihini liñawan dan, ádühatu nanigi kamá hamuga táfurida naniguagugiñe.2Aganba huméi lamuri lumalali Bungiu, lanarime umalali le áfuridubei liyumulugugiñe.3Ígiragüdati Bungiu labirihaniga lidan sun sielu luma lúmagiñe aban lígirugu ubóu lumoun le aban.4Lárigiñe aba laganbúniwa aban wayuhuru dan le laganbagüdüni lumalali le wéirigubei; sunti aniha lan wayuhuru adürüha, meredeti labirihaniga.5Dan le laganbagüdüni Bungiu ladürürühan lumalali, arihúati burí katei wéiriguti, susereti burí katei wéinamuburiti le lásiñarun ni aban gunfuranda,6ariñagati lun niewe lun lábürühan luagun múa áhuyagüdalei huya lau anarimeni.7Adügati lun herederun gürigia hábiñe, subudi hamaamugei súngubei luagu ligía lan nadagimeinbei.8Belutiña animaalugu lidoun haramudaguagüle, aba herederun aramudaguñu ñein.9Ñǘbuinti herigini luéigiñe suru, luma lidiliga luéigiñe nórute.10Lau láfurun Bungiu lasaliragua yelu, deregua ligía burí duna wéinamuti.11Buíngüda lumuti dúeri lau lidüdüga adüga ligía lun lasaliragun labirihaniga lídangiñe;12aba léibugun labirihaniga egeyeheina sielu, agunfulirei lererun Bungiu ítara ligibuagu sun ubóu.13Luéigiñe sun lira lárügüda Bungiu lun labeichuni ubóu, o lun lan larufuduni lareini.14Hobu, gaguraasunbá aganbabá, saminabá luagu burí katei garíawaseti le ladügübei Bungiu.15Subudi bumuti san ida liña lan laransehani Bungiu sun le, luma ida liña lan lámirihan labirihaniga dúerirugu?16Subudi bumuti ida liña lan láfayarun dúeri garabalirugu, lueirin óuchawaguni le arufudubalin lichú lau sunsuinagubei?17Sanditibu óunwenbu lárouga tidan badaüragun dan le láfuhan garabali luéigiñe suru luagun ubóu.18Gayaraati funagia bíderaguni Bungiu achawaraguei sielu lun lerederun deregüdañu kei aban fulansu lauti gürabu?19Arufudahabá woun ka lan lunbei wariñaguni lun Bungiu, lugundun siñati wasaminarun lau lufurangun.20Au, mariñagungubeitina hamuga lun luagu busén nan nadimurehan, lugundun lau lira kéigubeirügü hamuga náluahaña lan lagünrinchagunina.21Hénrenguti larihíniwa laruni weyu dan le darugu liña lan dúeri lau; gama lumoun anhein áfura garabali, aba larumadun sielu.22Saliguati larugounga kamá lámirihan golu áfuachubei luéigiñe nórute, dan le legeyedagun luéirigun Bungiu lau.23Siñati gunfuranda wamani Suntigabafu, lugundun wéiriti lere luma lúaragun; suruti ani masufuriragüdünti ni aban.24Ligía linebenbei houn sun gürigia, ni kata chútiña aau lun.
Bible Society of Honduras