Hobu30
1Gama lumoun guentó, éherahatiña ha nibureingiñatima nuéi nau. Mebegitiña hagübürigu, míchugun nubaña hamuga ni lun herederun hama ounli ha óunigirubaliña nilügüniña mudún.2Kámeñein hamuga san lere harüna numa? Ladüga gürigia meha méreeña hagía,3lárigi ilamaü luma asufuriruni. Gásuha heigin ílagülei sáühali áriebu lidan límanin fulasu mageirawati,4áhulahatiña híduru gífiti ábaha heigin ílagülei le meigúaditi,5gürigia mabusenrúnwatiña hagía fulasurugu éibaahouatiña agúarahoueina hárigi kei híwerutiña;6gasu meha haganóun lidan lagadábugiñe dübü luma lidan gudungu labadinagua dübü,7áwouhatiña meha lidan híduru-agei labadinagua búbugati.8Gürigia ha úati hu hamá, gürigia magübürigutiña, madünatiña lun haganóun fulasurugu.9Gama lumoun guentó, adaaguatiña bula nau. Abahüdagua hagía úraga lánina éherahani nau.10Aba hadisedun nuéi lau iyereehabúni, darí lun hásueragun nigibuagun.11Guentó lau ǘnabuguhadina lan, minebenhadina houn.12Yarafatiña saragu hádangiñe nubadun, fui hamutina, ábürühatiña nuagun, hóuchatiña yebe háfarunina hilagubei.13Darú hamuti üma nuéi lun hagünrinchagunina, ani úati erederutiña.14Ábürühatiña nuagun lau anarimeni lídangiñe aban hunrenti luagu baríeiru.15Ábürühaali lanarime anufudei nuagun; ñǘdünha ninebese keisi garabali; ñǘdünha lubuidun nidaani keisi aban dúeri.16Mabusenrunhadina nabagaridun; buinha idiheri nidan.17Chülüha gáriti dagá lumoun nabu; mígirun lumutina lun nemeraagun sun áriebu.18Ragǘ laadina Bungiu luéigiñe nigiina lau anarimeni, darí lun laheiridagunu nadaüragun.19Chü laadina lidoun baribarabu, kamá hamuga sagoun odi baligi lan au.20Bungiu, amuriahatina buma lun bíderagunina, ani móunabun bumutina, ayumuraguatina bun, meberesentibu nau.21Súfurigüda báadina saragu, ani éibaaha bumutina lau sun bubafu.22Barügüda bumutina lun garabali, hingigüda bumutina lun luriban dan.23Subudi naali luagu busén ban banügünina lidoun óunweni lidoun hasinun sun wínwantiña.24Míderagun nágiña funagia gudemetiña, sefunáña lídangiñe hagudemen?25Ma funagia ayahuahaadina hawagu ha asufurirubaña, gudemehabu au houn ha mégeihabubaña?26Agurabatina yebe lubuidun dan, ábarüga liabin luriban dan nun; aguraba numuti yebe larugounga, aba liabin luburiga.27Hanarimeti lueirin tádühan nanigi; luéyurirügüñein idiheri agurabana.28Barütina aban ibagari híruti, úouga ligemeri weyu lidan; amuriahatina ídemuei hagibugiñe súngubei.29Henegeedina hábirigu ounli áraabuna, hamada dunuru wéinamutiña ha awesüturusu.30Wuriha nura, süti núgubu ladüga abiruaü.31Ítara liña tamuri árüpa tuma fidu nun keisi ayahuni lánina igarigu.
Bible Society of Honduras