Hobu29
1Ábadügü hamuga lagiribudun dan burí meha lügüra dan meha le góunigi lágidina Bungiu.3Dan meha le larugoungadagüdün nau lau ligemeri, ani gayaraati meha néibugun lidan luburiga;4dan meha le buinlugidina lau ibagari ani góunigi lumutu meha Bungiu nuban;5dan meha nóubagiñeñein lan Suntigabafu, ani añaha meha nisaanigu numa;6dan meha léibaagun míligi múarugu, ábürüha ligía garaba luéigiñe dübü;7dan le meha nañuurun lidan hóundaragun lílana uburugu.8Harihininaha nibureingiña aba hadireirun, harihinina wéiyaaña mutu aba hararamun.9Íbiniha wügüriña ha wéirigutiña rédeiti hadimurehan, aba híchugun seini houn híbiri lun hámanichun.10Ha gumadimatiña, ábaha hámaru lan hadimurehan. Ábaha tabadülerun hañeñe luagu hasielun.11Dan le meha haganbun gürigia nadimurehan odi harihinina lan, ábaha hóuburunina lau ugundani adimureha hagía buidu nuagu,12ladüga íderagua numutiñaha méteñuhaña hama gudemetiña, gürigia meha ha míderawagunbaña.13Ha meha lídantiña günringuaü, rútiña eteingiruni nun; lebuina meha ugundani, íderawaguni le níchugun houn würiña hilaaña úmari.14Nanügüni meha richaguaü luma laruman igaburi keisi aban katei le nídangiñememeti; ligía aubei nadaüragua sagü weyu.15Au meha lágubei marihinti, lugudi méibugunti,16háguchi ha mégeihabubaña, le ageindagubei haweigiñe terencha!17Bougua numuti meha háribugu wuribatiña, lun nagidaruni háliru hayumulugugiñe.18Saminatina yebe núnguarügü: «Gíbebei dan nabagaridun kei liibe sagoun laru beya; danme wéiyaadina saragu ligíame nounwen núbiñe guánarügü.19Ítara niña meha kei aban tídibu wewe le láruti duna labunúa le uágunti ilimun ladagara serenu le lánina guñoun.20Leseridaguba ninebese numa, magumuchunbei nere».21Aganba hamutina meha sun gürigia aba herederun maniñu agurabei neweridihan.22Lárigiñe nadimurehan, úati ni aban ariñaguti ni kata, ábürühati nererun hawagun kei duna édedeharügüti,23ani hagía, aguraba hamutiha kei lagurabahóun huya lidan lidaani lárouga.24Dan le náhayachun hawagun, darí lun lougua lan hafiñen, aba haríaguni lugundan nigibu.25Gabafutina meha hawagu, aba meha nariñaguni le lunbei hadügüni houn, keisi aban urúei hagibugiñe lisudaranigu. Dan meha le hiru hamá rútina gurasu houn.
Bible Society of Honduras