Heremíasi43
Lanügǘn Heremíasi lun Ehiptun
1Dan lásurunbei lasubudiragüdüni Heremíasi le lariñagubei Aburemei le Lubungiute lun lun lariñaguni houn lílana fulasu,2aba lariñagun Asaríasi le liráü Osiasi, Hoanán le liráü Karéa hama amu burí wügüriña ha barüguatiña houngua lun Heremíasi:—Biyeeni le bariñagubei! Mariñagunti Aburemei le Wabungiute bun lun bariñagun woun lun midin wamá aganawa Ehiptu.3Baruku le liráü Neríasi ádahabalibu kóntüra wagía lun wábürühan labun habafu Kalüdéana, lun háfaraguniwa o lun lan hanügüniwa Babilónioun.4Ni lubeiti Hoanán, ni hábutigu milidaru ni lílana fulasu meredetiña lumúanrugu Hudá, madügün hamuti le lubeibei Aburemei.5Ábarüga lóundaraguniña Hoanán hama hábutigu milidaru fiu gürigia ha erederubaña hádangiñe lánigu Hudá, ha agiribudubaña Hudáun lárigi herederun anuraha lidan ámuñegueinarügü ageiraü:6Wügüriña, würiña, irahüñü hama lirahüñü urúei würiña hama sun gürigia ha buga lígirubaña Nebusaradán lábugiñe laríaahan Gedalíasi, lau sun Heremíasi luma Baruku.7Madügünga gasu lau le lubeibei Aburemei, aba houdin sun hagía Ehiptun, aba hachülürün uburugun Táfünesi.8Aba ladimurehan Aburemei lun Heremíasi uburugu Táfünesi, lariñaga lun:9—Barüba fiu dübü wéinamuti, ábame baramuduni labadinagua ladiríyu le aubei lafulouhoua tebelaagüle luban urúei Ehiptuna, hagibugiñe sun lílana Hudá.10Bariñagame houn: “Lariñahare Aburemei Suntigabafu le Lubungiute Ísüraeli: Nadügüba lun liabin nubúein Nabukodonosoru le lurúeite Babilónia, ábame níchuguni lálana larúeihan tuma likianpun ligibuagu dübü le nábunubei ya.11Liábinba, ábame lagünrinchaguni Ehiptu. Ha lúnbaña hóunwegun, hóunweguba, ha lúnbaña hanügǘniwa bóugudin luéi hageira hanügǘba, ha lúnbaña hóunwegun wuriburugu, hóunweguba wuriburugu.12Láguduboun burí hatenpulun lubungiutegu Ehiptu, gudá láñame búngiugu o lanügüniña lan keisi adaürǘtiña. Larumadagüdübei Ehiptu kei lagidahan hóuniri mudún hayaba tuéigiñe ladaüragun, lárigiñeme ábame lidin úouga erederuti.13Lagünrinchagubei liyawa burí Eliopolisi le Ehiptubei, ábame lágudunu hatenpulun lubungiutegu Ehiptu”.
Bible Society of Honduras