Heremíasi42
Lamuriahan ubóu luma Heremíasi lun lafurieidun hawagu
1Aba hayabin sun hábutigu milidaru lau sun Hoanán le liráü Karéa, Asaríasi le liráü Osaíasi, hama sun gürigia, ñǘbürigiña hama wéinamuhaña, aba hayabin2lumoun profeta Heremíasi, aba hariñagun lun:—Wamuriaha aban katei buma, mamaharabátia badügüni woun: Bayumuragua lun Aburemei le Bubungiute wawagu, wagía fiu ha erederubaña. Gíbetiwa meha, gama lumoun guentó, fiúrügaadiwa kei barihiniwa.3Bayumuragua lun Aburemei le Bubungiute lun larufuduni üma le lunbei wafalaruni woun luma katei le lunbei wadügüni.4Lariñaga Heremíasi houn:
—Buiti, nayumuraguba lun Aburemei le Hubungiute huagu, kei hamuriahani numa, ábame nasubudiragüdüni sun le lóunabagüle nun hun, maramudunga ni kata huéi.5Ábati hariñagun lun Heremíasi:
—Aburemei le Bubungiute, ligíaba gefenti úaraguati kóntüra wagía anhein madügün wamá le lariñagun bun lun bariñaguni woun lun wadügüni.6Gunda wagía yebe magundan lau lóunabagüle, wadügübei le lubeibei Aburemei le Wabungiute, le úmounbei wóunahabu álügüdaha, lun buídubei lan lidin woun.
Lóunabuni Wabureme lafurieidun Heremíasi
7Diisi weyu lárigiñe, aba ladimurehan Aburemei lun Heremíasi,8aba lagúarun Heremíasi lun Hoanán, le liráü Karéa, luma houn hábutigu milidaru ha úarabaña luma, houn sun gürigia, lúmagiñe le ñǘraütimagilibei dagá lumoun le wéiyaalibei,9lariñaga houn:—Lariñahare Aburemei le Lubungiute Ísüraeli, le úmounbei hóunahana lun nayumuragun huagu:10“Anhein busén hubéi lun herederun lidan fulasu le, nawanseragüdübadün, magünrinchagun nubadün, bunaguarügü nubadün máhulaagun nubadün, ladüga hǘrühali nun nóunahani wuribani le huagun.11Manufudeda humá luéi lurúeite Babilónia, le ueibei weiri lan hanufude. Manufudeda humá luéi, ladüga anahein huma lun nasalbarunün luma lun nesefurunün luéi lubafu. Au, le Aburemei ariñagubalin.12Gudemehabubadina hun, ani nadügüba lun giñe gudemehabu lan hun lun lígirun lun hagiribudun hageiroun”.13—Gama lumoun anhein mabusenrun hubéi herederun lidan ageiraü le ani aba maganbadi humá lun Hubungiute lun14hariñagunya: “Himei wamuti woudin aganawa Ehiptu le ñeinba lubéi marihin wamá wuribu, maganbun wameime tumalali fidu, móunwegun wagíame walama”,15aganba huméi lubeiti le lariñagubei Aburemei Suntigabafu, huguya le erederubei hádangiñe lánigu Hudá: “Anhaün ítarameme abusenra hidin aganawa Ehiptu,16lárügüdübadün wuribu luma ilamaü le ueibei hanufudeda ñein, ábame hóunwegun ñein.17Sun ha lúnbaña houdin aganawa Ehiptu, hóunweguba ñein ladüga wuribu, ilamaü o sandi úabei ni aban erederuti wínwanñu, mesefubei ni aban luéi lamiselu le lunbei nóunahani”.18—Lariñahare Aburemei Suntigabafu, le Lubungiute Ísüraeli: “Ítara kei nagañidun hama lílana Herusalén, ítara luba giñe nagañidun huma, anhaün ñüdün Ehiptun. Ábanbadün hénpulu lánina íñarawaguni, aban katei le hanufunati, marihindigia humaalime fulasu le”.19Huguya le erederubei hádangiñe lánigu Hudá, lariñaguña Aburemei hun, lun midin humá Ehiptu. Subudi humeitia, neweridiruñadün guentó.20Adügatün aban bulíeiguaü wéiriti, ladüga huguya guánarügü ariñagubei nun lun nayumuragun lun Aburemei le Hubungiute huagu, lun nasubudiragüdüni lóunabagüle hun, lun hadügüni le lubeibei.21Subudigüda naali le lariñagubei Aburemei le Hubungiute hun uguñe, gama lumoun máhatün hadügüni le lubeibei.22Subudi huméi lubeiti buidu luagu hóunweguba lan lidan ageiraü le ñeinhin lubéi habusenra hidin ladüga wuribu, ilamaü luma sandi.
Bible Society of Honduras