Isaíasi41
Füramase lani Wabungiute lesefurun Ísüraeli
1«Maní humá nigibugiñe huguya ha aganóutiña ubouhu, ragǘ humá anigi néchanigu, higougu, ayanuha wamaamuga libügürü katei le; wóundaragua lun wayanuhan luagu.2«Ka achülaaguagüdübalin urúei le súnwandanbei lagañeirun luéigiñe oubaü le ñéingiñe lubéi laboucha weyu? Ka ederegerubaliña néchanigu lun, adüga ligía lun hǘnabudun urúeigu ligibugiñe, lun lǘnhürüniña tau lefeinte luma tau ligimaran, chagagualaña kei sagadi sáühali?3Ka adügübei lun léibaahaniña, lun lawanserun darangilu kamá hamuga madagati lugudi múarugu?4Kagia adügübalin wadagimanu le? Ka agúarubei houn gürigia lúmagiñe lagumeserun? Au adügübalin, au le Aburemei, Bungiu le ábanrügüti, le furumiñeti ani lagumuhóun».5Ariha hamuti lílana ubouhu aba habuinchun lau anufudei; aba lánhingichun ubóu lúmagiñe aba lígirugu lumoun le aban, hayarafaduña, añatén.6Kada gadiñeti íderagua lumuti lupaaná ru ligía gurasu lun.7Le adaagubei guáriua ruti gurasu lun awadigimariduti golu; le ádaragubei lau marüdiyu ruti gurasu lun le ádühabei gürabu, aba lariñaguni anhein buidu lubéi wadagimanu, lárigiñe aba ládaraguni guáriua lau gürabu lun mánhingichun lan.8«Aganbabána Ísüraeli, lílana Hakobu, eseriwiduti nun le nanúadirubei, gürigia ladügawagun numada Abüraámü.9Au asagarubalibu lígirugugiñe ubóu, au agúarubei bun lídangiñe lidise-agei larigeirugu ubóu, aba nariñagun bun: “Eseriwiduti nun buguya” au anúadirubalibu, mígirun nágidibu.10Manufudedabá, ladüga anahein buma; manufudedabá au Bubungiutebei. Rútina erei bun, íderagua numutibu, ágüdaha numutibu lau núhabu le gagañeiradibei.11Sun ha iyereehabúbaña bun, hanügüba busiganu, ǘnabugu hagíame; hagumuchuba ha ageindagubaña buma.12Báluahabaña báganiñu, madaribubaña; ha awuribuhabaña buma, kamaame úatiña ubouagu.13Lugundun au le Bubungiute, ragǘ naali búhabu; ani ariñagaadina bun: “Manufudedabá, íderagua numutibu” ».14Ariñagati Bungiu: Manufudedabá Ísüraeli; lau sun biñüraü luma buánima íderagua numutibu. Au le Lubungiute Ísüraeli le Sándubei, au besefuragülebei.15Nadügübadibu ábanme éfereegülei iseri lau ari héreti; béferehabei burí wübü, badügübei kalikime, badügübei burí dabíara sagadime sáühali.16Bachagarubei ábame lanügüni garabali; lachagaragubei herigini. Ábameti bagundaaragun lau Bungiu, pántabadibu lau Bungiu le Sándubei Lubungiute Ísüraeli.17«Áluahatiña gürigia gudemetiña duna, madaritiña. Mábeiha hañeñe ladüga hamagürabu; gama lumoun au, le Aburemei, neteniruba houn, mígirun nubaña au le Lubungiute Ísüraeli.18Nasaliraguagüdüba duna luagu burí wübü le ñein lumuti málouga lan luma lísensen duna labadinagua fulasu wayati; nadügübei fulasu mageirawati lagunume nasaliraguagüdüba lirahüñü duna éibaaguati lidan fulasu mábeiti.19Nábunaguba hibúari lidan fulasu mageirawati, akasia, arayán luma oliwu; náhüchagüdüba lídibu gudi lidan múa mábeiti luma abetu luma sipürési,20Lun harihin sun gürigia, subudi hagíame, gunfuranda hamaamuga luagu au lan le Aburemei adügübalin le lau nubafu, luagu au lan le Aburemei sánduti, le Lubungiute Ísüraeli adügübalin».21Lariñahare Bungiu le lurúeite Ísüraeli: «Higougu guáriuagu hageindagua huéigiñegua.22Higougu hariñagei le lunbei lasuseredun woun luma ariñagei le sügühalibei, ábame waganbunün; ariñaga huméi katei le burí lunbei liabin woun, ariha wamaamugei kaba lan idan lagumucha;23ariñaga huméi woun kaba lan asusereda lárigiñe, arufuda huméi woun luagu búngiugu humá le tímatimaati. Adüga huméi le hiyaraati, buiti wuribati, somu katei le íchuguti anufudei woun.24Gama lumoun ni kata huguya ani siñati hadügün ni kata! Íñarawaguati le anúadahabalün.25«Saliguagüdatina aban wügüri luéigiñe oubaü le ñéingiñe lubéi laboucha weyu; wáhadina lun lau liri, anitén luéigiñe nuru. Dügügua lumutiña gumadimatiña kei ladügürawagun múa; kei dan le lañoundaguni nadagimeinti múa lau lugudi.26Ka íchugubei uganu luagu le lúmagiñe lagumeserun lun wasubudirubei lan? Ka ariñagubei lúmagiñe binarü luagu lasusereduba lan, lun wánharuba lan luagu richá lan? Míchugun lumuti ni aban hídangiñe uganu úati ni aban aganbuti hariñagun ni aban dimurei.27Au ariñagubalin lun Sión lúmagiñe lagumeserun, au óunahabei aban nóunagüle Herusalén lun lariñagun luagu málühaña lan lílana ánhaña giribu.28Marihintina lachülaagun ni aban hádangiñe ha híbiri búngiugu; ni aban le gayaraati leweridihan, ni aban le óunabuti nálügüdahan.29Ni kata sun hagía! Siñati hadügün ni kata; búngiugu málatiña hagía.Bible Society of Honduras