Isaíasi40
Lámalihani Wabureme Herusalén
1Ítara liña lariñagun Wabungiute: «Ámaliha humaña numutuniña;2hadimureha tidoun lanigi Herusalén, ariñaga humá lun luagu mámaali lan idamuni, luagu fáyeihali lan luagu lidurun, luagu resibihali lan dóbuli núhaburugugiñe luagu lifigoun».3Aganbúati aban umalali, lidan fulasu mageirawati, lariñaga: «Aranse humá aban üma lubá Aburemei lidan fulasu mageirawati, adüga humá aban émeri lubá Wabungiute lidan fulasu mabuidunti.4Achagaha huméi sun fulasu wayati, rarigüda huméi sun wübü luma liñun-agei fulasu; úaraguagüda huméi fulasu le múaranbei, surugüda humeime fulasu le segebei.5Ábameti larufuduni Aburemei luéirigun, ábame harihini sun gürigia. Aburemei guánarügü ariñagubalin».6Lariñaga aban umalali: «Wáguaba», nariñaga: «Kábagia nagúaragua?» Luagu ítara haña lan sun gürigia kei híduru, liabin here kei aban fuluri áraabuna.7Aba lásaürün híduru, aban lounwen fuluri dan le láfurun Aburemei luagun. Lidan linarün katei, ítara haña gürigia kei híduru.8Saüti híduru, hilá ligía fuluri, ánheinti Lererun Wabureme rédeiti lun súnwandan.9Múdeiba Sión lábulugun aban wübü, iñurabéi bumalali here lun bíchugun aban uganu buiti. Iñurabéi bumala manufudeuga, Herusalén, ariñagabá lun burí luburugute Hudá: «Anihán Hubungiute!»10Anitebei Aburemei lau óunwenbu ubafu, lun líchuguni sun katei kei labusenruni lau lere larüna. Añatebaña lumutuniña luma lárigiñe lesefuruniña.11Liabin kei aban hóuniri mudún le óunigirutiña lánigu; budá lumutiña harahüñü mudún larünarugu, aba lanügüniña laniguagu teni ligía houn ha sun líñabei hemeilihóun.Luéirigun Lubungiute Ísüraeli
12Ka amisurahabalin barana lau lurageirugu lúhabu? Ka abahüdübalin lidabuberen sielu lau lifinga lúhabu? Ka amisurahabalin sun kaliki le múarugubei? Ka amisurahabalin wübü luma burí áraabu lidan aban balansu?13Ka eweridihabalin Aburemei, odi ka arufudahabei lun?14Ka íchugubei eweridihani luma gunfurandaü lun? Ka arufudahabei lun, lun laguseragüdün lau úarani? Ka arufudahabei subudi lun? Ka íchugubei arufudahani luáguti lichú aau lun?15Ítara haña gürigia lun kei aban lédederun duna, kei aban lagu kaliki lidan balansu; ítara liña ageiraü burí le baranahabei lun kei aban lagu sagoun.16Lóuguatiña sun animaalugu ha Líwanurugubaña lun ladügǘn aban adagaragüdüni gudawarügüti lun, lougua watu le ñeinbei lun watu gemeti.17Ni kata sun néchanigu ligibugiñe Aburemei; mebegitiña ni murusun ligibugiñe.18Kaba umoun harihei lúaragun Wabungiute? Kaba au iyawaü harufudei?19Adügati aban gadiñeti aban guáriua, aba lafuraruni aban gawadigimaridaditi golu lau golu ru ligía iñari lauti pülata luagu.20Le adügüti aban guáriua, anúadahati wewe le lunbei mañaladun lan, áluga ligía aban buiti gadiñeti lun lederebudagüdüni lun méiguadun lan.21Ibidiñeñahati funagia hun? Maganbunñahagidün funagia lariñawagún? Mabahüdawagunti funagia hun lúmagiñe furumiñeti dan? Úagili funagia gunfuranda humani lúmagiñe ladügǘn ubóu?22Ligibuaguñein ubóu lala Wabungiute le lálana larúeihan, larihiniña gürigia ñéingiñe kamá hamuga chagagaru. Tulé lumuti sielu kamá hamuga aban fubulíña, tulegua lumuti kei aban kianpu.23Adüga lumutiña gürigia wéirigutiña ni kátame, gumuguagüdalaña ábutigu ubouagu.24Ítara haña kei nadü ñǘbürigili le sun liña labunún, le lagumeseruña lílagüle árügüda múarugu. Anhein áfura Bungiu hawagun, aba hásaürün, aba lanügüniña herigini kei sagadi sáühali.25Lariñahare Bungiu le sándubei: Kaba uma hóuchaguana? Ka gayaraabei ítara lan kei au?26Iñura huméi hagu sielun, ariha huméi, Kagia adügübalin sun le? Le afanreinhabarun aban aban, wa ligía houn súngubei lau hiri. Wéiriti lubafu luma lere, memegeirunti ni aban hádangiñe.27Ísüraeli, luburugute Hakobu, ka uagu bamumeha? Ka uagu bariñaga: «Mefenti Aburemei luagu gádantina; meberesenti Bungiu nau?»28Ibidiñeti funagia bun? Maganbun bágili funagia? Aburemei, Bungiu le magumuchaditi, le adügübalin sun ubóu, mabuchadaditi luagu, magumuchadi ligía lichú lau.29Ruti erei lun le buchaalibei uagu, ru ligía lanwoun lere le uánimabei.30Gayaraati labuchadun hawagu nibureintiña, íbini ha héretimabaña ábürühatiña,31gama lumoun ha hemenigibaña luagu Aburemei, súnwandan hibihuba lan iseri erei, gayaraabei háhamahan kei ágila; gayaraabei héibaagun gama lumoun mabuchabei hawagu, gayaraabei héibugun ani gaguraasunmémebaña.Bible Society of Honduras