Isaíasi26
Uremu lánina agañeiruni
1Lídanme weyu ligía, leremuhóuba uremu le lumúanrugu Hudá:«Anihein aban uburugu héreti wama lun wesefurun, bunaguati Wabureme baríeiru derebuguti.2Dará huméi bena, belú hamaamuga gürigia richaguatiña, gürigia gúnfulitiña lau inarüni.3Rútibu darangilaü houn ha deregüdaguabaña lidan hafiñen buagu ladüga hemenigitiña buagu.4Hemenigi humá luagu Wabureme súnwandan, ladüga aramudaguagülei magumuchaditi ligía.5Ábürügüda lumutiña pántatiña, ǘnabugüdalaña lílana uburugu ha barügua tungua, fui lumutiña múarugun,6lun hadügüraguniña ha ǘnabugubaña hama ha gudemebaña».7Suruti hémeri ha richaguabaña; adügati Wabureme lun úaragua lan hémeri.8Chóuruguatiwa giñe woungua lidan üma le larufudubei bilurudun, Wabureme. Tayumahan wanigi lun wasaminaruba lan buagun.9Álugatina buagu áriebu tau sun nanigi; áluaha numutibu lau sun ninarün. Danme baguseragüdüniña lílana ubóu, hafurendeirubei gürigia irichaü.10Íbini gudemehabu ban houn wuribatiña; hasigiruba adügei le wuribabei, mafurendeirun habéi le buídubei, wuribati hóuserun lidan hageira gürigia buítiña, ani meberesegúntiña lau luéirigun Wabureme.11Wabureme, aransedibu lun babeichuniña gama lumoun mabusenrúntiña hasubudiruni; danme harihini lueirin bínsiñehabu houn bánigu, herederuba wuriba. Lagumuchaguagüdaña hamuga lanarime bigañi!12Wabureme, rútibu darangilaü woun; lidan linarün katei, buguya adügübalin sun wawadigimari.13Wabureme, Wabungiute, ámuhaña gürigia waburiña, gama lumoun buguyarügüñein Wabungiute.14Hagía hilagua, mabagaridunhaña, iyawadirügüñanu másaarunhaña; bei baaña, günringua baaña, gumuhadibu lau laritawagún hawagun.15Gíbeguagüda bumutiña gürigia, gíbeguagüda bumutiña lun buéirigun, chawagua bumuti sun láfadaragun ageiraü.16Áluaha wamutibu lidan wadiheri dan le bererehan woun lau ábanrügü agülülühani.17Bigibugiñeñadiwa bugaha kei aban würi dan yarafaali dan lun tágurahan, aba taguribihan agúaraha tuguya lau igari.18Dageinatiwa, sandí wamuti ligari agaraüdüni, águrahatiwa, gama lumoun garabalirügüñein wáguraha, manügüntiwa esefuruni lun fulasu, ani mágurahounbaña gürigia lun haganóun ubouagu.19Gama lumoun ha óunwegubaña afiñeñu buagu, habagaridayaba, hásaaruba lídangiñe óunweni ábame hagúarahan lau ugundani, lugundun óunaha bumuti larugounga kei serenu ábayame hachülaagun hilaaña lídangiñe umúahaü.20Heiba, nánigu, belú humá húbiñoun hadouragueime bena haugua. Aramudagua humá luagu murusun dan, darí lásügürün ligañi Wabureme.21Lugundun láfuriduba Wabureme tídangiñe lani palasiu lun labeichuniña lílana ubóu luagu hafigoun, maramudun láañame múa ha áfarawagubaña, arufudarügü lubéi áfarahani le adaawagúbei lidan.
Bible Society of Honduras