Isaíasi15
Libügürü Moabü
1Dimurei luagu Moabü: Áriebu le lagünrinchawagunbei Arü, ligía lagumuchagun Moabü; áriebu le lagünrinchawagunbei Kirü, ligía lagumuchagun Moabü.2Múdeitiña lílana Dibón ayahuaha tidan ténpulu to luáguboun wübü. Ayahuahati Moabü luagu lagünrinchagun Nebu luma Medebá. Lun harufuduni hagarigu luma hirun sáwati hádiburi súngubei biwa hádiuma.3Táuñañu daüguaü súsutu gürigia ǘmada; agúarahatiña tábulugugiñe muna lau gáriti. Ayahuahatiña sun gürigia lau saragu águiraü mágidurugu.4Amuriahati Esübón luma Elalé ídemuei; aganbúati hagúarahan chülǘ Haasü. Ligía habuinchunbei súdara Moábüna lau anufudei.5Amuriahatu nanigi íderawaguni lun Moabü, anurahatiña lílana darí Sóarü, darí Egülátü-selisíya. Mudei hamuti luwübüri Luidü ayahuaheina; agúarahatiña lau igarigu luagu günringuaü éibugeina luagu lémeri Oronaímü.6Mábeiha burí luelun Nimürímü, saüha híduru, hilá burí sagadi, meredeti ni aban ubanaü wurigili.7Ligía habudahanbalin gürigia harisin, aba hanügüni yagürounmeme luéi lísensen duna le Álamosu.8Geyeguati lamuriahóun ídemuei lau láfadaragun Moabü; chülüti ayahuni dagá Egülaímü luma Beerü-elimü.9Lau sun buin liña lan burí luelun Dimón lau hitaü, nóunahamemeba wuribani wéinamutimati luagun; léigibaña aban liñún ha esefurutiña Moábügiñe, ha erederutiña wínwanñu ubouagu.Bible Society of Honduras