Isaíasi14
Hagiribudun lumutuniña Bungiu hageiroun
1Gudemehabubei Wabungiute lun Ísüraeli, lanügayabei Ísüraeli kei néchani le lanúadirubei, ladügüba lun hayabinya Ísüraelina aganawa hamúanrugu. Hayarafaduba terencha houn, hóundaruba hamoun lánigu Ísüraeli.2Heresibirubaña saragu néchanigu Ísüraelina ábame houdin hama hageira, ábame hanügüniña Ísüraelina néchanigu hagía keisi hadamun lumúanrugu Wabureme. Hadaürübaña Ísüraelina ha meha adaürübaliña, hagumadihaba hawagu ha meha íchugubaña lidere dan houn.Labularún lurúeite Babilónia
3Lílana Ísüraeli, danme lemeraaguagüdünün Wabureme lídangiñe amudirawaguni luma súfuri, le gádanbalün,4hariñagubei poema le, lun hadügün bula lau lurúeite Babilónia:Ariha humá ida liña lan herederun ha wuribabaña guentó! Ariha humá ida liña lan lagumuchagun hanarime!5Gidala Wabureme ubafu háhaburugugiñe, halagualá habadun gumadimatiña ha wuribabaña,6ha meha abeichubaliña néchanigu lau igañi, háñaha aburechagubaliña lílana fulasu lau igañi, éibaaha hamaña magudemehabuga.7Darangilañu liña sun ubóu guentó, sun gürigia eremuhatiña lau ugundani.8Íbini burí lídibu gudi luma burí hibúari le Líwanuna gúndaatiña lau bagünrinchawagun, hariñaga: «Lúmagiñe bábürühan, máchuahounhadiwa».9Anihein óunwenbu hingiguaü ǘnabu hadan hilaaña, furitiña eresibirabu. Agagudúatiña hilaaña, sun lábutigu ubóu furitiña bubaroun; sun lurúeitegu burí fulasu saratiña luéigiñe lálana harúeihan.10Sun hagía adimurehatiña, hariñaga bun: «Féridiba giñe bere, ítarahadibu kei wagía.11Ya liabin banaagun bungua eredera luma búyanute. Iñalaü bigabananboun, héweraü bisidin».12Ábürühaadibu siélugiñe, waruguma lánina binaafin! Fuíwaadibu múarugun, buguyañaha le agañeirubalin wuribu hawagu néchanigu.13Ariñagatibu yebe búnguarügü: «Namudeiruba chülǘ sielu, níchugubei lálana narúeihan hagibuagu luaruguman Wabungiute; nañuuruba yágüta dise luagun nórute, luagu wübü le ñein lubéi hóundaragua búngiugu.14Namudeiruba íñunmeme luéi dúeri le íñutimabei; ítara nuba kei Bungiu le Íñutimabei».15Gama lumoun inarüni luagu rarihadibu lan lidoun larúeihan óunweni, lidoun lǘnabun-agei umúahaü!16Ha arihubalibu, rédeitiña aríaguabu, dan haríagunibu aba hariñagun: «Anihán meha san wügüri le adadagaragüdübalin ubóu, le meha agünrinchagubaliña néchanigu?17Le ígirubalin ubóu kei aban fulasu mageirawati, le meha águdahabalin uburugu, le meha máfuridagüdünbaliña adaürǘtiña?»18Sun lurúeitegu néchanigu, hemeraaguña lau uéiriguni, kada aban lidan lumuaha;19ánheinti buguya fuíwatibu dise luéi umúahaü kei ifei le mínsiñeguti; kei hágubu hilaaña le dügüwaguati, hadan gürigia áfarawagutiña, ha adürürǘtiña ichügü, ha agurútiña lidoun huyu buin lau dübü.20Mabunúnbadibu kei híbiri urúeigu, lugundun gadei bumuti bageira, áfaragua bumutiña lílana bageira. Madurabaña hadügawagun wuribatiña lun sun dan.21Aranse humá lun háfaraguniña isaanigu luéigiñe áfarahani le hadügübei hagübürigu, masaminarun hamaamuga hagumadihanya ubouagu, ni habuinchagüdüni ubóu lau burí uburugu.22Lariñahare Wabureme Suntigabafu: «Nuadigimarida hawagu, nagumucha lau liri Babilónia luma le erederuti lídangiñe, hau lirahüñü hama libañan.23Nadügaali suánpume, fulasume le buin umuti hau garún. Nabuidaali lau abuidagülei le lánina günringuaü. Wabureme Suntigabafu ariñagubalin».
Libügürü Asiria
24Fiñuhali Suntigabafu ariñaga: «Le nariñagubei luagu nadügübei lan, lasusereduba, chóuruti; lagunfuliruba le naritagubei.25Nagünrinchagubaña lílana Asiria nageira, naburechagubaña lidan náraabute. Lidere dan le híchugubei hawagun numutuniña lagidarúba hawéi, gidawa ligíame lihürü hanügün hégewagugiñe.26Anihán naransehabei libügürü sun ubóu. Ayawadagua numutiña sun néchanigu lau núhabu».27Aranse laali Wabureme Suntigabafu lun ítara luba lan, úabei ni aban lun lerederuni. Layawadaguña lúhabu, úabei ni aban asansiraguagüdüti laritagun.Lagünrinchagubei Wabungiute Filistéa
28Anihán dimurei le lariñagubei Isaíasi lidan irumu le lóunwenbei urúei Aasi:29«Magundaarabá néchani Filistéa, lau láhalachawagun wewe le meha aubei babeichúa, ladüga le ñéingiñe lubéi táfurida aban tuwuyeri hewe, táfuriduba ámuya tuwuyeri, sügǘ lau lira, láfuriduba aban düragón áhamahati.30Hadariruba gudemetiña sagadi houn halügüniña nicharirugu, gürigia ha úabei ni kata hama hemeraaguba darangilu. Gama lumoun nadügüba lun hóunwegun bumutuniña lau ilamaü, áfaragua náñame fiu ha erederubaña.31Hayahuaha lílana burí uburugu Filistéa, hagúaraha lau igari, hadadagara lau anufudei! Lugundun hayabinba súdaragu luéigiñe nórute kei gumuleli; úabei ni aban wügüri áfuriduti lídangiñe fíleiti».32Kábagia au hounabúa ha ounahóubaña lau uganu lídangiñe ageiraü le? Luagu ru laali lan Wabureme iderebugu lun Sión, ani lánigu ha nidiheribaña, haramudaguba ñein.Bible Society of Honduras