Agumesehani7
Labuluchun ubóu
1Lárigiñe aba lariñagun Bungiu lun Noé:—Dinaba tidoun ugunei hau sun biduheñu, ladüga hádangiñe sun gürigia báurügüñein nagundaara.2Barüba sedü feru hádangiñe sun animaalugu harumatiña, ha geigúadibaña, ánhaña ha meigúadibaña, ábanrügüla wügüri tuma aban würi.3Barüba giñe sedü feru hádangiñe sun hawuyeri dunuru, lun magumuchagun hamá ubouagugiñe.4Ladüga sedü weyu lárigiñe le, náhuyagüdüba huya luagu bián-wein weyu luma bián-wein áriebu. Nagidaraali sun nibagariti le nadügübei ligibuagugiñe ubóu!5Adüga lumuti Noé súngubei kei le aubei lariñagei Bungiu lun.6Sisi-san meha irumu lau Noé dan le ladibirunbei ubóu.7Aba ládinun tidoun ugunei hau lirahüñü, lúmari hama lídiñugu, lun hesefurun.8Animaalugu ha geigúadibaña hama ha meigúadibaña, ha áhamahabaña hama ha aduruuhabaña, aba lebelaagüdün biama hádangiñe sun hawuyeri animaalugu würiña hama wügüriña, ha geigúadibaña hama ha meigúadibaña, ha áhamaharügübaña hama ha aduruuharügübaña múarugu9aba hebelurun luma Noé tidoun ugunei, biámagueina, wügüri animaalu tuma würi animaalu, kei lariñaguni Bungiu lun.10Sedü weyu lárigiñe, aba lagumeserun guran abuinchagüdei ubóu.11Weyu disedü lidan libiaman hati, sisi-san meha irumu lau Noé. Weyuméme ligía aba ladaarun lísensen-agei lagütü barana guribinigiñe, aba ladaarun lubenari sielu íñugiñe.12Bián-wein weyu luma bián-wein áriebu lau huya áhuya.13Lídanmeme weyu ligía aba lebelurun Noé tidoun ugunei habu lirahüñü, Semü, Kamü luma Hafeti, tuma giñe lúmari hama ǘrüwa lídiñugu.14Belutiña sun hawuyeri animaalugu hama, dandu ha áraabuna, hama ha ibiñanigu, ha aduruuharügübaña múarugu hama sun hawuyeri dunuru.15Belutiña sun animaalugu hagía luma Noé bián bián.16Aban wügüri tuma aban würi hádangiñe sun hawuyeri animaalu, ítara kei lariñaguni Bungiu lun Noé, lárigiñe aba ladouruni Bungiu tubenari ugunei.17Bián-weinñein weyu lau guran. Dan le liñurunbei duna, aba liñurunu ugunei múarugugiñe aba táfayarun.18Iñureina ligíatima duna áfayareinatima ugunei.19Le lueirin liñurun duna aba ladouragun lau burí wübü le íñutimabei ubouagu,20lárigiñe ladouragun lau burí wübü, iñuramémegili kei burí sedü méturu lanwoun.21Ítara liña hóunwegun sun gürigia ha ubouagubaña, hama dunuru, animaalu ha ibiñanigu hama áraabuna hama ha aduruuharügübaña múarugu.22Sun le gabagaribei, gayara lawaragun ligibuagu ubóu, hilati.23Noérügüñein hama ha ebelurubaña luma tidoun ugunei eredera nibagariñu; ha híbiri gumuguagüdawatiña: Gürigia, ibiñanigu, dunuru hama animaalugu ha aduruuharügübaña múarugu,24san-dimiñein lubeiti weyu lau múa buluñu.
Bible Society of Honduras