Agumesehani40
Lariñaguni Hosé lanichigu bián uénedü
1Lárigiñe le, aba liabin le eseriwihabarun diwéin lúbiñe urúei luma le adaagubei fein, aba hadügün katei le auti magundan lan hayubudiri, le lurúeite Ehiptu.2Aba lagañidun urúei hama biángubei hagía, hábuti eseriwihatiña diwéin luma hábuti adaagutiña fein,3aba ladaürüniña lúbiñe hábuti súdaragu, le ñein tubéi furisun. Ligiaméme fulasu le ñein lubéi ladaürǘwa Hosé.4Aba líchuguni hábuti súdara Hosé lun ligía lan ariha hau, aba herederun biángubei hagía saragu dan furisunrugu.5Luagu aban áriebu aba gewenedü hamá adaürǘtiña hagía, eseriwihati diwéin luma adaaguti fein aban uénedü kada aban, kada uénedü lau lanichigu.6Dan le liabin Hosé arihaña binaafin, aba ladariruniña lau idiheri.7Ábati lálügüdüniña:—Ka uagu luribanbei higibu uguñe?8Aba hóunabuni:
—Gewenedütiwa aban uénedü, ani úati kaba lan ariñagei lanichigu woun.
Aba lálügüdüniña Hosé:
—Ma funagia Bungiu íchugubalin lanichigu katei? Abahüdagua huméi huénedü nun.9Ábati labahüdaguni hábuti eseriwihatiña diwéin luénedü lun Hosé, lariñaga lun:
—Gewenedütina ñeinñein lan aban lídibu beibei nigibugiñe.10Ñeinñein ǘrüwa limu luagu ídibu ligía, kei lilumadun, ítara legelewehan, aba lasaliragun lílewe lun béibeime to funaaru.11Ñéinñeinti likopun urúei numa núhaburugu, ábati nanügüni beibei, aba naribichaguni lidoun kopu. Lárigiñe aba níchuguni kopu lun urúei lúhaburugun.12Lariñaga Hosé lun:
—Anihán mini lan buénedü: Ǘrüwa limu ligía, ǘrüwa weyu,13ǘrüwa weyu lárigiñe le larihubei urúei Ehiptuna bikesin ábame líchugunibu urúei bárigoun lidoun buadigimari, ábayame bíchaahani likopun urúei lun kei meha badügüni.14Danme lasuseredun ítara, baritaguame nuagun, badügame fulesei nun, badimurehame lun urúei lun lasagarunina lídangiñe fulasu le. Gudemená bun!15Au íweruhouarügütina hageiragiñe ebüréugu, ani moun lumuti yebe anahein lan furisunrugu, ladüga madügüntina ni kata wuribati.16Dan le larihinbalin hábuti adaagutiña fein luagu luáguñein lan lufulesein lanichigu uénedü le líchugubei Hosé, aba lariñagun lun:
—Au gewenedütina luagu ñeinñoun lan ǘrüwa faniñe fein harutu nábulugu.17Lidan faniñe le íñugiñebei, ñeinñoun sun tuwuyeri fein lun urúei, gama lumoun aba burí hayabin dunuru eiga lídangiñe faniñe le nábulugubei.18Ábati lóunabuni Hosé:
—Anihán mini lan buénedü: Ǘrüwa faniñe ligía, ǘrüwa weyu,19ani ǘrüwa weyu lárigiñe le larihubei urúei Ehiptuna bikesin ábame ladibiragüdünibu urúei luagu aban tídibu wewe, ábame héiginibu dunuru.20Ǘrüwa weyu lárigiñe ligía lagunfulirun urúei irumu, aba ladügün aban óunwenbu fedu houn nadagimeintiña luma. Hagibugiñe lamisurahan aba lóunahan asagarei hábuti eseriwihatiña diwéin luma hábuti adaagutiña fein.21Aba líchuguni eseriwihati diwéin lárigoun lidoun luadigimari ábaya líchaahani kopu lun urúei kei meha furumiñe;22gama lumoun aba lóunahan átigiragüdei le adaagubei fein, kei buga lariñaguni Hosé.23Gama lumoun maritagunhali buga eseriwihati diwéin luagun Hosé.
Bible Society of Honduras