Agumesehani39
Hosé tuma lúmari Potifárü
1Dan le lanügǘnbei Hosé Ehiptun, aba lagañeihani aban Ehiptuna gíriti Potifárü hámagiñe Ísümaelina ha anügübalin ñeinhin. Potifárü, ligía hábutibei lisudaran urúei Ehiptuna.2Gama lumoun anirein Bungiu luma Hosé, buítiti lidin lun sun aniha lan aganawa lúbiñe Ehiptuna le liyubudiri.3Aba larihin liyubudiri Hosé luagu anihein lan Bungiu luma Hosé, luagu giñe adüga lan lun buidu lan lidin lun lidan sun katei.4Ligía línsiñedunbei Hosé lun liyubudiri, aba líchuguni lun ligía lan ariha tau muna, rulei sun katei lábugiñoun laríaahan.5Lúmagiñe weyu le líchugunbalin Potifárü Hosé lun larihin tau luban luma sun lumegen, aba labiniruni Bungiu wügüri Ehiptuna ligía dandu lúbiñe keisi áraabu.6Lau lóunigirunu Hosé luban Potifárü lau sun lumegen, meberesegúnhali lau ni kata luéidigia lun leigin. Keiti magadiñe lan Hosé, ani hínsiñeguti,7átiri lubeiti dan lárigiñe, aba línsiñedun tun lúmari liyubudiri, aba tariñagun lun luagu aban weyu:—Rounba numa.8Gama lumoun máhati Hosé, aba lóunabunu:
—Ru laali niyubudiri sun lúmati lábugiñoun naríaahan, lau anaha lan ya, madiheriti ni ka uagu.9Úati ni aban wéiriguti nuéi tidan muna to; mamahanti niyubudiri lau ni kata nun, luéidigia bau, ladüga lúmari buguya; siñati lubeiti nadügün aban katei wuribati ítara lun nafigouhan ligibugiñe Bungiu.10Lau sun tagiribuhan luma Hosé sagü weyu lun larounrun tuma, meberesegúnti tau.11Gama lumoun luagu aban weyu aba lebelurun Hosé múnadoun lun ladügüni luadigimari, keiti málouga lubéi ñein,12aba tárügüdüni tuéigiñe ladaüragun, tariñaga lun:
—Rounba numa.
Aba láfuridun éibaagueina aba terederun ladaüragun túhaburugu.13Dan le tarihin luagu ígiralanu ladaüragun túhaburugu lidan láfuridun,14aba tagúarun houn musu ha tánina muna, tariñaga houn:
—Barühali númari aban ebüréu ñahoun, anihánti adaagua bula wau. Aba lebelurun arihana, aba yebe labusenrun larounrun numa, aba nagúaragun here;15keiti laganbun nagúaragun lau sun nere, aba láfuridun éibaagueina ígiraloun ladaüragun ya.16Aba tareidunu ladaüragun Hosé, darí lachülürün liyubudiri múnadoun.17Ábati tabahüdaguni lememe buga tariñagubei houn musu, lun túmari, tariñaga:
—Aba lebelurun idamuni ebüréu le banügübei woun nirumunrugun, aba labusenrun lafosurunina lun narounrun luma.18Gama lumoun dan le nagúaragunbei lau sun nere, aba láfuridun éibaagueina ígira ladaüragun ya.19Ítara liña lóuserunina bidamun.
Aba lagañidun liyubudiri Hosé saragu dan le laganbuni le tabahüdagubei lúmari lun.20Ábati lárügüdüni Hosé, aba ladaürüni furisunrugu, le ñein habéi ladaüragüdün urúei. Gama lumoun lau sun furisunruguñein lan Hosé,21ñeinñein Bungiu luma; aba lóuseruni lau areini, aba ladügün lun línsiñedun lun tábuti furisun,22aba lígiruniña sun adaürǘtiña lábugiñe laríaahan. Ábati Hosé lan íchiga dimurei luagu sun le lunbei ladügǘn ñein.23Memegeiruntiha tábuti furisun lun laríaahan ni kata lídangiñe le lábugiñebei laríaahan Hosé, ladüga anihein Bungiu luma, ani adügati lun lasalirun sun katei lun buidu.
Bible Society of Honduras