Agumesehani27
Labiniruniña Isaakü Hakobu luma Esaú
1Wéiyayaali buga Isaakü, marihinhali giñe. Luagu aban weyu aba lagúarun lun Esaú le íbugañaü hadan lirahüñü, lariñaga lun:—Niráü!
Lariñaga Esaú lun:
—An núguchi.2Lariñaga Isaakü lun:
—Aríagubiña lubeigia luagu wéiyaadina lan ani gayaraati nounwen furumiñeguarügü lídangiñe weyu le.3Ligía nabusenrubei lun bidin áraabu éibaaha áfara báamuga aban animaalu.4Ábame badügün aban éigini semeeti kei línsiñe nun, banügeime nun lun néigini. Ábameti nabinirunibu lubaragiñe nounwen.5Aganbagutiñati Rebeka lun le lariñagubei Isaakü lun Esaú. Dan lubeiti lídinbei áraabu éibaaha,6aba tariñagun lun Hakobu le tadarahóun:
—Aganba numuti ladimurehan búguchi lun Esaú, lariñahare lun:7“Agaliruhabá aban animaalu, badügame aban gisóu semeeti lun neigin, ábame nabinirunibu ligibugiñe Bungiu lubaragiñe nounwen”.8Ítara liña lubeiti niráü, aganbabéi le lunbei nariñaguni bun:9Beiba le ñein habéi wabiñanigu, banügame bián hádangiñe habuidun-agei gábara ha ñéinbaña nun; naransera aban gisóu lun búguchi kei línsiñe lun.10Banügeime lun lun léigini, biní láamugabu lubaragiñe lounwen.11Lariñaga Hakobu tun lúguchu:
—Háyuti lura níbugaña, anhein au máyuti nura.12Ánheindügü aguura núguchi nuagu, lasubudiráname, laritaguba luagu nadügüña lan bula lau; ábameti líñaragunina lubaragiñe labinirunina.13Aba tóunabuni lúguchu:
—Niráü lábürühame íñarawaguni ligía nuagun. Beiba, adügabéi le nubeibei bun; barübaña gábara hagía nun.14Aba lidin Hakobu aba lanügüniña gábara tun lúguchu. Ábati tadügün aban gisóu semeeti kei línsiñe lun Isaakü,15aba tasagarunu tubuidun-agei ladaüragun Esaú to areidúañuboun múnada, aba tadaürünu luagu Hakobu le tadarahóun.16Aba tóuburuni larüna Hakobu luma ligiina le ñein lubéi ua lan ídiburi lau hayu gábara,17aba tíchuguni gisóu lun tuma fein to tadügüboun.18Ábati lebelurun Hakobu le ñeinhin lubéi lúguchi, aba lariñagun lun:
—Núguchi!
Aba lóunabun Isaakü:
—Anahán ya. Ka hádangiñe nirahüñü buguya?19Aba lariñagun Hakobu:
—Esaú au, le biráü le íbugañaü. Adüga naali le uágubei bariñaga nun. Saraba, ñuruba hou báamuga lídangiñe animaalu le náfarubei, lárigiñe ábame babinirunina.20Ábati lálügüdüni Isaakü:
—Ida liñagia lóufunbei badariruni, niráü?
Aba lóunabun Hakobu:
—Aburemei le Bubungiute íderagubalina lun nadariruni.21Lariñaga Isaakü lun:
—Yarafabá, gurú náamugabu, ariha náamugei anhein Esaú lubéi le niráü buguya.22Aba layarafadun Hakobu lun laguuruni Isaakü. Ábati lariñagun Isaakü:
—Umalali lumalali Hakobu, gama lumoun arünaü larüna Esaú.23Masubudirun lumuti lubeiti ladüga hayu lan larüna kei larüna Esaú. Gama lumoun dan le labiniraali lan yebe,24ábaya lálügüdüni:
—Binarün san luagu Esaú lan buguya le niráü?
Aba lóunabun Hakobu:
—Anha, Esaú au.25Ábati lariñagun lúguchi lun:
—Digabei neigin niráü, hou náamuga lídangiñe bíliru, biní náamugabu giñe.
Aba ladigin Hakobu leigin lúguchi, barǘ ligía diwéin lun. Aba leigin Isaakü gurá ligía.26Lárigiñe aba lariñagun lun:
—Yarafabá niráü lun bachuurunina.27Dan le layarafadun Hakobu lun lachuuruni aba lirimichunu Isaakü ladaüragun. Ábati labiniruni, lau burí dimurei le:
«Anha, líhemen niráü íhemeni le. Ítara liña kei líhemen aban áraabu le biní laali Bungiu.28Rulei Bungiu huya siélugiñeti bun, lubuidun-agei alubahani múarugugiñe saragu türigu tuma saragu diwéin.29Seriwi hamabu saragu gürigia; hudugua hamá néchanigu bigibugiñe. Gumadibaña bíbirigu guánarügü; hudugua hamá bigibugiñe! Híñarawaguba sun ha íñaragutibu, ha abinirutibu habinirúba».30Súnhali labiniruni Isaakü Hakobu, láfuriduñati Hakobu le ñéingiñe lubéi lúguchi, ligía lagiribudun Esaú lídangiñe léibaahan.31Aba giñe laranserun aban gisóu semeeti, aba lanügüni lun lúguchi, lariñaga lun:
—Saraba núguchi, houba lídangiñe animaalu le láfarubei biráü, biní báamugana.32Ábati lálügüdüni Isaakü:
—Kátabu?
Aba lóunabuni:
—Esaú au, biráü le íbugañaü.33Aba taweiridun lanigi Isaakü, lariñaga lau umalali adadagarati:
—Káteiti ñǘdünbei éibaaha aba liabin lau gisóu nun? Houna súngubei lubaragiñe biabin, aba nabiniruni, guentó rédeihati lau abiniruni.34Dan le laganbunbalin Esaú le lariñagubei lúguchi, aba layahun, aba lagúaragun:
—Rubei giñe babinirun nun núguchi!35Aba lóunabun Isaakü:
—Ñǘbuinhali bamulen, aba leyeedunina, barülati abiniruni le yebe bunbei.36Lariñaga Esaú:
—Ligía híchugunbei Hakobu luagu! Anihán libiaman leyeedunina! Furumiñe aba lagidaruni niricha nuéi keisi íbugañaü, guentó barüla abiniruni le yebe nánibei, mareiduntibu san ni ábanraü abiniruni nubá?37Aba lóunabun Isaakü:
—Rúhadina ubafu lun Hakobu buagu ani ru naaña sun liduheñu lun lubúeingubaña lan. Ariñagaadina giñe luagu ñeinboun lan saragu türigu tuma diwéin luma. Kábati gayara nadügün buagu guentó niráü?38Aba lagiribuhan Esaú, lariñaga:
—Ábanrügüñein san abiniruni gayara bíchuguni, núguchi? Binibana giñe!
Ábaya lagúaragun ayahua.39Ábati lariñagun Isaakü lun:
«Baganóuba dise luéi múa le buiti lun bunaguaü, dise giñe luéi huya le áhuyubei siélugiñe.40Gasu besefuragun bungua tau befeinte, lumusunbadibu bamulen; gama lumoun danme le béredun, báfuriduba lábugiñegiñe lugumadin».
Lanurahan Hakobu luéi Esaú
41Lúmagiñe dan ligía aba liyereegudun Hakobu lun Esaú luagu abiniruni le líchugubei lúguchi lun, aba lasaminarun: «Málühadiwa ánhawa amuisera lárigi núguchi, lárigiñeme lira, ábame náfaruni namulen Hakobu».42Dan le tasubudirunbalin Rebeka le laritagubei Esaú ladügün, aba tóunahan agúara lun Hakobu tariñaga lun:—Busentitia bíbugaña Esaú láfarunibu, luéigiñe le badügübei lun.43Aganbabána lubeiti niráü; beiba furese lúbiñoun nati Lawán le aganóubei Arán.44Ábame berederun luma luagu átiri dan, darí lásügürün ligañi bíbugaña45bulíeileime sun le badügübei lun. Ábameti nóunahan awisarabu lun bagiribudun. Mabusenruntina neferidiruniña biángubei nirahüñü lidan ábanmeme weyu!46Lárigiñe aba tariñagun Rebeka lun Isaakü:
—Buchá nuagu lubá nibagari hadüga Étüna ha úmabaña lamarieida Esaú. Anhein amarieida Hakobu tuma aban Étüna hibe ha yáabaña Kanán, hilagubeina.
Bible Society of Honduras