Agumesehani17
Lichugúniwa seini tuagu lóustarun Abürámü
1Dan le gádürü-wéinhali-disinéfu irumu lau Abürámü, aba lasaliragun Bungiu lun, lariñaga lun:—Au Búngiubei le Suntigabafu; winwanbá aban ibagari harumati nigibugiñe,2ábame nadügün aban daradu buma. Nadügüba lun gibe hamá badügawagun.3Ábati labuluchagun Abürámü darí lun ladagarun lerebe múarugu, sun anihán lan Bungiu ariñaga lun:4—Anihán daradu le lunbei nadügüni buma: Háguchibadibu saragu néchanigu,5mámaalime giñe Abürámü biri. Lúmagiñe guentó Abüraámü ligíaba biri, ladüga nadügaadibu lun háguchi ban saragu néchanigu.6Nadügüba lun gibe hamá badügawagun; háfuriduba urúeigu hama saragu néchanigu bídangiñe.7Daradu le nadügübei buma, ani le lunbei giñe nadügüni hama sun badügawagun líteme, luáguti auba lan Bubungiute luma Habungiute lun sun dan.8Níchugubei Kanán le ñein lubéi baganawa guentó hun kei halagante lun sun dan, ani auba Hubungiute.9Ariñagati giñe Bungiu lun Abüraámü:
—Gama lumoun buguya gúnfuliba lau nidaradun; buguya hama sun badügawagun.10Anihán daradu le nadügübei huma, le lunbei giñe hagunfuliruni sun badügawagun:
Sun wügüriña hidan, gasu lichugúniwa seini tuagu hóustarun.11Mosu lubeiti lichugúniwa seini tuagu hóustarun, ligíaba liseinin nidaradun huma.12Lúmagiñe uguñe lun lubaruaguóun, sun wügüri irahü águrahouti húbiñe, gasu lichugúniwa seini tuagu lóustarun luagu widü weyu luéigiñe lágurahoun, dandu idamuni le agañeihóuarügüti lau seinsu luma giñe furumiñeguarügü terencha.13Dandu aban kei le aban, gasu lichugúniwa seini tuagu lóustarun. Ítara luba lerederun liseinin nidaradun luagu húgubu keisi aban daradu lun sun ibagari.14Le michugúnti seini tuagu lóustarun siñabei laganóun haganagua ladüga mineben lan nidaradun lun.15Ariñagati giñe Bungiu lun Abüraámü:
—Mámaalime Saraí tiri búmari Sara ligíaba tiri guentó.16Nabiniruboun, ábame níchugun aban irahü bun tídangiñe. Ayé, nabiniruboun. Háguchuboun saragu néchanigu, ani lurúeitebaña burí ageiraü tadügawagun.17Aba labuluchagun Abüraámü darí ladagarun lerebe múarugu, aba léherahan sun anihán lan asaminara lúnguarügü: «Gayaraabei funagia lagaraüdün aban wügüri le sánhali irumu lau? Tagaraüdüba funagia Sara luagu gádürü-wein-diisi irumu tau?»18Ábati lariñagun lun Bungiu:
—Gayaraadügü láamuga lawinwandun Ísümaeli lau babinihan!19Aba lóunabuni Bungiu:
—Le nariñagubei luagu tagaraüdüba lan Sara to búmari aban irahü, ábame bíchugun Isaakü luagu. Lauba irahü ligía nederagüdei nidaradun, ábame nágüdahani nidaradun hama ladügawagun lun sun dan.20Ánheinti luagu Ísümaeli, aganba náadibu giñe ani nabinirubei giñe; nadügüba lun gibe hamá lirahüñü, luma lun haganwoundun ladügawagun. Háguchibei duusu ábutigu wéirigutiña Ísümaeli, nadügüba aban ageiraü wéiriti lídangiñe.21Gama lumoun nágüdahabei nidaradun luma Isaakü, le lunbei tagaraüdüni Sara bau aban irumu lárigiñe le.22Dan le lásurun ladimurehan Bungiu luma Abüraámü, aba lidin ñéingiñe.23Lidan weyu ligía aba líchugun Abüraámü seini tuagu lóustarun Ísümaeli, ru ligía seini tuagu hóustarun sun idamuni ha águrahoubaña lúbiñe hama ha lagañeihabaña lau liseinsun. Ruti Abüraámü seini tuagu hóustarun sun wügüriña ha aganóubaña lúbiñe, kei lariñaguni Bungiu lun.24Gádürü-wein meha disinéfu irumu lau Abüraámü, tareisi irumu lau Ísümaeli le liráü dan le líchugunbei seini tuagu lóustarun.26Lídanmeme weyu ligía lichugúa seini tuagu lóustarun Abüraámü lau sun Ísümaeli le liráü,27úara hama sun wügüriña ha lúbiñebaña, dandu idamuni ha águrahoubaña lúbiñe, kei ha agañeiharügü lubaña hámagiñe terencha luagu seinsu.
Bible Society of Honduras