Agumesehani16
Agarü luma Ísümaeli le tiráü
1Siñati meha tagaraüdün Saraí, gama lumoun ñeinñoun aban tidamun Ehiptuna gíritu Agarü.2Ábati tariñagun Saraí lun Abürámü:—Mígirungili Bungiu lun garáü nan, gama lumoun amuriahatina buma lun bagamaridunu Agarü to nidamun, fagua gayaraabei garahüñü nan tídangiñe.
Aba lánharun Abürámü lun le tamuriahabei Saraí luma,3ábati tanügünu Saraí Agarü to Ehiptuna, aba tíchugunu lun Abürámü lun lagamaridunu, dan meha le díisihali irumu hau aganawa Kanán.4Aba lagamaridunu Abürámü Agarü, aba tadageinadun; dan le tasubudirunbalin Agarü luagu dageinañoun lan, aba tagumeserun óuseroun Saraí lau mebereseni.5Ábati tariñagun Saraí lun Abürámü:
—Bídangiñeti tanügünbalina Agarü kei ni kata! Nuguya guánarügü íchugubarun bun lun bagamaridunu, gama lumoun guenlé lau tasubudiruni luagu tagaraüda lan wéiriti tanaagun tungua nuéi. Ariñagaléi Bungiu ka lan wádangiñe gadurunbei, anhein buguya lubéi o nuguya lan.6Aba lóunabunu Abürámü:
—Búhaburuguñoun bidamun, adügabéi le babusenrun tau.
Ábati tagumeserun Saraí óuseroun wuriba, darí lun tanurun Agarü.7Aba ladarirunu aban lani Bungiu ánheli lidan fulasu mageirawati laru duna le luágubei lémeri Suru,8aba lálügüdünu:
—Agarü, tidamun Saraí, halíagiñedibu san, haliñounbadibu san?
Tariñaga lun:
—Nanurahaña tuéi Saraí to niyubudiri.9Lariñaga lani Bungiu ánheli ligía tun:
—Giribubá tumoun babureme, badügeime sun le tubeibei.10Ariñagati giñe lani Bungiu ánheli ligía tun:
«Nadügüba lun gibe hamá badügawagun darime lun siñá lan habahüdǘn.11Dageinañadibu, bagaraüdüba aban irahü ábame bíchugun Ísümaeli luagu lírime, ladüga aganba laali Bungiu bidiheri.12Derenabei kei aban gabayu áraabuna lageindaguba hama súngubei, ageindagua hagíame súngubei luma; gama lumoun lederebudagüdüboun luban íbini ánhaña maha líbirigu».13Kei buga adimurehaaru lan Agarü luma Bungiu aba tíchugun liri: «Bungiu le arihubalina», ladüga tariñagun tungua: «Ariha naali Bungiu ani wínwangidina lun nabahüdaguni».14Ligía giñe «Lifusun Wínwanti le arihubalina» lubéi líribei fusu ligía. Labadinaguañein Kádesi luma Béredi fusu ligía.15Aba tíchugun Agarü aban irahü lun Abürámü, aba líchugun Ísümaeli luagu.16Gádürü-wein-sisi irumu lau Abürámü dan le garaüwa lubéi Ísümaeli.
Bible Society of Honduras