Agumesehani14
Lesefuruni Abürámü Lotu
1Lidan meha dan ligía Amüraféli ligía meha lurúeitebei Sinarü, Arioku lurúeite meha Elasárü, Kedorulaomerü lurúeite meha Elamü, Tidali lurúeite meha Goimü.2Aba hawuribuhan hama Bera, lurúeite Sodoma, awuribuha luma Birüsá lurúeite Gomora, awuribuha luma Sinabü lurúeite Adümá, awuribuha luma Semeberü lurúeite Seboimü, awuribuha ligía giñe luma lurúeite Bela, fulasu le gíribei Sóarü.3Aba hóundaraguniña seingü urúeigu ha hawügüriñanigu luagu fulasu wayati le gíribei Sidimü, le ñein lubéi Barana Hilaali.4Lábugiñeñahañanu lubafu urúei Kedorulaomerü luagu duusu irumu, gama lumoun luagu litareisin irumu, aba hóundaragun seingü urúeigu ha lun hageindagun luma.5Leweñegua irumu aba lidin Kedorulaomerü hau urúeigu ha lúmagiñebaña aba houdin lóubawagun Ásütarotu-Karünaimü aba háfaraguniña Refaímüna ñein lárigiñe aba háfaraguniña Susitana lidan fulasu le gíribei Amü, áfaragua hamaña giñe Émüna Sawé-kiriataímü,6áfaragua hamaña Óruna luagu burí luwübüri Seirü, aba héibaahaniña darí Parán, le yarafabei lun fulasu mageirawati.7Dan le lagiribudun Kedorulaomerü hau ha úarabaña luma, aba hachülürün En-misüpátü, lememe giñe gíribei Kadesi. Ñein hagünrinchaguei sun le hadarirubei habarua hageira Amaléküna, ítarameme giñe hadüga houn Amoruna ha lóubawagubaña Asesón-tamarü.8Ábati houdin lurúeite Sodoma, lurúeite Gomora lurúeite Adümá, lurúeite Seboimü luma lurúeite Bela luagun fulasu wayati le Sidimü. Aba hageindagun séingügubei hagía ñein hama Kedorulaomerü, Tidali, Amüraféli luma Arioku, gádürü lurúeitegu Elamü, Goimü, Sinarü luma Elasárü.10Lidan sun fulasu lani Sidimü ñeinñein burí huyu buin lau baama le ñéingubeiti, danti le habusenrubei yebe lurúeite Sodoma luma lurúeite Gomora hanurahan, lídangiñe wuribu, aba houdin éiguada lidoun burí huyu ligía. Ha híbiri urúeigu aba houdin luagun burí wübü.11Hati agañeirubaña, aba hanügüni sun burí éigini luma burí katei gebegiti le Sodomabei luma Gomora aba houdin ñéingiñe.12Keiti Sodoma lan laganawa Lotu le liraühaña Abürámü, aba hanügüni adaürǘwa lau sun le lúmati.13Gama lumoun ñeinñein aban wügüri esefuruti lau ibagari, aba liabin abahüdaguei le asuseredubei lun Abürámü le ebüréu le aganóubei lidan áraabu lani ensina le lani Mamüré le Amoruna. Mamüré libiri Esükólu luma Anerü, hagía lúmagiñeñanu Abürámü.14Dan le laganbunbei Abürámü luagu ladaürǘña lan liraühaña, aba lóundaraguniña sun lumusun ha uágubaña lafiñera, ha agaraüdǘwabaña lúbiñe, ǘrüwa-san-disiwídü wügüriña, aba houdin sun hagía hárigi urúeigu hagía darí ageiraü le gíribei Dan.15Aba lábürühan Abürámü hau lánigu sódini hawagun urúeigu hagía áriebu, aba héibaahaniña darí Obá, le luéigiñebei nórute libiti uburugu Damasüku,16aba hagidaruni sun buga katei le hanügübei hawéi. Ítara liña lesefuruni Abürámü Lotu le liraühaña, lau sun lúmati. Sefu lumutiña giñe würiña hama híbiri gürigia.Labiniruni Melükisedekü Abürámü
17Dan le lagiribudunbei Abürámü lárigiñe lagañeiruni Kedorulaomerü hama sun híbiri urúeigu ha lúmagiñebaña, aba liabin lurúeite Sodoma lubaroun luagun fulasu wayati le gíribei Sawé, lememe unbei hariñaga Lufulasun Urúei.18Aba giñe lasagarun Melükisedekü le lurúeite Sálemü lufadirin giñe Bungiu le íñutimabei fein tuma diwéin,19aba labiniruni Melükisedekü Abürámü, lau burí dimurei le:«Binilabu Bungiu le íñutimabei, le adügübalin sielu luma ubóu;20Ani rualá giñe uéiriguni lun Bungiu le íñutimabei le adügübei lun bagañeiruniña báganiñu».
Ábati líchuguni Abürámü diisi lídangiñe san lídangiñe sun le lesefurubei lun Melükisedekü.21Aba lariñagun lurúeite Sodoma lun Abürámü:
—Giribugüdabaña gürigia nun, berederame lau umegeni.22Aba lóunabuni Abürámü:
—Fiñuhadina lun Nabureme, Bungiu le íñutimabei, le adügübalin sielu luma ubóu,23luagu márügüdünbadina lan ni kata le bani, ni íbini murusun filu o aban lan tagürüga sabadu lun nagüürünu nisabadun, mariñagun báamuga lachülürün somu weyu luagu buguya lan arisidagüdübalina.24Mabusenruntina ni kata nungua, luéidigia le hou hamaalibei numusuniña. Ánhañati wügüriña ha ñǘbuinbaña numa, Anerü, Esükólu luma Mamüré, hanügübei le yuubei houn.
Bible Society of Honduras