Agumesehani13
Hafanreinragun Abürámü luma Lotu
1Dan le láfuridunbei Abürámü Ehiptugiñe tau lúmari luma lau sun le lúmabei, aba lagiribudun lóubawagun Négebü. Aba lidin Lotu le liraühaña hama.2Rísiti méhati Abürámü, ñeinñein golu luma, pülata, hama saragu animaalugu.3Aba lagiribudun Négebügiñe murusun murusun darí lachülürün Beteli, ñéingiñe aba lidin lidoun fulasu le buga ñein lubéi líchigoun likianpun furumiñe labadinagua Beteli luma Ai.4Lidan buga fulasu ligía ladüga aban latarü, aba lafurieidun lun Bungiu ñein.5Rísiti giñe buga Lotu, kéisigubeirügü Abürámü le liyaurite, ñéinñanu saragu mudún luma, bágasu hama gürigia ha erederubaña luma;6gama lumoun lóuguatiti fulasu le ñein habéi lun héigagüdün saragu animaalugu. Siñaaliti buga herederun lidan aban,7heredera buriti ha óunigirubaliña libiñanigu Abürámü ageindagua hama ha óunigirubaliña libiñanigu Lotu. Ani bóugudin luéi lira ñéingili meha haganawa Kananna hama Féresüna.8Luagu aban weyu aba lariñagun Abürámü lun Lotu:—Au buma gaduheñuguatiwa, mabuiduntiti lun ñein lan wuribu wádangua, ni hadan hóuniri bibiñanigu hama hóuniri nibiñanigu.9Anihán sun múa, lun banúadahan. Fánreingua wamá. Ánhabu ñüdün luagun nórute, nídiba luagun suru; ánhabu ñüdün luagun suru, nídiba luagun nórute.10Aba larihin Lotu luagun fulasu le lóubagiñebei duna le gíribei Hordán, anihein saragu duna ñein chülǘ lumoun liraüraü fulasu le Sóarü, ítara liña kei aban óunwenbu fuluri-agei. Lenege lumúan Ehiptu. Sun lira lubaragiñe meha lagumuchaguagüdüni Bungiu uburugu burí Sodoma luma Gomora.11Ábati lanúadahani Lotu fulasu le lubadubei duna le gíribei Hordán, aba lidin ñeinhin, luagun oubaü le ñéingiñe lubéi laboucha weyu libiti fulasu le ñein habéi buga. Ítara liña lubeiti lafanreinragun Abürámü luma Lotu.12Aba lerederun Abürámü lóubawagu Kanán, aba lidin Lotu aganawa lidan fulasu le lubadubei uburugu Sodoma,13le ñein lubéi wuriba hamá sun lan gürigia, adaaguatiña burí lanarime figóu ligibugiñe Bungiu.14Lárigiñe lidin Lotu, aba lariñagun Bungiu lun Abürámü:
—Arihabá lídangiñe fulasu le ñein bubéi luagun nórute luma luagun suru, luagun oubaü le ñéingiñe lubéi laboucha weyu luma le ñeinhin lubéi lálüda;15níchugubei sun múa le barihubei bun, bánibei hau sun badügawagun lun sun dan.16Nagibedaguagüdübaña kei sagoun le múarugubei. Ítara kei siñá lan labahüdǘn lagu sagoun, ítara luba giñe siñá lan habahüdǘn badügawagun.17Saraba éibugabei múa le luagu limigifen luma luagu lidabuberen, ladüga níchigaali bun!18Ítara liña liñuragunu Abürámü likianpun, aba lidin aganawa lidan áraabu le ñein tubei burí tídibu ensina lani aban wügüri gíriti Mamüré, yarafa lun uburugu Ebürón. Aba ladügün aban latarü lun Bungiu ñein.
Bible Society of Honduras