Ésüdürasi5
Tábunawagunya ténpulu
1Aba hasubudiragüdüni profetagu Ahéu luma Sakaríasi le liráü Idó uganu le heresibirubei lúmagiñe Aburemei le Lubungiute Ísüraeli houn huríu ha Hudaabaña hama ha Herusalénbaña.2Ábayati lagumeserun Sorobaweli le liráü Salatiéli, luma Hosué le liráü Hosadákü nadagimein lidan tábunawagunya litenpulun Bungiu uburugu Herusalén, hama lani Bungiu profetagu íderaguaña.3Gama lumoun aba lidin Tatenái le gumadan lidan fulasu le ñéingiñe lubéi lálüda weyu libiti duna Éufüratesi, luma Setarü-bosunái hama hapanaagu ariñaga houn:—Ka ariñagubei hun lun hábunagunuya ténpulu to, luma lun hafurarunu lau fulansu? Ka hiri gürigia ha nadagimeinbaña ábunaguounya ténpulu to?5Gama lumoun kei lóunigiruñanu lan Bungiu ha arihubaña lau wadagimanu, merede hamuti hawadigimaridun darí lounahóun asubudiragüdei lun Daríu lumoun liabin lóunabagüle.6Anihán tariñagubei gárada to lóunahaboun Tatenái, gumadan lidan fulasu le luéigiñebei oubaü le ñéingiñe lubéi lálüda weyu libiti duna Éufüratesi luma Setarü-bosunái hama hapanaagu lun urúei Daríu:7«Ñeinlá darangilaü lidan barúeihan. Wasubudiragüdüñein lun urúei luagu ñǘdünhadiwa lan lóubawagu Hudá, ani ariha wamaaru litenpulun Bungiu wéirigutu to ábunawagubounya lau burí dübü wéinamuti le nadagimeinwaali. Guentó, hafuraruñein burí touba lau fulansu, fureseti hawadigimari, ani lawanseruña wadagimanu furese.9Álügüda wamutiña huríu ha arihubaña lau wadagimanu ka lan ariñagubei houn lun hábunagunu ténpulu luma lun hafurarunu lau fulansu,10luma ka lan hiri gürigia ha hábutigu, lun gayara lan wabürüdüni hiri lun wasubudiragüdüni lun urúei.11Aba hariñagun woun: Wagía lun Aburemei le Lubungiute sielu luma ubóu wáhuduragua, ani wararamagüdüñounya ténpulu to meha lábunaguboun aban lurúeite Ísüraeli saragu dan lubaragiñe le.12Gáñigüda hamuti meha wagüchagu Bungiu le siélubei, aba lubéi lederegeruniña labun lubafu Nabukodonosoru le lurúeite Babilónia, le Kalüdéana, le agünrinchagubarun ténpulu to, aba lanügüniña Babilónioun.13Lárigiñe, lidan furumiñeti lirumudiri larúeihan Siru Babilónia, aba lariñagun lunya tararamun litenpulun Bungiu.14Ariñagatiña giñe woun: Sagá lumuti urúei Siru ílagu burí golu luma pülata Babilóniagiñe le buga lanügübei Nabukodonosoru tídangiñe litenpulun Bungiu uburugugiñe Herusalén anüga tidoun ténpulu to Babilóniaboun, aba lederegeruni lun Sésibasarü, le líchugubei keisi gumadimati.15Aba lariñagun Siru lun Sésibasarü: Óundarabei ílagu ligía lun báguyugüdüni ténpulurugun Herusalén, ráramagüdabounme litenpulun Bungiu lídanmeme binadu tubara.16Ábati liabin Sésibasarü, aba lábununi tugudina ténpulu to litenpulun Bungiu uburugu Herusalén; lúmagiñeti dan ligía hawadigimariduña araramagüdoun ténpulu, gama lumoun másugiña.17«Anhein lubeiti gunda urúei, amuriahatiwa lun láluahoun tidan hagaradan urúeigu Babilónia anhein inarüni lubéi luagu ariñaga lan urúei Siru lunya tararamun litenpulun Bungiu uburugu Herusalén, luma lun lariñawagún woun ka lan laritagubei urúei libügürü katei le».
Bible Society of Honduras