Ésüdürasi4
Hadügün áganiñu lun lararamúniwa wadagimanu
1Dan hasubudirunbalin láganiñu Hudá luma Benhamín luagu hábunaguñounya lan ha abugúbaña litenpulun Aburemei le Lubungiute Ísüraeli,2aba houdin arihei Sorobaweli luma Hosué hama hábutigu iduheñu, aba hariñagun houn:—Ígira humá lun wídehan lidan ábunaguni, lugundun wagía keisi huguya, ñǘbuinhadiwa giñe lumoun Hubungiute, ani dagagüdaadiwa lun lúmagiñe lidaani Esaradón le lurúeite Asiria, le anügübaliwa ñahoun.3Aba lariñagun Sorobaweli, Hosué hama híbiri hábutigu iduheñu houn:
—Siñati wábunagunuya litenpulun Wabungiute huma, wábuguaba wadügei lun Aburemei le Lubungiute Ísüraeli, ladüga ítara liña lariñaguni Siru le lurúeite Pérüsia woun.4Ábati hagumeserun lílana fulasu íchiga maguraasuni hadoun gürigia ha lánigu Hudá, lun lerederagun hábunagun.5Aba giñe hafayeirun fiu nadagimeintiña luma urúei, lun hamaharun lun hasigiruni wadagimanu lidan sun dan le Siru lan urúeibei Pérüsia, darí lidaani larúeihan Daríu le lurúeite Pérüsia.6Lidan lagumeserun lidaani larúeihan Asueru, aba híchugun hadurun lílana Hudá luma Herusalén.7Lidan lidaani Árütaherühesi, le lurúeite Pérüsia, aba habürühan Bisülámü, Mitürídatesi, Taweli hama hábirigu aban gárada lun Árütaherühesi. Lidan araméu tabürühóua gárada tuguya lau tásügürawagüdün lidoun hererun Pérüsiana.8Aba habürühan Reumu le gumadan luma Simüsái le abürühati aban gárada lun Árütaherühesi íchiga luriban iri hawagu lílana Herusalén.9Anuhán gárada to lóunahaboun Reumu le gumadan, Simüsái le abürühati hama lupaanágu ha aguseragüdütiña, heneraaligu hama úfisigu ha Pérüsiana, Érekü, Babilónia luma Susa lememe Elamü, hama híbiri gürigia ha lanügübaña Asünapárü hageiragiñe aba líchuguniña uburugu burí Samaria luma lidan líbiri fulasu luéigiñe oubaü le ñéingiñe lubéi lálüda weyu libiti duna Éufüratesi:
«Mábuga waña lun urúei Árütaherühesi hámagiñe eseriwidutiña lun ha luéigiñebaña oubaü le ñéingiñe lubéi lálüda weyu libiti duna Éufüratesi:12Wasubudiragüdüñein lun urúei luagu huríu lan ha lanügübaña urúei wamoun, añaheinhaña lan Herusalén ani hábunaguñeinya lan uburugu wuribati le. Gumeseeña araramagüdei baríeiru luma aransehei lugudina.13Wasubudiragüdüñein giñe lun urúei luagu anhein lan araramaya uburugu le, rárama ligíame lubarieirun, máhabaña lan gürigia ha hafayeihani liseinsuna gumadi ni irichaü, lauti lira ñeinbei féridi lidan liseinsuna arúeihani.14Ani kei weseriwiduña lubéi lun urúei, siñati wígirun lun lanabawagun urúei ítara. Ligía lébubei wóunahan asubudiragüdei katei le lun urúei,15lun lariaahóun tidan líburu to burí hígiruboun lagüchagu urúei. Ítara luba lasubudiruni urúei luagu maganbadi ani dencha lan uburugu le houn urúeigu luma lun líbiri burí fulasu, ani adaawaguañahaali lan mabuchahaü lidan uburugu le, ligía lan lébubei lagünrinchawagun.16Wasubudiragüdüñein lubeiti lun urúei luagu anhein lan ábunawaguaya uburugu le ani aranserúa ligíame lubarieirun, leferidirubei urúei lugumadin luagu fulasu le luéigiñebei oubaü le ñéingiñe lubéi lálüda weyu libiti Éufüratesi».17Ábati lóunahani urúei Árütaherühesi óunabagülei le houn:
«Lun Reumu le gumadan, Simüsái le abürühati hama hapanaagu ha aganóubaña Samaria luma lidan líbiri burí fulasu luéigiñe oubaü le ñéingiñe lubéi lálüda weyu libiti duna Éufüratesi: Mábuiga niña hun.
Tibügürüti18gárada to hóunahaboun nun, aliihóuatu nun furangu,19aba nariñagun lun lálügüdahoun buidu. Ani dariwati luagu iñuraguañahaaña lan lílana uburugu ligía houngua hawagun urúeigu, ani aniheinñahaali lan chagaguaü luma mabuchahaü hadan,20ani ñéinñanu lan meha urúeigu gabafutiña Herusalén ha agumadihabaña lidan fulasu le ñéingiñe lubéi lálüda weyu libiti duna Éufüratesi, ha meha únbaña lafayeihóua liseinsuna gumadi luma irichaü.21Ariñaga humá lubeiti houn gürigia ha lun hararamuni wadagimanu, lun mábunawagun lan uburugu darí níchugun iseri dimurei.22Houcha humá lubeiti hadügüni le nubeibei, luéi laganwoundun wuribani añawariheime arúeihani».23Dan le taliihóunbei ligaradan urúei Árütaherühesi ligibugiñe Reumu, Simüsái, hama hapanaagu, aba houdin sun hagía Herusalén furese, aba hafosuruniña huríu lun hararamuni wadagimanu.24Ítara liña lararamun tábunawagun litenpulun Bungiu uburugu Herusalén darí lumoun libiaman lirumudiri larúeihan urúei Daríu le Pérüsiana.
Bible Society of Honduras