Esekiéli8
Láhudurawaguniwa houn guáriua Herusalén
1Weyu seingü lidan sisi hati lidan lisisin irumu, ñun niña núbiñe hama wéiyaaña mutu ha lílana Hudá. Sódini aba líchuguni Aburemei lúhabu nuagu,2aba narihin aban katei lenege aban wügüri. Luéigiñe liranaagua lun ǘnabun, arihatina aban katei lenege watu gemeti, ñéingiñe lun iñun, miriti kei buronse.3Aba liñuruni wügüri ligía lúhabu, aba lárügüdünina luéigiñe nídiburi. Ábati liñurunina lubafu Bungiu, aba lanügünina Herusaléun lidan uénedü, aba ladagaragüdünina luagu lebelaagüle bena le múnadagiñebei, le luágunbei nórute, le ñein lubéi guáriua le agañidagüdübalin Aburemei.4Ñeinñein luéirigun Aburemei le Lubungiute Ísüraeli, ítara kei buga narihin lidan uénedü luagu fulasu mawübüriti.5Ábati lariñagun nun:Liráü wügüri, arihabá luagun nórute.
Aba narihin luagun nórute, aba narihini guáriua le lébunabei ligañi Aburemei, bénabu, lurugabu lubenari latarü.6Lárigiñe aba lariñagun Aburemei nun:
—Liráü wügüri, ariha bumuti san liwiye burí katei le hadügübei Ísüraelina le aubei hadisedagüdana tuéi nitenpulun to sánduboun? Barihuba burí katei wuribatimati luéi le.7Lárigiñe aba lanügünina lubenarin bürürü. Ñeinñein aba huyu luagu baríeiru.8Ábati lariñagun nun:
—Liráü wügüri, wéirigüdabei huyu le luágubei baríeiru.
Aba naweiridagüdüni huyu, aba nadarirun aban ebelaagülei.9Ábati lariñagun nun:
—Beluba ariha báamugei lagübüri burí katei le hadügübei ñein.10Aba nebelurun, aba narihin, luagu sun limigifen baríeiru ñéinñanu hayawa sun hawuyeri animaalugu ha aduruuharügübaña múarugu, hama amu burí hawuyeri animaalugu ha wíyetiña hama sun hawuyeri haguariuangu Ísüraelina.11Ǘrüwa-wein-diisi ábutigu Ísüraelina ha áhuduragutiña houn guáriuagu hagía, ñeinñein Hasaníasi le liráü Safán hadan. Ñeinñein aban lagei kupali lúhaburugu kada aban hádangiñe, le ídangiñebei láfurida gumuleli duruti le lugumulelin kupali.12Lariñaga nun:
—Liráü wügüri, ariha bumuti san le hadügübei ábutigu Ísüraelina aramudaguarügü? Háhuduraguña hábiñe haguariuan. Haritaguatiña luagu marihin nani le hadügübei, luagu úaadina lan fulasurugu.13Lariñagaya nun:
—Barihubaña adüga katei burí wuribatimati.14Aba lanügünina luagun lubenari tebelaagüle litenpulun Aburemei, le luágunbei nórute. Ñéinñanu fiu würiña ñun ayahuaha luagu guáriua le gíribei Tamusu.15Lariñagati Aburemei nun:
—Liráü wügüri, ariha bumuti san le? Barihuba burí katei wuribatimati.16Ábati lanügünina lidoun tibürürün ténpulu le múnadagiñebei labadinagua ebelaagülei luma latarü, ñéinñanu hawara wein-seingü wügüriña lau hanagan tuagun sanduariu, buluguhaña luagun oubaü le ñéingiñe lubéi laboucha weyu dagá herebe múarugu, háhuduraguña lun weyu.17Ábati lariñagun Aburemei nun:
—Liráü wügüri, ariha bumuti san le? Magufurumaduntiña lílana Hudá lau hadügüni lagübüri burí katei le ya. Saragu liña wuribani fulasurugu ladüga luriban housan. Bóugudin luéi lira ñǘbuintiña adaaguei katei burí ligía tidan ténpulu, aganwoundagüdei nigañi lau lira. Arihabéi ida liña lan lanarime hanabagunina.18Gama lumoun luadigimariduba nigañi. Magudemehabubadina houn. Íbinime hagúarahan agúaha nun, meberesenbadina hau.
Bible Society of Honduras