Esekiéli7
Yarafaali lagumuchun dan
1Aba ladimurehan Bungiu numa, lariñaga nun:2—Liráü wügüri, nariñahare houn lílana Ísüraeli, au le Aburemei. Aniteeli lagumuchun ubóu.3Yarafaali bagumuchagun Ísüraeli. Nóunahaali nigañi buagun; naguseragüdaadibu luagu busan, nabeichadibu luagu sun lagübüri bóuserun.4Magudemehabubadina bun, nabeichadibu luagu bóuserun. Ábame hasubudiruni luagu au lan Aburemeibei.5—Nariñahare au le Aburemei: Yarafaali lagumuchun dan, aniteeli lamiselu gabügürügua, yarafaali lagumuchun dan bun.7Lílana ageiraü, anitén günringuaü. Chülüha oura, yarafaali weyu le lunbei chagaguaürügüba lan ñein, lagumuchaguba ugundani áraabu.8Nóunahaali nigañi buagun guentó darí nagufurumadun, naguseragüdaadibu luagu bóuserun, nabeichadibu luagu luriban bigaburi.9Magudemehabubadina bun; nabeichadibu luagu bóuserun, nafayeiragüdaadibu luagu luriban bigaburi. Ábame hasubudiruni luagu au lan le Aburemei abeichubalün.10—Anihán weyu ligía! Chülüha! Chülüha günringuaü! Gáñeiti wuribani lidan sun fulasu.11Chülüguati anarimeni, aba lanügün wuribani. Gama lumoun hagía, magañeirunbaña ni kata lau harisin luma haréin. Úati ni kata gebegiti hadan.12Chülüha oura, chülüha weyu. Ni le alugurahabei úati kaba lan uagu lagundaara, ni le agañeihabei úati kaba lan uagu lahirudagua. Nabeichaali lupantan Ísüraeli lau nigañi.13Le aluguraali somu katei, mibihindigia laali lidan sun libagari, siñaalime giñe ladüraaguni lidaradun. Siñabei hasigirun salufuritiña nibagariñu.14—Tínwinruña fidu agúaha wuriburugun; sun gürigia aransera, gama lumoun úati ni aban áfuriduti ageindagua. Nabeichaali lupantan Ísüraeli lau nigañi.15Anihein wuribu bóugudi, sandi luma ilamaü múnada. Ha wuriburugubaña hóunweguba wuriburugu, ha uburugubaña láfaragubaña ilamaü luma sandi.16Íbini hesefurun fiu, anuraheina áraabun keisi unhun louñu umutiña, hóunweguba sun hagía ladüga hafigoun.17Lábürühaba harüna sun hagía, ladadagaruba hagachürügü le hanufude.18Hadaüraguba daüguaü súsutu arufudei hagarigu; ladadagaruba sun hágubu; láfunaduba hagibu lau busiganu helúa ligíame hachügü.19Hágurubei pülata ǘmada; hachagarubei hagolun kamá hamuga ifei. Ni hagolun ni hani pülata lásiñarubaña esefura lidan luéyuri ligañi Bungiu. Siñabei hagalumaruni ilamaü ni habuinchagüdüni harageirugu, lugundun golu buga lébunabei hábürühan lidoun wuribani.20Buíntiña lau pantaü luagu lubuidun burí hálagu lauti golu, aba hadügüniña hagübüri haguariuan lau. Ligía nadügübei lubéi ílagu lauti golu ligía lun ífeime.21Nadügüba lun hayabin terencha íweruhei, lun hayabin gürigia ha áubeitima meberesenwa lan ubouagu agidarei hawéi, lun hóuseruni keisi katei wíyeti.22Nadiseduba luéi ageiraü le, ábame nígirun lun hawiyedagüdünu nitenpulun, to meha nirisinboun. Hayabinba wuribatiña lun hawiyedagüdünu.23—Aransebá aban güringüri ladüga saragu haña asiadirútiña fulasurugu luagu háfarahan ani buin liña uburugu lau anarimeni.24Nadügüba lun hayabin gürigia wuribatiña anügoun muna burí to uburuguboun. Nagumuchaguagüdübei hapantan hábutigu; nadügüba lun lawiyedagüdüniwa hafulasun burí le sagüráubei.25Habuinchuba lau anufudei; háluahabei darangilaü gama lumoun madarihabei.26Liábinba lamiselu houn gabügürügua, uganu wuribati aban lárigi aban. Málabei háluahan aban profeta lun lasubudiragüdün somu katei houn; úabaña fádirigu lun harufudahan houn; ni wéiyaaña mutu lun heweridihaniña.27Ladaüraguba urúei tau ludu, lírudaguba gumadimati, hadadagaruba lílana fulasu. Nóuserubaña keisi hóuserun, naguseragüdübaña keisi ligaburi haguseragüdün. Ítara luba hasubudiruni luagu au lan Aburemeibei.Bible Society of Honduras