Esekiéli19
Uremu lánina ábunahani
1Aba lariñagun Aburemei nun lun neremuhani uremu lánina ábunahani le hawagu lurúeitegu Ísüraeli:2Aban meha liñún búguchuboun to aganóuboun hadan liñún wügüriña. Adügatu tuban haganagua, aba tagüriaruniña tirahüñü ñein.3Anihein aban hádangiñe wéirigüda tumuti darí lun ligíaali lan éibaaha lungua. Furendeiti hagubachawagun íliru luma heiginiwa gürigia.4Aba haganbun néchanigu ladimurehoun luagu; aba hárügüdüni tau aban sádara, aba haduruuhani lau agürügaü darí Ehiptun.5Dan tarihinbei liñún to lúguchu luagu gumuha lan temenigin, aba tanügün ábanya hádangiñe tirahüñü aba tíderaguni lun laweiridun.6Dan le ábanhali liñún le dayarüti, aba lagumeserun éibuga hadan liñún líledi ha wéinamuhaña. Furendeiti haheiridawagun íliru luma heiginiwa gürigia.7Adaaguatiha günringuaü palasiurugu luma burí uburugu; adadagaragüda lumuti sun ubóu lau ladürürühan.8Ábati hiñuragun lílana burí fulasu houngua luagun; aba hesetirun sádara lubá aba hábürügüdüni tidoun.9Aba hádaruni tidoun aban haula, aba hagüraguni lau güringüri aba hanügüni lun lurúeite Babilónia. Aba hadaürüni ñein, lun maganbúnhali lan ladürürühan dabíararugu Ísüraeli.10Ítara tiña meha búguchu kei aban lídibu beibei le abunúti laru duna, gínheiti meha hiluma ligía ladüga duna le achülürübei luagun.11Chülüti lilimun aweinamuda luma éreda, darí lun leseriwidun lun bádunme lánina agumadihani houn urúeigu. Hanarimeti laweiridun darí lun lachülürün dúerirugu. Subudiwati lídangiñe líbiri lídibu wewe luagu liñun luma liluman.12Gama lumoun aba háhuluni lau igañi, aba háguruni múarugun. Aba lásaüragüdüni garabali le áfurubei luéigiñe oubaü le labouchagüle weyu, aba leiguadúnga in le luágubei; aba lamabeidagun lilimun, aba lágudun.13Guentó, anihein nadü ligía lidan fulasu mageirawati, lidan fulasu mábeiti le mágürabuti.14Áfurihati watu gemeti lídangiñe lilimun, aba láguduni láhüchagun luma lin. Úaali limu dereti luagu le lunti ladügǘn habadun urúeigu lau.Aban uremu lánina ábunahani uremu le, ani lunba lira louserúa.
Bible Society of Honduras