Esekiéli18
Kada gürigia lun lafayeihan luougua
1Aba lariñagun Aburemei nun:2—Ka san uagu merede lubéi lariñawagún uburugu Ísüraeli: “Heiga agübürigu beibei garühütu, láseiseida hari hasaanigu?”3—Au, le Aburemei, fiñutina luagu nibagari luagu mariñagundigia humaali lan dimurei le uburugu Ísüraeli.4Nani sun gürigia, dandu úguchili kei isaani. Le afigouhabei, lóunweba.5—Gürigia le adügübalin katei le richabei, ligía surubei:6Madan lumuti burí fedu le adügǘbei luagu burí wübü houn guáriuagu, michuléi lemenigin hawagu Lubungiutegu Ísüraeli, ha mama búngiugu, magida lumutu lúmari gürigia líledi luéi, maganóunloun lúmari dan le lauñoun lan tidaani;7míchuti lidere dan ni ka un, águyugüda lumuti le afuredeirúbei lun; míweruhanti ni ka uei; fánreingua lumutu leigan fein luma le lamabei, ru ligía daüguaü lun le madaüragunbei;8maguburahanti lóugiñe seinsu le lafuredeirubei; madügünti wuribani ni ka un; lau irichaü laguseragüda bián gürigia;9úaraguati ladügüni sun katei luma nilurudun, gúnfuli lumuti nugumadin lidan lúaragun. Suruti gürigia ligía sunsuinagubei, ani labagariduba ladüga katei ligía. Au, le Aburemei ariñagubalin.10—Gama lumoun anhein garáü lubéi gürigia ligía aban irahü hanarimeti, gáfarahadi ligía le adügüti furumiñeguarügü lídangiñe burí katei le11le burí meha madügün lubéi lúguchi, le gadan lumuti hafedun guáriuagu, le agidaruti lúmari gürigia líledi luéi,12le íchuguti lidere dan lun le gudemebei, le íweruhabei hawéi amu, le máguyugüdünti le lafuredeihabei, le emenigiduti hawagu guáriua, adüga ligía burí katei le mínsiñebei nun,13le aguburahabéi lóugiñe le lafuredeihabei: Siñabei labagaridun gürigia ligía.14—Gayaraati giñe garáü lan gürigia ligía aban irahü le arihubalin sun figóu le ladügübei lúguchi, gama lumoun mafala lumuti lani lúguchi hénpulu;15madan lumuti burí hafedun guáriuagu le hadügübei gürigia luagu burí wübü; michuléime lemenigin hawagu haguariuan Ísüraelina; magidaralóun lúmari gürigia líledi luéi;16michu ligía lidere dan ni ka un, le águyugüdübalin le ichugúbei lun lau furedeiti, gama lumoun fánreingua lumutu leigan fein luma le lamabei, ru ligía daüguaü lun le madaüragunbei;17madügün ligía wuribani ni ka un, mafuredeihan ligía seinsu lun libihin lóugiñe le líchugubei; gúnfulilei nilurudun, adügaléi le lubeibei nugumadin: Móunwenbei gürigia ligía luagu lifigoun lúguchi. Le linarün katei labagariduba lan.18—Ánheinti lúguchi, le íchugubei lidere dan, íweruha ligía, adüga ligía wuribati haganagua lílana fulasu, lóunweba ladüga lifigoun guánarügü.19Fagua hálügüdaguba hungua, hariñagame: Ka uagu mafayeihan lubéi giñe isaani luagu lifigoun lúguchi? Siñati, ladüga adüga lumuti isaani le úaraguabei, gúnfulilei nilurudun: Ligía labagariduba lubéi.20Lérügübei afigouhabei, ligíarügübei ounwe. Mafayeihanbei isaani luagu lifigoun lúguchi, mafayeihan ligíame úguchili luagu lifigoun isaani. Ha úaraguabaña, habihubei hafayeiruaha luagu húaragun; ha wuribabaña, habihubei giñe hafayeiruaha luagu hariban.Lau irichaü luadigimarida Aburemei
21—Anhein lígira aban gürigia wuribati sun wuribani le ladügañahabei, aba lagunfuliruni sun nilurudun, adügaléi katei le úaraguabei, móunwenbei, le linarün katei labagariduba lan.22Maritagundigiaadiname luagu sun buga wuribati le ladügübei, ábame labagaridun ladüga ladügüni le úaraguabei.23Mabusenruntina lun lounwen gürigia le wuribabei, nabusenrun lun lasansiruni lusan, lun labagaridun. Au, le Aburemei ariñagubalin.24—Gama lumoun anhein lígira gürigia le úaraguabei lubuidun lusan, aba ladügüni sun wuribati le ladügübei gürigia le wuribabei, haritaguatün san luagu labagaridamemeba lan gürigia ligía? Maritagundigiaadiname luagun sun buiti le buga ladügübei: Lóunweba ladüga lígiruni ladügüni le buídubei luma luagu lifigoun.25Hariñaguba luagu maricha lan le nadügübei; gama lumoun aganba humana lílana Ísüraeli: Haritaguatün san luagu maricha lan le nadügübei? Máfuna san huguya adügübalin katei wuriba?26Anhein eredera ladügüni gürigia le richaguabei katei le buídubei ligibugiñe Aburemei, lun ladügüni le wuribabei, lóunweba ladüga luriban lusan.27Gama lumoun anhein lígira gürigia le wuribabei luriban lun ladügüni le richabei luma le úaraguabei, lesefurubei libagari.28Anhein léfegecha lagu, aba lígiruni wuribani le ladügañahabei, móunwenbei, le linarün katei labagariduba lan.29—Gama lumoun hariñaguba lílana Ísüraeli luagu maricha lan le nadügübei. Marichati san le nadügübei? Máfuna san lílana Ísüraeli adügübalin le marichabei?30Huguya lílana Ísüraeli, keisi lóuserun kada aban hídangiñe, ítara liña naguseragüdüni. Au le Aburemei ariñagubalin. Ígira huméi huriban sunsuinagubei, madurun humaamuga luagu hagünrinchagun.31Ígira huméi sun wuribani le adüga humaalibei nigibugiñe ibiha humá aban anigi luma aban sífiri iseri, kaba uagu hóunwegua huguya lílana Ísüraeli32mabusenruntinaga lun lounwen ni aban? Dise humá luéi wuribani ábame habagaridun. Au, le Aburemei ariñagubalin.Bible Society of Honduras