Áfuriduni9
Hóunwegun Ibiñani
1Ábati lariñagun Bungiu lun Moisesi lun lidin arihei urúei, lariñaga lanme lun: «Ígiragüdabaña lumutuniña Bungiu lun houdin áhuduragua lun.2Ánhaña mígiragüdün ban,3láfaragubaña Bungiu bibiñanigu lau lubafu, lóunahaba aban óunwenbu sandi hawagun. Hóunweguba gabayu, burigü, kameyu, bágasu hama mudún.4Ánheinti hádangiñe habiñanigu Ísüraelina, úabei ni aban óunweti».5Ariñagati giñe Bungiu:—Harugaba nadügei katei le.6Larugan, aba ladügüni. Aba hóunwegun sun habiñanigu Ehiptuna, ánhaña habiñanigu Ísüraelina, úati ni aban hádangiñe óunweti.7Aba lóunahan urúei arihaña habiñanigu Ísüraelina, úati ni aban hádangiñe óunweti. Lau sun lira aba tedererun lanigi, mígirunti lun houdin Ísüraelina.
Ladagarun guméi hawagu Ehiptuna
8Ábati lariñagun Bungiu lun Moisesi luma Aarón:—Buíngüda huméi húhabu lau baligi lídangiñe régigi, ábame lachüürüni Moisesi baligi iñun ligibugiñe urúei.9Ábame lasaliragun baligi kalikime, ábame lagibedagun lidan sun Ehiptu lun ladügün guméi hawagu sun gürigia hama animaalugu Ehiptuna.10Aba lanügün Moisesi luma Aarón baligi lídangiñe aban régigi, aba houdin lumoun urúei. Aba lachüürüni Moisesi baligi iñun, aba ladagarun guméi dandu hawagu gürigia kei hawagu animaalugu.11Siñati hadügüni garíaahatiña libe le ladügübei Moisesi, ladüga dandu hagía kei sun híbiri Ehiptuna ñeinñein guméi hawagu.12Gama lumoun aba ledereragüdünu Bungiu lanigi urúei, lun madügün lan gasu lau Moisesi luma Aarón, keisi buga lariñaguni Bungiu lun Moisesi.
Láhuyun huya dereguati Ehiptu
13Ábati lariñagun Bungiu lun Moisesi:—Saragiabá haruga lun bidin ariñaga lun urúei: “Ígiragüdabaña lumutuniña Bungiu lun houdin áhuduragua lun;14ladüga ánhaña mígiragüdün ban, lóunahaaña sun igei buagun, hau sun bánigu hama sun bumutuniña, lun basubudiruni luagu ua lan amu kei ligía lidan sun ubóu.15Gayaraati hamugatia larufuduni lubafu bun, lau lasufuriragüdünibu hau sun bumutuniña láurügü aban igei, ani gumuguaadibu hamuga ubouagugiñe;16gama lumoun lígirunbalibu lun babagaridun, lun barihini lubafu, luma lun lasubudiraguagüdün lungua lidan sun ubóu.17Lau sun lira, mahamémetibu bígiragüdüniña lumutuniña.18Kei ítara liña lubéi! Haruga kei oura le, láhuyagüdüba lagu huya dereguati le mábürühanñahagili libe lúmagiñe ñein lan Ehiptu.19Óunahaba lubeiti areidaña bibiñanigu lidan fulasu le chóuruti, luma sun le búmabei áraabu, ladüga danme lábürühan lagu huya dereguati ligía, láfaragubaña sun gürigia hama sun animaalugu ha ladarirun bóugudi”.20Ñéinñanu hádangiñe lánigu urúei anufudedutiña luéi leweridihan Bungiu, aba hebelaagüdüniña hadamun hama habiñanigu;21gama lumoun ñéinñanu híbiri, meberesegúntiña lau, aba hígiruniña bóugudi.22Ábati lariñagun Bungiu lun Moisesi:
—Iñurabéi barüna sielun lun lábürühan lagu huya dereguati lidan sun Ehiptu hawagun gürigia, animaalugu, luma tuagun nadü to hachariruguboun Ehiptuna.23Aba liñuruni Moisesi larüna sielun, aba lóunahan Bungiu wayuhuru, labirihaniga luma lagu huya dereguati luagun sun Ehiptu,24Mararamunti lábürühan lagu huya dereguati luma labirihaniga. Mábürühanñahagili lagu huya dereguati le hanarimeti Ehiptu lúmagiñe ítaga lan.25Günringua lumuti lagu huya dereguati sun le lídanbei lumúan Ehiptu: Áfarati gürigia, animaalugu, luma sun nadü le áraabubei, áhalahalei tilimun burí tídibu wewe to fulasuruguboun.26Ánheinti Gosén, fulasu le ñein lubéi haganawa Ísüraelina, mábürühanti ni aban lagu huya dereguati.27Ábati lóunahan urúei luagu Moisesi luma Aarón, aba lariñagun houn:
—Ariha numuti luagu afigouhaadina lan. Nidurun duru hau sun numutuniña, mama lidurun Bungiu.28Gíbeyaali wayuhuru luma lagu huya dereguati ábürühati wawagun, meredehan naadün. Hamuriaha wawagu luma Bungiu, ábame nígirunün lun hidin.29Lóunabeiti Moisesi:
—Danme náfuridun uburugugiñe, niñurubei núhabu afurieida lun Bungiu lun lerederun lábürühan lagu huya dereguati, úaalime giñe wayuhuru, lun basubudiruni luagu Bungiu lan laburemebei ubóu.30Gama lumoun subudi numuti buidu luagu ni lan buguya, ni bánigu manufudegidün luéi Bungiu.31Fériditi burí bunaguaü le linu luma sebada, ladüga madiseeli yebe lalubahóun sebada, liabin linu, egelewehaali.32Ánheinti lun türigu luma sentenu madügünti ni kata lau ladüga tárüti labouchun.33Dan le láfuridunbei Moisesi uburugugiñe lárigiñe ladimurehan luma urúei, aba lafurieidun lun Bungiu. Aba lerederun lábürühan huya dereguati luma láhuyun huya, redei ladürürühan wayuhuru.34Gama lumoun dan larihin urúei luagu rédeiha lan sun katei le, ábaya lafigouhan. Mámarügaali ligía ederera anigi, íbini giñe lánigu.35Aba tedererun lanigi urúei, mígiragüdün lumutiña Ísüraelina, keisi lariñaguni Bungiu lun Moisesi.
Bible Society of Honduras