Áfuriduni31
Ha lúnbaña hewendedagüdünu sanduariu
1Lariñaga Bungiu lun Moisesi:2—Anúadira naali Besaléli, le liráü Urí libari Uru, hádangiñe lani Hudá türibu,3buíngüda naali lau nani sífiri, luma lau lichú aau, gunfurandaü, subudi luma ubafu,4lun ladaagun adibuhani luma wadagimanu lauti golu, pülata, buronse,5lun laransehan dübü buíduburiti, wewe, luma lun ladügün furumiñeguarügü wadagimanu.6Ru naali Oliabü le liráü Aisamákü le hádangiñebei lani Dan türibu lun líderaguni. Rúhadina lanwoun lichú hau chu tau, lun hadügübei lan sun le uágubei nariñaga bun:7kianpu lánina óundaruni, bágüsi to lagei daradu, tidáü bágüsi, sun katei le ayusurúbei tidan kianpu lánina óundaruni,8dábula lau sun le ayusurubei luagu, lebu sanudelu lauti golu lau sun lumegegun, latarü le lánina kupali,9latarü le lánina adagaragüdüni gudawarügüti lau sun lumegegun, ágeidinaü lau lebu,10daüguaü hüchawatu, tomeme ladaüragun Aarón tuma hadaüragun lirahüñü to lunboun hayusurunu dan le hadügüni hawadigimari keisi fádirigu,11garaba lánina anúadiruni luma kupali hémeti tun sanduariu. Lunti hadügüni sun katei ítara kei nariñaguni bun.Luéyuri emeraaguni
12Lariñaga Bungiu lun Moisesi:13—Badimureha hama Ísüraelina bariñagame houn: Lunti inebe lan luéyuri emeraaguni hun, ladüga ligía niseininbei huma lun sun dan, lun lasubudirúniwa luagu anúadira naadün lan au le Aburemei.14Sagüráubei luéyuri emeraaguni hun, gasu inebe lan hun. Le minebenti weyu ligía lun, lasiadirúba lun lounwen. Le giñe awadigimariduti lidan luéyuri emeraaguni, lagidarúba hádangiñe gürigia.15Gayaraabei luadigimariniwa sisi weyu, gama lumoun lisedün weyu luéyuribei emeraaguni, ani lúntibei Bungiu. Furumiñeguarügü le nadagimeinti lidan luéyuri emeraaguni, lasiadirúba lun lounwen.16Gasu lubeiti inebe lan luéyuri emeraaguni houn Ísüraelina kei aban daradu le magumuchaditi.17Ábanbei seini le lánina súnwandan hadan Ísüraelina numa.Ladüga, lidan sisi weyu ladügei Bungiu sielu luma ubóu, luagu lisedün weyu, ligía lásurun luadigimari, aba lemeraagun.
Liraüraü bágasu le lauti golu
18Dan le lásurunbei ladimurehan Bungiu lun Moisesi luagu wübü le Sinaí, aba lederegerun bián dübü lun, le gawagubalin lúrudu le labürühabei Bungiu lau guánarügü lifinga.Bible Society of Honduras