Áfuriduni28
Hadaüragun fádirigu
1—Hádangiñe Ísüraelina, rédeibei Aarón le bíbiri bubadugua lau Nadabü, Abiu, Eleasárü luma Itamárü ha lirahüñü lun hagíaba lan fádirigu nun.2Adüga humá daüguaü buíduburitu lun bíbugaña Aarón lun tíchugun uéiriguni luma magadiñeni lun.3Hadimureha hama ha gáhüchaguaditiña buidu ha únbaña níchiga subudi lun hadügünu lun háhüchünu ladaüragun Aarón, ábame lederegeragun lungua kei fádiri nun.4Ítara tuba daüguaü to lunboun háhüchagunu: Lidáü aniguagu, épanu, idáü, dúnigu aborudahóuatu, búnedu tautu linu luma béliti. Tahüchǘba lubeiti, daüguaü to buídutu lun bíbugaña Aarón luma houn lirahüñü lun hafadirihan nun.5Ha lúnbaña háhüchagunu daüguaü, lunti hayusurun golu, gamisa díngutu, gamisa koloru guchu, gamisa funatu tuma linu fínutu.6—Láutuboun golu épanu, tau gamisa díngutu, gamisa koloru guchu, gamisa funatu tuma linu fínutu, taborudahóuame,7lau giñe bián dirandi le dúnguati luougua luéigiñe biángubei louba.8Béliti le tigibuagubei épanu lun lárügüdünu, ábanmemebei tuma, láutibei giñe golu, gamisa díngutu, gamisa koloru guchu gamisa funatu tuma linu fínutu.9—Hanügame bián dübü kórunalina híchigeime hiri lirahüñü Ísüraeli luagu,10lúmagiñe furumiñeti águrahouti lumoun agumuhóuni, sisi iri luagu kada dübü.11Ábanba gawadigimaridaditi golu abürühei iri luagu dübü ítara kei labürühóun iri luagu seyu. Híchigame golu luagu laru dübü ligía,12ábame híchuguni luagu tidirandin épanu, aritawaguagüleime hawagun lirahüñü Ísüraeli. Ítara luba lanügüni Aarón hiri légewagu ligibugiñe Bungiu lun laritagun hawagun.13Lauba golu badügei taru;14hadügame aban güringüri lau bián agürügaü le golu, híchigeime geyegu lau aru.15—Haborudahounme giñe lidáü aniguagu, tau sun burí daüguaü to lánina aguseruni ítara kéigubeirügü épanu. Lauba golu hadügoun, gamisa díngutu, gamisa koloru guchu, gamisa funatu tuma linu giñuruatu,16to dóbuliwatu ani gádürü ligía tarigei, wein bián sentimeturu luéigiñe kada touba.17Hafurarounme lau dübü buíduburiti, hadügame gádürü laini. Furumiñeti laini ñeinbei aban rubí luagu, aban kürisólitu luma aban ésümeralüda;18le libiaman; aban güranate, aban safiru luma aban hade,19le lǘrüwan; aban hasintu, aban ágata luma aban amatísüta;20le ligadürün; aban topasiu, aban kórunalina luma aban hásüpe. Luágubei aru le golu dübü ligía,21dúusubei giñe, ladüga dúusuñein hiri lirahüñü Ísüraeli. Luagu kada dübü, ñeinbei hiri kada aban hádangiñe lani Ísüraeli duusu türibu.22—Hadügame fiu iñari golu le aguribihóuati tun lidáü aniguagu.23Hadügame giñe bián bángüli golu ábame híchuguni luagu bián tígirugu lidáü aniguagu;24híchigeime bián iñari golu ligía luagu bián bángüli le luágubei bián tígirugu íñugiñe libiti lidáü aniguagu.25Híchigeime bián lígirugu bián güringüri luagu bián aru, hachourureime luagu tidirandin épanu, tigibugiñe.26Hadügame biámaya bángüli golu, híchigeime luagu bián tígirugu lidáü aniguagu le ǘnabugiñebei libiti, luagu laru le múnadagiñebei, le tubadubei épanu.27Hadügame biámaya bángüli golu, híchigeime igibugiñaü libiti tidirandin épanu, gama lumoun ǘnabugiñe libiti, lubadu fadaguaü, íñuraü libiti tubelitina épanu.28Ábameti ladunragun bángüli le tuágubei lidáü aniguagu luma bángüli le tuágubei épanu lau aban agürügaü koloru guchu, lun terederun lidáü aniguagu íñugiñe libiti tubelitina épanu, lun mafanreinragun tan tuma.29Ítara, danme lebelurun Aarón tidoun sanduariu lau lidáü aniguagu luougua lau burí katei le lánina guséi, lanügübei giñe hiri lirahüñü Ísüraeli laniguagu ligibugiñoun Bungiu, lun laritagun hawagun súnwandan.30Ru huméi Urimü luma Tumimü luagu lidáü aniguagu, ligía burí katei láninabei guséi, barǘ láamugei Aarón luagu laniguagu dan le larufudagun lungua ligibugiñe Bungiu. Ítara luba lanügüni Aarón katei le lánina burí guséi laniguagu ligibugiñoun Bungiu súnwandan.31—Adüga humóun tidáü épanu tau gamisa guchu,32lau aban huyu tamidangua lun gayara lan tadaürǘniwa. Habarucheime laru huyu kei le tuágubei chaleku lautu gueru, luéi taheiridagun.33Híchigame luenden taru idáü güranáda tautu gamisa díngutu, gamisa koloru guchu tuma gamisa funatu, luma burí lirahüñü raüwa golu geyegua lau sun taru,34aban liraüraü raüwa golu, aban güranáda, ábaya liraüraü raüwa golu, ábaya güranáda, ítareina luagu sun taru idáü.35Gasu luagu tan Aarón kapa dan ladügüni luadigimari kei fádiri lun danme lan lebelurun tidoun sanduariu ligibugiñe Bungiu o danme lan láfuridun, aganbúa láamuga ladaünhan raüwa lun mounwen lan Aarón.36—Adüga humá aban bürüti lau golu le tímatimaati, bachigeime dimurei le luagu: «Díreiwaali lun Bungiu».37Híchigeime bürüti luagu búnedu, ligibugiñe, güragu lau aban agürügaü koloru guchu, lun mánhingichun lan.38Ítara luba lereberugubei lan Aarón súnwandan, ábame lanügüni Aarón sun duru le hadüga Ísüraelina lidan burí katei le sánduti, luma dan le hederegeruni hidewese; gama lumoun ladügüba bürüti ligía lun leresibiruni Bungiu idewesei.39—Adüga humóun gounu tau gamisa to linu to aborudahóuatu, adügabéime giñe búnedu tau gamisa linu. Laborudahouba giñe béliti.40Houn lirahüñü Aarón, hüchawatá gounu, béliti luma búnedu lun líchugun uéiriguni luma ubuiduni houn.41—Ítara luba badaüraguagüdüni Aarón hau lirahüñü, lárigiñeme béserame garaba hábulugun lun habihin ubafu luma lun banúadiruniña keisi nufadirinigu.42Hüchaba giñe galasunsiyu houn to linu lun tadouragun hau lúmagiñe haranaagua lumoun hayada,43Hadaürounme Aarón hama lirahüñü dan le hebelurun tidoun kianpu lánina óundaruni, o dan lan le hayarafadun lun latarü, dan le hadügüni hawadigimari keisi fádirigu tidan sanduariu, madügün hamaamuga ni murusun duru luéi hóunwegun. Aban lúrudu le lunti súnwandan le lun Aarón luma houn ladügawagun.Bible Society of Honduras