Esterü6
Lagañeirun Marüdokéu
1Áriebumeme ligía, siñati larumugun urúei, ábati lamuriahanu líburu to ñein lubéi bürüwañu lan sun burí katei wéiriguti le asuseredubei fulasurugu, lun haliihanu lun.2Ñeinti hadarirei labahüdaguni Marüdokéu luáguti leledegun Bigütán luma Teresi úfisigu hani óunigirutiña lúbiñe urúei lun háfaruni urúei Asueru hilagubei.3Ábati lálügüdahan urúei:—Ka san fáyeiti luma inebesei libihubei Marüdokéu luéigiñe katei le?
Hariñaga lánigu lun:
—Mibihinti ni kata.4Lidan oura ligía, ligía lebelurun Amán lidoun bürürü le ñein tubéi burí lirumun urúei, lun lamuriahan luma lun látigiruniwa Marüdokéu lau átigiragülei le ladügagüdübei.
Aba lálügüdahan urúei, lariñaga:
—Ka le lídanbei bürürü?5Hóunabeiti lánigu:
—Amán.
Lariñaga houn:
—Belula!6Aba lebelurun Amán, lariñaga urúei lun:
—Ka san lunbei ladügǘn lun wügüri le unti labusenra urúei líchugun Inebesei?
Lariñaga Amán lúnguarügü:
“Kábati un labusenra urúei líchugun inebesei nuéidigia?”7Ábati lóunabun:
—Lun wügüri ligía,8mosu tanügǘniwa dúnigu tomeme layusuruboun urúei, luma aban hádangiñe gabayu ha lilügüniña urúei, le anügüti aban ridi le lani urúei lábulugu.9Dúnigu luma gabayu, tederegerúba lun aban hádangiñe ha íñugutimabaña lidan gumadi lun ligía lan adaüraguagüdei wügüri le unbei labusenra urúei líchugun inebesei, ábame lanügüni luagu gabayu lidoun párüke le uburugubei, agúaraheina ligíame ítara: “Ítara liña louserúniwa wügüri le unbei labusenra urúei líchugun inebesei!”10Ábati lariñagun urúei lun Amán:
—Furesebá, barüboun dúnigu luma gabayu, ítara kei bariñaguni, ábame badügüni lun huríu Marüdokéu le ñunbei tubenari palasiu. Mígirabatia ni kata lídangiñe le bariñagubei magunfulirunga.11Ábati lanügünu Amán dúnigu luma gabayu le uágubei lariñaga urúei lun, lun lasansiraguagüdüni Marüdokéu, barüinaléi gabayuagu lun lasariñahan lau párükerugu agúaraheina lubá lubá: «Ítara liña louserúniwa wügüri le labusenrubei urúei lun inebewa lan!»12Lásurunbei hasariñahan, aban lagiribudun Marüdokéu tubenarin palasiu, ánheinti Amán aban lidin furesegueina lúbiñoun, hírugueina darúina lau ligibu.13Ñein labahüdaguei le asuseredubei lun tun lúmari luma houn lumadagu, hariñaga lun:
—Anhein huríu lubéi Marüdokéu le úmabei bagumesera eferidira gumadi, básiñarubei agañeira, beferidirarügüba sunsuinagubei luma.14Másugili hadimurehan ligía hachülürün lumusuniña urúei ha eseriwidubalin, lun hanügüni Amán lidoun adineruni le taranserubei Esütérü.
Bible Society of Honduras