Apurichihati11
1Chüboun beigan fein dúnarugun; tagiribudayaba bun dan luagun dan.2Afanreinhabei búmati le biyaraati, lugundun ibidiñeti wuribani le gayaraabei liabin luagun ageiraü bun.3Anhein gala lubéi dúeri duna, ábürühati huya luagun múa, gayaraati lábürühan tídibu wewe luagun nórute o luagun lan suru, le ñeinhin lumuti lábürüha, ñeinba leredera.4Le erederuti aríagua garabali mábunagunbei, le erederuti aríaaha dúerirugun, malubahanbei.5Ítara kei ibidiñe lan bun haliñoun lan lidin garabali, ni ida liña lan ladügǘn irahü turageirugu lúguchu, ítara giñe ibidiñe lan ni kata bun luagu le ladügübei Bungiu le adügübalin sun katei.6Bunabei binadüri binaafin, bunabei giñe rábounweyu, lugundun ibidiñewati kaba lan buídutima, anhein le lubéi bábunubei furumiñe o le lan libiaman o buídubei lan biángubei.7Buiti larugounga, buiti giñe lun larihini agu weyu;8gama lumoun íbini labagaridun gürigia saragu dan, efeduhaléi sun dan ligía, lunti laritagun luagu saragubei lan lidaani luburiga, ani ugundani lan málati sun le lunbei liabin.
Eweridihani houn nibureingiña
9Befeduha nibureingili, guentó luagu buin biña lan lau ibagari; efeduhabéi le buídubei guentó le auti biyara, ígiraguagüdaba bungua lun le tariñagubei banigi bun, luma sun le barihubei, gama lumoun haritaguabá luagu laguseragüdübadibu lan Bungiu luagu sun katei le.10Dísegüdabei idiheri lídangiñe bisaminan, fuibei súfuri buáriua, lugundun íbini lubuidun-agei lidaani nibureini, katei giñe málati.Bible Society of Honduras