2 Lúrudu31
Hosué leweñegua Moisesi
1Aba lasigirun Moisesi adimureha houn sun lílana Ísüraeli, lariñaga houn:2—San-wein irumu nau guentó, ani méreedina lun yagüroun yaroun nan. Ariñagaali giñe Bungiu nun luagu mánhiñuragun nubéi lan Hordán.3Gama lumoun léibuguba Wabureme le Hubungiute hubá hubá, hagünrinchagubaña néchanigu ha lúnbaña lasagaruniña hageiragiñe lun huguyaba lan laburiña ageiraü ligía. Lídiba Hosué hubá hubá keisi ábuti, ítara kei buga lariñaguni Bungiu.4Ladügüba Bungiu houn néchanigu ha kei ladüga lun Sihón luma lun Ogu, ha harúeitegu Amoruna lau sun hageira, ha lagünrinchagubaña.5Dánmeti lábürügüdüniña Bungiu néchanigu ha labun hubafu, lunti hadügüni sun le ariñaga náalibei hun hau.6Ganigi humá ragǘ huguyame gurasu, manufudeda humá danme le hageindagun hama, lugundun anihein Wabureme le Hubungiute huma, ani mígirun lubadün hábugua.7Lárigiñe aba lagúarun Moisesi lun Hosué, aba lariñagun lun hagibugiñe sun lílana Ísüraeli:—Ganigibá, gaguraasun buguyame, ladüga gasu banügüniña gürigia ha lidoun ageiraü le uágubei láfiñura Bungiu houn hagüchagu luagu líchugubei lan houn, ani buguyaba ederegerei houn.8Lídiba Bungiu guánarügü bubá bubá, ani búmabei; mígirun lubadibu bábugua; manufudedabá lubeiti.
Laliihóuniwa lúrudu
9Aba labürühani Moisesi lúrudu le, aba lederegeruni houn fádirigu Lewitagu ha anaahabarun lubagüsina lidaradun Bungiu luma houn sun adundehatiña ha lílana Ísüraeli,10ariñageina ligía giñe houn:—Sagü sedü irumu danme lachülürün lidaani ferudunawa lan dúeiti, lidan tufedun dibasein,11lunti hóundaragun sun Ísüraelina ligibugiñe Aburemei le Habungiute lidan fulasu le lanúadirun, laliihóuba lúrudu le hañúarü sun hagía.12Lunti hóundaragun sun lílana fulasu, dandu wügüriña kei würiña, irahüñü hama sun terencha ha aganóutiña lidan burí huburugute, lun haganbuni laliihóun lúrudu furendei hamaamuga lichugún inebesei lun Bungiu le Habungiute, adüga hameime sun le lariñagubei lúrudu ligía.13Ítara luba, hisaanigu ha ibidiñeti ni kata houn luagu lúrudu ligía, gayaraabei giñe haganbuni, ábame hafurendeirun inebewa lan Bungiu lidan sun habagari lidan ageiraü le ñéinhinba lubéi hebelura lárigiñe hánhiñuraguni Hordán.
Lagumuhóun arufudahani lúmagiñe Bungiu lun Moisesi
14Lárigiñe aba lariñagun Bungiu lun Moisesi:—Ayarafadeina liña oura lun bounwen; waba lubeiti lun Hosué, hídinme biángubei huguya nun tidoun kianpu lánina óundaruni lun nariñaguni le nabusenrubei hun lun hadügüni.
Aba lidin Moisesi luma Hosué tidoun kianpu lánina óundaruni,15aba lasaliragun Bungiu houn ñein lidan aban dúeri le araramubei lóugiñe tubenari kianpu.16Ábati lariñagun Bungiu lun Moisesi:
—Málühadibu ánhabu hilá, ábame hagadeirun gürigia ha lau hafalaruniña habungiutegu lílana ageiraü terencha le ñeinba lubéi haganawa, ábameti hígirunina, ábame háhalachaguni daradu le nadügübei hama.17Gama lumoun lábürühaba nigañi hawagun, ábame nígiruniña, meberesenbadina hau ni ka uagu, ani gíbebei wuribani le lunbei lábürühan hawagun, darime lun hariñagun: “Ma funa san ladüga úaali lan Bungiu le Wabungiute wama awanha lubéi asufurirei sun wuribani le?”18Gama lumoun danme lachülürün oura ligía, nadiñurubatima hawéi ladüga sun wuribani le hadügübei luma ladüga háhuduragun houn amu búngiugu.19—Guentó lubeiti, abürüha huméi uremu le, arufudaha humeime houn Ísüraelina lun heremuhani lun leseriwidun nun keisi gefenti kóntüra hagía.20Lugundun danme belugüda naaña lidoun fulasu le uágubei náfiñura houn hagüchagu luagu níchugubei lan houn, fulasu le rísiti ani buidu ligía lun ábunaguni, danme hóuhaña darí hakimuledun, ábame houdin hárigi amu búngiugu, ábame háhuduragun houn, híchigame mebereseni nuagu halagua hameime nidaradun hama.21Gama lumoun danme liabin saragu wuribani hawagun ábanbei gefenti kóntüra hagía uremu le, lugundun heremuhabei hálawagu; lugundun lubaragiñebei nebelaagüdüniña lidoun ageiraü le uágubei nariñaga houn luagu níchugubei lan houn, subudi numuti ka lan hasaminarubei.22Weyuméme ligía, aba labürühani Moisesi aba larufudahani houn Ísüraelina.23Aba lariñagun Bungiu lun Hosué le liráü Nun:
—Ganigibá, hemenigi buguyame, lugundun buguyaba ebelaagüdaña Ísüraelina lidoun fulasu le lunbei níchuguni houn, ñéinbadina bóubagiñe.24Dan le lásurunbei labürühani Moisesi lúrudu burí le tidan aban garudia,25aba lariñagun houn Lewitagu ha anaahabarun lubagüsina lidaradun Aburemei:26—Barǘ humóun garudia to lánina lúrudu to, híchigounme tóubagiñe lubagüsina lidaradun Wabureme le Hubungiute, lun ñein tan keisi gefentu kóntüra huguya.27Lugundun subudi numuti luagu gürigia lan mabuchahatiña ani deré taganbun huguya, arufuda humaali ligía humabuchahan lun Bungiu guentó lau anahagua lan haganagua, Ídatima huba danme hilaadina?28Barǘ humaña sun adundehatiña hádangiñe hani türibugu ñahoun, lun nadimurehan houn luagu burí katei le, ru náamugei sielu luma múa keisi gefenti kóntüra hagía.29Ladüga subudi numuti luagu lárigiñe lanme nounwen hagadeiruba lan ábame hígiruni üma le uágubei nariñaga hun lun hafalaruni; subudi numuti giñe luagu anitebei lan lamiselu hun ladüga hadügüni le wuribabei ligibugiñe Bungiu, agañidagüdei lau lira.
Leremun Moisesi
30Ábati laliihani Moisesi uremu le lúmagiñe lagumeseha darí lumoun lagumuhóun hañúarü sun Ísüraelina ha óundaragubaña:Bible Society of Honduras