2 Lúrudu30
Füramasei lánina abinirúni
1Lariñaga Moisesi houn gürigia:—Au ariñaga naali hun libügürü abinirúni luma íñarawaguni le füramase lubéi Bungiu lóunahan. Lídanme léiguadagüdüni abeichúni huagun, lídanme aünha lan chagaguñu lidan sun néchani le ñéinhinba lubéi ladagaragüdaün Wabureme le Hubungiute haritaguba luagun abinirúni luma íñarawaguni ligía.2Anhaün agiribuda lun Bungiu huguya habu hadügawagun, aganba humeime tau sun hanigi luma tau sun huani, kei nariñaguni hun uguñe,3lasansirubei Wabureme le Hubungiute hubunurun ábame hagudemedagun lun. Ábayame lóundaragunün lídangiñe ageiraü burí le buga ñeinhin lubéi lachagaraün,4laume sun chagaguhaña lan sun ha asagarúbaña hageiragiñe, lidan burí fulasu le dísetimati ubouagu, lanügübaña Wabureme le Hubungiute ñéingiñe, lídiba áluahaña dagá ñein.5Lagiribudagüdübañaya Bungiu lidoun fulasu le meha ñein habéi hagüchagu, ábayame hiabin lun haganóun ñein; lawanseragüdübadün, gíbetimabaña isaanigu líchugun hun sügǘ lau meha houn hagüchagu.6Líchugubei lumakün daradu tuagu hanigi luma tuagu hanigi hadügawagun, lun lahinsiñedun hun tau sun hanigi, tau sun huani, lun gabagaribadün lan.7Lábürügüdübei Wabureme le Hubungiute sun íñarawaguni le hawagun háganiñu luma hawagun sun ha éibaahabalün lau iyereehabúni;8huguyati hagiribuduba lun Bungiu, ábame haganbuni, adüga humeime sun le lariñagubei gumadi le nariñagubei hun uguñe.9Ábameti lawanseragüdünün Bungiu lidan sun le hadüga, hadan isaanigu, hadan harahüñü hibiñanigu luma lidan alubahani. Ítara luba, ladügayaba Wabureme le Hubungiute buiti hun kei meha ladügüni houn hagüchagu,10anhein hadüga le lubeibei Wabureme le Hubungiute, ani gúnfuli humeime burí lugumadin luma lilurudun le bürüwañubei tidan garudia lánina lúrudu to, giribu huguyame lun tau sun hanigi luma tau sun huani.11—Gumadi le níchugubei hun uguñe, mama katei wéiriti lénrengun hun, ani mama giñe katei le siñá humuti agunfulira.12Mama siéluñein, lun lariñawagúba lan: “Kaba san gayara lamudeirun sielun lun lanügüni woun lun wasubudiruni adüga wamaamugei?”13Mama giñe loubafuruguñein barana lun lariñawagúba lan: “Kaba san ánhiñuraguei barana woun, lun lanügüni woun lun larufuduni woun lun wadügüni?”14Lubaragiñe lira wéiriti liyarafan gumadi le hun; hiyumuluguñein luma haritagunrugu lun gayaraabei lan hagunfuliruni.15—Níchuguña hun lun hanúadahan uguñe, aban lídangiñe bián katei le: Ibagari luma buiti luéigiñe aban oubaü, óunweni luma wuribati luéigiñe le aban oubaü.16Anhein hadüga le nariñagubei hun uguñe, hínsiñe ligíame Wabureme le Hubungiute hun, falá humeime lémeri, gúnfuli humeime lugumadin luma lilurudun, habagariduba, gíbebaña hisaanigu, ani labinirubadün Wabureme le Hubungiute lidan fulasu le ñéinhinba lubéi hebelura.17Gama lumoun anhaün madügün gasu lau sun le, hafalarame amu búngiugu lun heseriwidun houn, hudugua huguyame hagibugiñe,18nariñahare hun ouraméme le luagu hóunweguba lan, ani málübadün lidan ageiraü le lunbei hagañeiruni lárigiñe hánhiñuraguni Hordán.19Ru numuti sielu luma múa keisi gefentiña kóntüra huguya uguñe weyu, luagu ru naadün lan lun hanúadahan aban lídangiñe bián katei le, ibagari luma óunweni, luma lidan abiniruni luma íñarawaguni. Anúadira huméi lubeiti ibagari, lun habagaridun hau sun hadügawagun;20hínsiñela Wabureme le Wabungiute hun, aganba huméi, gúnfuli humá luma, luéigiñe burí katei le dipeni lan hibagari, ítara luba habagaridun saragu lidan ageiraü le uágubei láfiñura Bungiu luagu líchugubei lan lun Abüraámü, Isaakü luma lun Hakobu ha hagüchagu.
Bible Society of Honduras